2 Tim 1 - WÄNYI KWËRØ 2011

¹ Wɑ̈nyø men ör-ɑ yi Pøøl, jɑlwööni Yëso Mesiy kì bɑng gïn-ɑ ɑ́dwɑddi yi Jwøk; ɑ́ör ɑ́ jɑlwöödø men kɑ̈lli wööni nënn-ɑ yod kì bɑng rëbø ki Yëso Mesiy.

² Yɑ gwëd-ɑ Timøthì wɑ̈dɑ wɑ̈n-ɑ mɑɑrɑ. Wiy kwøbbi kɑ ɑ́lɑ̈ɑ̈m pyëw Jwøk kiperí, kí dhwɑ̈ng geki mër møg-ɑ nyi kɑ̈ɑ̈l yï Jwøk Wïyee geki Wë Yëso Mesiy, ying gen kömí.

Pwøj geki Cïïjø

³ Yɑ pwøj-ɑ Jwøk, ngɑn-ɑ göggɑ ni kɑ ɑ́göög kweyyee cøn, e bong ɑ́dud kì yethi gen. Nyii pwøjø yi yɑn kenyi kwɑ̈jjɑ kiperí yethi cyɑ̈ng bënn.

⁴ Yɑ nyi rïïj yɑ orumø kiperí yethi cyɑ̈ng bënn, kɑ ywøng-ɑ ɑ́ywøg yi yïn kì bøli keny-ɑ ɑ́dɑ̈ngi wɑ, nyi pɑɑrɑ.

⁵ Yïëyø mií, yïëy-ɑ dyër orømmø yi yɑn ceth; eni yïëy-ɑ ɑ́ying yï wøngí Løis geki meyí Yunïkɑ̀ cøn.

⁶ Bene ɑ pere pɑ̈ddɑ yïn kinni, mïdhí tegø men-ɑ ɑ́mëggi yïn yi Jwøk kì bɑng kɑ ɑ́thɑɑnyɑ cinggɑ kömí.

⁷ Mɑ́ wɑ pɑ løg wɑ̈rrì yi Wëy-ɑ ɑ́mëggi wɑ yi Jwøk, de wɑ ceg kɑ thödhø yi Wëyɑni ki tegø geki mɑ̈ɑ̈dø, kí kori rɑw.

⁸ Kɑ wïjí ko lɑ̈yyi cyee ki kømmi mø Wë, kɑ wïjí ko lɑ̈ɑ̈y kipe kɑ̀ bëëdɑ yɑ bɑ ɑmɑg. De yïëëy ki orɑng kipe Wöndøj, kɑ̀ thödhi yïn yi Jwøk ki tegø men gwøøg møgɑni.

⁹ Wɑ ɑ́yiel yi Jwøk kɑ wɑ cwøle o wɑ bëëd wɑ, wɑ bɑ jie. De pɑth ki per gïn gwøøg wɑ, dɑ́ gïn-ɑ ɑ́dwɑddi yi pyëwe kì bɑng døøje. Dhwɑ̈ngɑni ɑ́mëgge wɑ kì ri Yëso Mesiy cøn, e piny nuti cwɑ̈jø,

¹⁰ de møgɑni ɑ́nyudhi wɑ ɑnɑn, kì ri bëëni Yïënee, Yëso Mesiy. Thøø ɑ́tyɑm yi en, kɑ kwøbbi nënn-ɑ ɑtheer nyodhe kì ri wöndøj.

¹¹ Yɑ ɑ́kwɑny yi Jwøk, yɑn ɑ́ jɑlwöödø, kɑ yɑ gwøge yɑn ɑ́ jɑlpwönyi Wöndøj men kɑ̈llii kì kelli teedø.

¹² Bɑ kiper møgɑni ɑ ɑ́rɑngɑ yi gïg mø gïïr e wïjɑ pɑ lɑ̈ɑ̈y, mɑ́ ngɑn-ɑ ngɑ̈dh yi yɑn ngɑ̈nyɑ, o gïn-ɑ ɑ́cïbe cingɑ ómïdhi gïti keny-ɑ óbëën Cyɑ̈ngɑni.

¹³ Mɑ̈gí kidøøj kì ri kwøbb-ɑ dyër møg-ɑ ɑ́pwönyɑ yïn bënn, kɑ yï bëëd yï mïdh-ɑ yïëyø, kí mɑ̈ɑ̈dø møg-ɑ kɑ̈ɑ̈l yï Yëso Mesiy.

¹⁴ Korrí kwøbb-ɑ dyër, møg-ɑ ɑ́cïb cingí, o yï ókøny yi Wëykwërø ngɑn-ɑ bëëdø kì riee.

¹⁵ Ngɑ̈nyi yi yïn kinni, yɑ ɑ́wiy piny yi tyëng Ásiyɑ̀, kí Pijeløs geki Ërmojenes kì kelli gen.

¹⁶ Gøl Onisipørøs ókøny yi Jwøk, mɑ́ yɑ ɑ́cïj yi en, o wïje nuti lɑ̈ɑ̈yø yi yëll-ɑ cinggɑ.

¹⁷ De yɑ ɑ́yɑbe keny-ɑ ɑ́wɑ̈nhe Römɑ̀, kɑ yɑ yode.

¹⁸ Jwøk pyëwe ólɑ̈ɑ̈m ki en kì Cyɑ̈ngɑni! O óyïddi ki gyëdh. Mɑ́ e ngɑ̈nyi yi yïn ki mendwøng, kinni yɑ ɑ́køny yi en keny-ɑ ɑ́yingɑ Epɑsos.