तीतुस 3 - सरगुजिया बाइबिलमसीह मन कर चाल-चलन 1 लोग मन ला सुधि दिलाव, कि हाकिम मन अउ अधिकारी मन कर अधीन रहे, अउ ओमन कर हुकूम माने, अउ हर एक बड़िया बुता बर तियार रहे, 2 कोनोच मन ला बदनाम झिन करा, झगरा दार झिन होए; पर कोमल स्वभाव कर होए, अउ सबेच लोग मन कर संग ढेरेच नम्रता कर संग मे रहे। 3 काबर कि हमन भी आगू बिना बुईध के, अउ हुकूम नी माने बाला, अउ भ्रम मे पड़ल अउ कई नियर कर अभिलाषा मन अउ सुख बिलास कर गुलामी मे रहेन, अउ बैरभाव, अउ डाह करे मे जीवन बितात रहेन, अउ घृनित रहेन, अउ एक दूसर ले बैर रखत रहेन। 4 पर जब हमर उद्धारकर्ता परमेश्वर कर कृपा, अउ लोग मन पर ओकर प्रेम परगट होईस, 5 त ओहर हमर उद्धार करिस; अउ धार्मिकता कर बुता कर कारन नही, जेहर हमन हर अपन करेन, पर अपन दया कर अनुसार नावा जनम कर स्नान, अउ पवित्र आत्मा कर हमन ला नया बनाए कर द्वारा होईस। 6 जेला ओहर हमर उद्धारकर्ता यीशु मसीह कर द्वारा हमन पर अधिकाई ले उझलिस। 7 जेकर ले हमन ओकर अनुग्रह ले धर्मी ठहराए के, अनन्त जीवन कर आसरा कर अनुसार वारिस बने हन। 8 ये गोएठ सहिच है, अउ मैहर चाहथो, कि तय ये गोएठ मन कर बिषय मे मजबूती ले गोठियाए, एकरे बर कि जेमन मन परमेश्वर पर बिश्वास करथे, ओमन भला-भला बुता करे मे लगे रह कर ध्यान रखही। ये गोएठ मन भला, अउ लोग मन कर लाभ बर है। लड़ाई मन ले बचे रहा 9 पर मूर्खता कर बिवाद, अउ बंशावली, अउ बिरोध, अउ झगरा, ले जे ब्यवस्था कर बिषय मे होए, बचे रह; काबर कि ओमन निष्फल अउ ब्यर्थ है। 10 कोनो पाखण्ड ला एक या दूई तोर समझाए-बुझाए के ओकर ले अलगेच रह। 11 ये जाएन कर कि एसन लोग हर भटेक गईस है, अउ अपन आप ला दोषी ठहराए के पाप करतेच रहथे। आखरी सन्देश 12 जब मैहर तोर जग अरतिमास या तुखिकुस ला भेजहु, त मोर जग निकुपुलिस शहर आए बर प्रयत्न करबे; काबर कि मैहर ओहिच ला जाड़ ला काटे बर निश्चय करे हो। 13 जेनास ब्यवस्थापक अउ अपुल्लोस ला यत्न कईर के आगू पहुचाए दे, अउ देख, कि ओमन ला कोनो चीज कर कमी झिन होए पाए। 14 हमर लोग मन भी जरूरत मन ला पूरा करे बर बड़िया बुता मे लगे रहे बर सिखे ताकि हारत झिन रहे। आशीर्वाद 15 मोर सबेच संगता मन कर नमस्कार। अउ जे बिश्वास कर कारन हमन ले प्रेम रखथे, ओमन ला नमस्कार। तुमन सबेच पर अनुग्रह होवत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation