तीतुस 2 - सरगुजिया बाइबिल

सहिच शिक्षा कर अनुसरन करा

¹ पर तय एसन गोएठ गोठियाल कर जेहर खरा उपदेश कर लाएक है।

² मने कि बुडूवा लोग मन सचेत अउ गम्भीर अउ संयमी होए, अउ ओमन कर बिश्वास अउ प्रेम अउ धीरज पक्का होए।

³ एहिच नियर बुड़िया महिला मन कर चाल-चलन पवित्र लोग मन जईसन होए; ओमन दोष लगाए बाला अउ दारु पीए बाला नही, पर बड़िया गोएठ कर सिखाए बाला होए।

⁴ ताकि ओमन जवान महिला मन ला चेतावनी देहत रहे, कि अपन घरदार मन ला अउ लईका-छउवा मन ले प्रेम रखे रहे;

⁵ अउ संयमी, पतिव्रता घर कर कारोबार करे बाला, भली, अउ अपन-अपन घरदार कर अधीन रहे बाली होए, ताकि परमेश्वर कर बचन कर निन्दा झिन होए पाए।

⁶ एसन ही जवान आदमी मन ला भी समझाए कर कि संयमी होए।

⁷ सबेच गोएठ मन मे अपन आप ला भला बुता मन कर नमूना बना; तोर उपदेश मे सफाई, गंभीरता,

⁸ अउ एसन खराई पाल जाए, कि कोनो हर ओला बुरा झिन कह सके; जेकर ले बिरोधी ला हमन पर कोनो दोष लगाए कर अवसर नी पाए के लज्जित होए।

⁹ कमिया मन ला समझाओ, कि अपन-अपन मालिक कर अधीन रहे, अउ सबेच गोएठ मे ओमन ला खुश रखे, अउ उलट के जवाब झिन देहे;

¹⁰ चोरी चालाकी झिन करे; पर सबेच नियर ले पूरा बिश्वासी हिकले, कि ओमन सबेच गोएठ मे हमर उद्धारकर्ता परमेश्वर कर उपदेश कर शोभा बड़हाए।

¹¹ काबर कि परमेश्वर कर ओ अनुग्रह परगट है, जे सबेच लोग मन कर उद्धार कर कारन है।

¹² अउ हमन ला चेतावनी देथे, कि हमन अभक्ति अउ सांसारिक अभिलाषा मन ले मन फिराए के ये युग मे संयमी अउ धर्म अउ भक्ति ले जीवन बिताए;

¹³ अउ ओ धन्य आसरा कर मने कि अपन महान परमेश्वर अउ उद्धारकर्ता यीशु मसीह कर महिमा कर परगट होए कर बाट जोहत रहब।

¹⁴ जेहर अपन आप ला हमर बर दे देहिस, कि हमन हर नियर कर अधर्म ले छोड़ाए लेहे, अउ शुद्ध कईर के अपन बर एक एसन जाएत बनाए लेहे जेहर भला-भला बुता करे मे तियार रहा।

¹⁵ पूरा अधिकार कर संग ये गोएठ मन ला कह, अउ समझाव अउ सिखात रह। कोनोच हर तोला तुच्छ झिन समझे पाए।