रोमियो 9 - सरगुजिया बाइबिल

परमेश्वर कर चुनल लोग मन

¹ मैहर मसीह मे सहिच कहथो, मैहर झूठ नी बोलत हो, अउ मोर बिवेक हर भी पवित्र आत्मा मे गवाही देहत आहे

² कि मोला ढेरेच दुख है, अउ मोर मन हर हमेसेच दुखत रहेल,

³ काबर कि मैहर हिया ले चाहत रहे कि अपन भाई मन बर जेमन देह कर भाव ले मोर रिस्तेदार है, अपन मन ही मसीह ले शापित होए जाथे।

⁴ ओमन मन त इस्राएली है, अउ लेपालकपन कर अधिकार अउ महिमा अउ बाचा मन अउ ब्यवस्था अउ उपासना अउ प्रतिज्ञा मन भी ओकरेच है।

⁵ पुरखा मन भी ओकरेच है, अउ मसीह हर भी देह कर भाव ले ओहिच मन ले होईस। सबेच झन कर उपर मे परम दाऊ परमेश्वर हर हमेसेच बर धन्य है। आमीन।

इस्राएल कर मना करई अउ परमेश्वर कर उदेश्य

⁶ लेकिन ये नी है, कि परमेश्वर कर बचन हर टईल गईस, एकरे बर कि जेमन इस्राएल कर बंश ले है, ओमन सबेच झन मन इस्राएली नी है;

⁷ अउ न अब्राहम कर बंश होए कर कारन सबेच ओकर संतान ठहरही, लेकिन (लिखल आहे) “इसहाक ही ले तोर बंश कहलाही।”

⁸ मने कि देह कर संतान परमेश्वर कर संतान नी है, लेकिन प्रतिज्ञा कर संतान बंश गिनल जाथे।

⁹ काबर कि प्रतिज्ञा कर बचन ये है, “मैहर ओ समय कर अनुसार आहू, अउ सारा कर बेटा होही।”

¹⁰ अउ केबल एहिच नही, लेकिन जब रिबिका हर भी एक ले मने कि हमर दाऊ इसहाक ले गर्भवती रहिस,

¹¹ अउ अब तक ले न त लईका हर जनमे रहिस, अउ न ओमन मन कुछ भला या बुरा करे रहिन; एकरे बर कि परमेश्वर कर मनसा जेहर ओकर चुईन लेहे कर अनुसार है, बड़िया बुता मन कर कारन नी है लेकिन बुलाए बाला कर कारन है, बनल रहथे:

¹² ओहर कहिस, “बड़खा हर छोटे कर कमिया होही।”

¹³ जईसन लिखल आहे, “मैहर याकूब ले प्रेम करे, लेकिन एसाव ला प्रेम नी करे।”

इस्राएली मन मना करई अउ परमेश्वर कर न्याय

¹⁴ एकरे बर हमन मन का कही? का परमेश्वर के हिया अन्याय है? कभो नही।

¹⁵ काबर कि ओहर मूसा ले कहथे, “मैहर जे कोनो पर दया करे बर चाहु ओकर पर दया करहू, अउ जेकर पर किरपा करे बर चाहु ओकरेच पर किरपा करहू।”

¹⁶ तले ये न त चाहे बाला कर, न कूदे बाला कर लेकिन दया करे बाला परमेश्वर कर गोएठ है।

¹⁷ काबर कि पवित्रशास्त्र मे फिरोन ले कहल गईस, “मैहर तोला एकरे बर खड़ा करवाए हो कि तोर मे अपन सामर्थ्य ला देखाओ, अउ मोर नाव कर प्रचार सबेच पृथ्वी पर होए।”

¹⁸ एकरे बर ओहर जेकर पर चाहथे ओकर पर दया ला करथे, अउ जेला चाहथे ओला कठोर कईर देथे।

¹⁹ “तले तय मोर ले कहबे, ओहर फिर काबर दोष लगाथे? कोन हर ओकर सामना करथे?”

²⁰ हे मैनसे, भला तय कोन हस जेहर परमेश्वर कर सामना करथस? का बनाल हर चीज हर बनाएदार ला कुछ कह सकथे, “तय हर मोला काबर एकस बनाए हस?”

²¹ का कुमहार ला माटी पर अधिकार नी है कि एक ठे लोदा मे ले एक भाड़ा आदर बर, अउ दूसर ला अनादर बर बनाही?

²² त एमे कोन सा अकचकाए कर गोएठ है कि परमेश्वर हर अपन गुस्सा ला दिखाए बर अउ अपन सामर्थ्य ला परगट करे कर इक्छा ले गुस्सा कर भाड़ा, जेहर बिनाश बर तियार करल गए रहिस, बड़ेच धीरज ले सहिस;

²³ अउ दया कर भाड़ा मन पर, जेमन मन ला ओहर महिमा बर आगू ले तियार करिस, अपन महिमा कर धन ला परगट करे कर इक्छा करिस?

²⁴ मने कि हमन मन पर जेमन मन ला ओहर न केबल यहूदी मन मे ले, बरन दूसर जाएत मन ला भी बुलईन।

²⁵ जेकस ओहर होशे कर पुस्तक मे भी कहथे, “जेमन मन हर मोर प्रजा नी रहिस, ओमन मन ला मैहर अपन प्रजा कहो, अउ जेहर प्रिय नी रहिस, ओला प्रिय कहो।”

²⁶ अउ एकस होही कि जे जगहा मे ओमन मन ले ये कहल गए रहिस कि तुमन मन मोर प्रजा नी हा, ओहिच जगहा मे जीवित परमेश्वर कर संतान कहलाही।

²⁷ अउ यशायाह इस्राएल कर बारे मे पुकाएर के कथे, “चाहे इस्राएल कर लईका मन कर गिनती समुन्दर कर बालू कर बरोबर होही तबो ले ओमन मन ले तनिक बचही।”

²⁸ “काबर कि प्रभु हर अपन बचन ला धरती मे पूरा कईर के, धार्मिकता ले जलदिच ओला सिद्ध करही।”

²⁹ जेकस यशायाह हर आगू ले कहे रहिस, “अगर सेनाओ मन कर प्रभु हमर बर कुछ बंश ला नी छोड़तिस, त हमन मन सदोम के नियर होए जातेन, अउ अमोरा कर नियर ठहरतेन।”

इस्राएली मन कर अभी के स्थिति

³⁰ तले हमन मन का कही? ये कि दूसर जाएत मन हर जेमन धार्मिकता ला नी खोजथे, धार्मिकता ला हासिल करिन, मने कि ओ धार्मिकता कर जेकर बिश्वास ले है,

³¹ लेकिन इस्राएली, जेमन हर धर्म कर ब्यवस्था कर खोज मे रथे ओ ब्यवस्था तक ले नी पहुचे।

³² काकर बर? एकरे बर कि ओमन मन बिश्वास ले नही लेकिन माना करम ले ओकर खोज करथे। ओमन मन ओ ठोकर कर पखना पर ठोकर खईन,

³³ जईसन लिखल आहे, “देखा, मैहर सिय्योन मे एक ठेस लगे कर पखना, अउ ठोकर खाए कर चटाएन रखथो, अउ जे कोनो हर ओकर पर बिश्वास करही ओहर लज्जित नी होही।”