रोमियो 16 - सरगुजिया बाइबिलबहन फीबे कर स्वागत 1 मैहर तुमन मन ले फीबे बर, जेहर हमर बहिन अउ किंख्रिया कर कलीसिया कर सेविका है, बिनती करथो 2 कि तुमन मन, जईसन कि पवित्र मैनसे मन ला चाही, कि ओला प्रभु मे गरहन करा; अउ जे कोनो गोएठ मे ओके ला तुमन मन कर जरूरत होही, ओकर सहायता करा, काबर कि ओहर भी ढेरेच झन मन कर बरन मोर भी उपकार करे बाला रहिस है। रोम कर संत मन ला स्वागत 3 प्रिस्किल्ला अउ अक्विला ला जेमन मन मसीह यीशु मे मोर संग बुता करत है, नमस्कार। 4 ओमन मन मोर प्रान बर अपन ही जीवन ला खतरा मे डाएल देहे रहिन; अउ केबल मैहर ही नही, बरन दूसर जाएत मन कर सबेच कलीसिया मन भी ओमन मन कर धन्यवाद करथे। 5 ओ कलीसिया ला भी नमस्कार जेमन मन ओमन मन कर घर मे है। मोर प्रिय इपैनितुस ला, जेहर मसीह बर एसिया देश कर पहिला फर है, नमस्कार। 6 मरियम ला, जेहर तुमन मन बर ढेरेच मेहनत करिस है, नमस्कार। 7 अन्द्रुनीकुस अउ यूनियास ला जेहर मोर रिस्तेदार है, अउ मोर संग कैद होए रहिन अउ प्रेरित मन कर नावदार है, अउ मोर ले आगू मसीह होए रहिन, नमस्कार। 8 अम्पलियातुस ला, जेहर प्रभु मे मोर प्रिय है, नमस्कार। 9 उरबानुस ला, जेहर मसीह मे हमर सहकर्मी है, अउ मोर प्रिय इस्तखुस ला नमस्कार। 10 अपिल्लेस ला जेहर मसीह मे खरा हिकलिस, नमस्कार। अरिस्तुबुलुस कर घराना मन ला नमस्कार। 11 मोर रिस्तेदार हेरोदियास ला नमस्कार। नरकिस्सुस कर घराना जे मैनसे मन प्रभु मे है, ओमन मन ला नमस्कार। 12 त्रूफैना अउ त्रूफोसा ला जे प्रभु मे मेहनत करथे, नमस्कार। प्रिय पिरसिस ला, जेहर प्रभु मे ढेरेच मेहनत करिस, नमस्कार। 13 रूफुस ला जेहर प्रभु मे चुनल आहे अउ ओकर दाई ला, जेहर मोर भी दाई है, दोनोच ला नमस्कार। 14 असुंक्रितुस अउ फिलगोन अउ हिर्मेस अउ पत्रुबास अउ हिर्मास अउ ओमन मन के संग कर भाई मन ला नमस्कार। 15 फिलुलुगुस अउ यूलिया अउ नेर्युस अउ ओकर बहिन, अउ उलुम्पास अउ ओमन मन कर संग कर सबेच पवित्र मैनसे मन ला नमस्कार। 16 अपन मे पवित्र चुम्बन ले नमस्कार करा। तुमन मन ला मसीह कर सबेच कलीसिया मन कती ले नमस्कार। बिभाजन कारी लोग मन कर त्याग 17 अब हे भाई मन, मैहर तुमन मन ले बिनती करथो, कि जे मैनसे मन ओ शिक्षा ले अलग है, जेला तुमन मन पाए हा, फुट डालही अउ ठोकर खिलाए कर कारन होही, त ओमन मन ला जांच लेहल करा अउ ओमन मन ले दुरिहा रहा। 18 काबर कि एकस मैनसे मन हमर प्रभु मसीह कती कर नी है, लेकिन अपन पेट कर सेवा करथे; अउ चिकन-चाकन गोएठ मन ले सीधा-साधा मन कर मैनसे मन ला बहकाए देथे। 19 तुमन मन कर हुकूम माने कर चर्चा सबेच मैनसे मन मे बगेर गिस है, एकरे बर मैहर तुमन मन कर बिषय मे आनन्द करथो, लेकिन मैहर ये चाहथो कि तुमन मन भलाई बर बुईधमान लेकिन बुराई बर भोला बने रहा। 20 शान्ति कर परमेश्वर हर शैतान ला तुमन मन कर गोड़ ले जलदिच कुचलवाए देही। हमर प्रभु यीशु मसीह कर अनुग्रह हर तुमन सबेच झन पर होवत रहे। पौलुस कर संगता मन कर स्वागत 21 मोर सहकर्मी तीमुथियुस कर, अउ मोर रिस्तेदार मन लूकियुस अउ यासेन अउ सोसिपत्रुस कर तुमन मन ला नमस्कार। 22 मोर पत्री कर लिखे बाला तिरतियुस कर, प्रभु मे तुमन मन ला नमस्कार। 23 गयुस जेहर मोर अउ कलीसिया कर पहुना करे बाला है, ओकर तुमन मन ला नमस्कार। इरास्तुस जेहर शहर कर भण्डारी है, अउ भाई क्वारतुस कर तुमन मन ला नमस्कार। 24 हमर प्रभु यीशु मसीह कर अनुग्रह तुमन सबेच झन पर होवत रहे। आशीर्वाद 25 अब जेहर तुमन मन ला मोर सुसमाचार मने कि यीशु मसीह कर संदेश कर प्रचार के अनुसार स्थिर कईर सकथे, ओ भेद कर प्रकाश के अनुसार जेहर सनातन ले छिपल रहिस, 26 लेकिन अब परगट होए के सनातन परमेश्वर कर हुकूम ले अगमजानी मन कर पुस्तक मन कर द्वारा सबेच जाएत मन ला बताल गईस है कि ओमन मन बिश्वास कर हुकूम माने बाला होए जाही, 27 ओहिच एक मात्र सनातन बुईधमान परमेश्वर के यीशु मसीह कर द्वारा युगानुयुग महिमा होवत रहे। आमीन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation