रोमियो 13 - सरगुजिया बाइबिलशासन कर अधीन मे रहा 1 सबेच लोग मन सरकारी अधिकारी मन कर अधीन रहा; काबर कि कोनो अधिकार एकस नी है, जेहर परमेश्वर कती ले नी होईस है; अउ जे अधिकार है, ओमन मन परमेश्वर कर ठहराल है। 2 एकरे बर जे कोनो हर अधिकार कर बिरोध करथे, ओहर परमेश्वर कर नियम कर बिरोध करथे, अउ बिरोध करे बाला हर सजा पाही। 3 काबर कि अधिकारी मन हर बड़िहा बुता नी करे, लेकिन बुरा बुता कर डर कर कारन है; का तय अगर अधिकारी ले निडर होए के रहे बर चाहथस, त बड़िया बुता कर, अउ प्रभु यीशु मसीह कती ले तोर सराहना होही; 4 काबर कि ओमन मन हर तोर भलाई बर परमेश्वर कर सेवक है। लेकिन अगर तुमन मन बुराई करिहा त डर; काबर कि ओहर तलवार बेकार मे लेहल नी है अउ परमेश्वर कर सेवक है; कि ओकर गुस्सा कर अनुसार बुरा बुता करे बाला मन ला सजा देही। 5 एकरे बर अधीन रईहा न केबल ओकर गुस्सा कर डर ले जरूरेच है, बरन बिवेक हर भी एहिच कस गवाही देथे। 6 एकरे बर मलगुजारी भी देवा, काबर कि शासन करे बाला मन परमेश्वर कर कमिया है, अउ हमेसेच एहिच बुता मे लगल रहथे। 7 एकरे बर एक झन कर हक देहल करा; जेला मलगुजारी चाही, ओला मलगुजारी देवा; जेला महसूल चाही, ओला महसूल देवा; जेकर ले डरे बर चाही, ओकर ले डरा; जेकर आदर करे बर चाही, ओकर आदर करा। परोसी ले प्रेम करा 8 अपन मे प्रेम ला छोएड़ के अउ कोनो गोएठ मे काकरो करजदार झिन होईहा; काबर कि जेहर दूसर ले प्रेम रखथे, ओहिच हर ब्यवस्था ला पूरा करिस है। 9 काबर कि ये कि “ब्यभिचार झिन करिहा, हत्या झिन करिहा, चोरी झिन करिहा, लालच झिन करिहा,” अउ एमन मन ला छोएड़ के कोनो भी हुकूम है त सबेच कर साराश ये गोएठ मे पाए जाथे, “अपन परोसी मन ले अपन नियर प्रेम रखा।” 10 प्रेम हर परोसी कर कुछ बुराई नी करथे, एकरे बर प्रेम रखे ले ब्यवस्था ला पूरा करई है। मसीह ला पहिन लेहई 11 अउ समय ला पहिचाएन के एहिच कस करा, एकरे बर कि अब तुमन मन ला नींद ले जाएग उठे कर घरी आए पहुचिस है; काबर कि जे समय हमन मन बिश्वास करे रहेन, ओ समय कर बिचार ले अझे हमर उद्धार लिघे है। 12 राएत हर ढेरेच बीत गईस है, अउ बेर उगे बर है; एकरे बर हमन मन अंधार कर बुता ला छोएड़ के इंजोर कर हथियार मन ला बाएध लेई। 13 जेकस दिन मे शोभा देथे, ओहिच कस हमन मन सीधा चाल चलब, न कि लीलाक्रीड़ा अउ पिएक्कड़पन मे, न ब्यभिचार अउ लुचपन मे, अउ न झगरा अउ ईर्ष्या मे। 14 बरन कि यीशु मसीह ला पहिचाएन ला, अउ देह कर लालसा मन ला पूरा करे कर उपाए झिन करा। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation