परकासितवाक्य 7 - सरगुजिया बाइबिल

एक खाली जगहा

¹ एकर पाछू मैहर पृथ्वी कर चाएरो कोना मे चार स्वर्गदूत मन ला ठड़होल देखे, ओमन मन पृथ्वी कर चाएरो हवा मन ला थामे रहिन ताकि पृथ्वी या समुन्दर या कोनो रूख मे हवा झिन चले।

² फिर मैहर एक अउ स्वर्गदूत ला जीवित परमेश्वर कर मुहर लेहल, पूरब ले उपर कती आत देखे; ओहर ओ चाएरो स्वर्गदूत मन ले जेमन मन ला पृथ्वी अउ समुन्दर कर हानी करे कर अधिकार देहल गए रहिस, ऊचा शब्द ले पुकाएर के कहिस,

³ “जब तक हमन अपन परमेश्वर कर कमिया मन कर माथा मे मुहर नी लगाए देहब, तब ले पृथ्वी अउ समुन्दर अउ रूख मन कर हानी झिन पहुचईहा।”

इस्राएल के एक लाख चवालीस हजार लोग मन

⁴ अउ जेमन पर मुहर देहल गईस, मैहर ओमन कर गिनती ला सुने, मने कि इस्राएल कर संतान मन कर सबेच गोत्र मन मे ले एक लाख चवालीस हजार मे मुहर देहल गईस:

⁵ यहूदा कर गोत्र मे ले बारह हजार पर मुहर देहल गईस, रुबेन कर गोत्र मे ले बारह हजार मे, गाद कर गोत्र मे ले बारह हजार मे,

⁶ आशेर कर गोत्र मे ले बारह हजार मे, नपतली कर गोत्र मे ले बारह हजार मे; मनश्शिह कर गोत्र मे ले बारह हजार मे,

⁷ शमौन कर गोत्र मे ले बारह हजार मे, लेवी मन कर गोत्र मे ले बारह मे, इस्साकार कर गोत्र मे ले बारह हजार मे,

⁸ जबूलून कर गोत्र मे ले बारह हजार मे, यूसुफ कर गोत्र मे ले बारह हजार मे, अउ बिन्यामीन कर गोत्र मे ले बारह हजार मे मुहर दे देहल गईस।

क्लेश ले एक बड़खा भीड़

⁹ एकर पाछू मैहर नजर करे, अउ सबेच एक जाएत, अउ कुल, अउ लोग, अउ भाषा मे ले एक एसन बड़खा झुन्ड, जेला कोनोच हर गिन नी सकत रहिस, उज्जर कपरा पहिरल अउ अपन हाथ मे खजूर कर डार लेहल सिंहासन कर आगू अउ मेमना कर आगू ठड़होईस हे;

¹⁰ अउ बड़खा शब्द ले पुकाएर के कहथे, “उद्धार बर हमर परमेश्वर कर, जेहर सिंहासन मे बईठिस आहे, अउ मेमना कर जय जयकार होए।”

¹¹ अउ सबेच स्वर्गदूत मन, ओ सिंहासन अउ प्राचीन मन कर चाएरो प्रानी मन कर चाएरो कती ठड़होईस हे, फिर ओहर सिंहासन कर आगू मे मुह के बल गिर पड़िस अउ परमेश्वर ला जोहार कईर के कहिस,

¹² “आमीन, हमर परमेश्वर कर स्तुति, अउ महिमा, अउ ज्ञान, अउ धन्यवाद, अउ आदर, अउ सामर्थ, अउ शक्ति हमेसेच बनल रही। आमीन।”

¹³ एकर मे प्राचीन मन मे ले एक हर मोर ले कहिस, “ये उज्जर कपरा ला पहिरल कोन हे? अउ कहा ले अईस हे?”

¹⁴ मैहर ओकर ले कहे, “हे मालिक, तय ही जानथस।” ओहर मोर ले कहिस, “एमन मन ओमन है, जेमन ओ महाक्लेश मे ले हिकेल के अईन है; एमन हर अपन-अपन कपरा मन ला मेमना कर लहू मे धोए के उज्जर करिन हे।”

¹⁵ “एहिच कारन ओमन परमेश्वर के सिंहासन कर आगू है, अउ ओकर मन्दिर मे दिन-राएत ओकर सेवा करथे; अउ जेहर सिंहासन मे बईठिन हे, ओहर ओमन कर उपर अपन झाला ला तानही।

¹⁶ ओमन मन फिर भूखा अउ पियासा नी होही; अउ न ओमन मे घाम, न कोनो हर तपे ले पड़ही।

¹⁷ काबर कि मेमना जेहर सिंहासन कर मांझा मे हे, ओमन कर रखबाली करही; अउ ओमन ला जीवन रूपी पानी कर स्रोता मन कर लिघे ले जाही, अउ परमेश्वर ओमन कर आएख ले सबेच आसू ला पोएछ देही।”