परकासितवाक्य 4 - सरगुजिया बाइबिल

स्वर्ग कर सुन्दरता

¹ ये गोएठ कर पाछू मे जेला मैहर नजर करे, त का देखथो कि स्वर्ग मे एक दूरा हर खुलल आहे; अउ जेला मैहर आगू तुरही नियर शब्द ले अपन संग मे गोठियात सुने रहे, ओहिच हर कहथे, “हिया उपर आए जा, अउ मैहर ओ गोएठ के तोला दिखाहू, जेमन कर ये गोएठ कर पाछू पूरा होए बर जरूरेच हे।”

² तुरतेच मैहर आत्मा मे आए गए; अउ का देखथो कि एक सिंहासन हर स्वर्ग मे रखाल है, अउ ओ सिंहासन मे कोनो मन बईठिन हे।

³ अउ जेहर ओमे बैठिस हे, ओहर यशब अउ मानिक नियर दिखाई देथे, अउ ओ सिंहासन कर चाएरो कती मरकत नियर एक बड़खा कर इन्द्रधनुष दिखाई देथे।

⁴ ओ सिंहासन कर चाएरो कती चवबीस सिंहासन हे; अउ ये सिंहासन मन मे चवबीस प्राचीन हर उज्जर कपरा पहिरल बईठिन हे, अउ ओमन कर मूड़ मे सोना कर मुकूट आहे।

स्वर्ग मे अराधना

⁵ ओ सिंहासन मे ले बिजली मन अउ गरजन हिकलथे, अउ सिंहासन कर आगू मे आगी कर सात दीया जलत रहिस, ओहर परमेश्वर कर सात आत्मा हर है,

⁶ अउ ओ सिंहासन कर आगू मे मानो बिल्लौर नियर काच कर समुन्दर आहे, सिंहासन कर मांझा मे अउ सिंहासन कर चाएरो कती चार प्रानी हे, जेमन कर आगू पाछू आएख ही आएख हे।

⁷ आगू कर प्रानी सिंह कर नियर हे, अउ दूसरा प्रानी बछरू कर नियर हे, तीसरा प्रानी कर मुह आदमी नियर हे, अउ चवथा प्रानी उड़त उकाब नियर है।

⁸ अउ चाएरो प्रानी मन कर छव-छव पाएख है, अउ चाएरो कती, भीतरी आएख ही आएख है; अउ ओहर राएत दिन, बिन अराम करे ये कहत रहथे, “पवित्र, पवित्र, पवित्र, प्रभु परमेश्वर, सर्वशक्तिमान, जेहर रहिस, अउ जेहर है, अउ जेहर आए बाला है।”

⁹ जब ओ प्रानी ओकर जेकर सिंहासन मे बईठिस हे, अउ जेहर युगानुयुग जीवता हे, महिमा अउ आदर अउ धन्यवाद करही।

¹⁰ तब चवबीस मन प्राचीन कर सिंहासन मे बईठे बाला कर आगू मे गिर पड़ही, अउ ओला जेहर युगानुयुग जीविता हे, जोहारही; अउ ओहर अपन-अपन मुकूट ला सिंहासन कर आगू मे ये कहत डाएल देही,

¹¹ “हे हमर प्रभु, अउ परमेश्वर, तय ही महिमा, अउ आदर, अउ सामर्थ कर योग्य है; काबर कि तय ही सबेच चीज मन ला सिरजे अउ तोर ही इक्छा ले ओहर पहिचान मे रहिस अउ सिरजल गईस।”