परकासितवाक्य 3 - सरगुजिया बाइबिल

सरदीस हर मरल कलीसिया

¹ सरदीस कर कलीसिया कर स्वर्गदूत ला ये लिख, “जेकर लिघे परमेश्वर कर सात आत्मा मन अउ सात तरई मन आहे, ओहर ये कहथे कि मैहर तोर बुता मन ला जानथो, तय हर जीवित त कहलाथस, पर हस मरल।

² जागत रहा, अउ ओ चीज मन ला जेहर बाचल रह गईस है, अउ जेहर मिटे बर हे, ओमन ला मजबूत करा; काबर कि मैहर तोर कोनो बुता मन ला अपन परमेश्वर कर लिघे पूरा नी पाए।

³ एकरे बर याद कर, कि तय हर कईसन रीति ले शिक्षा ला पाए अउ सुने रहे, अउ ओमे बने रह, अउ मन फिराव: अउ अगर तुमन हर जागत नी रहबे त मैहर चोर नियर आए जाहू। अउ तय हर कभो नी जाएन सकबे, कि मैहर कोन घरी तोर पर आए पड़हु।

⁴ पर हव, सरदीस मे तोर ये कुछ एसन मैनसे मन हे, जेमन हर अपन-अपन कपरा ला अशुद्ध नी करिन, ओमन उज्जर कपरा पहिरल मोर संग मे घुमही, काबर कि ओमन मन एकर लाएक है।

⁵ जेहर जय पाही, ओला एहिच नियर उज्जर कपरा पहिनाल जाही, अउ मैहर ओकर नाव ला जीवन कर पुस्तक मे ले कोनो रीति ले नी काटहू, पर ओकर नाव ला अपन दाऊ अउ ओकर स्वर्गदूत मन कर आगू माएन लेहू।

⁶ जेकर कान हे, ओहर सुईन लेहे कि पवित्र आत्मा हर कलीसिया मन ले का कहथे।”

फिलदिलफिया हर बिश्वास लाएक कलीसिया

⁷ फिलदिलफिया के कलीसिया कर स्वर्गदूत ला ये लिख, “जेमन पवित्र अउ सत्य हे, अउ जेहर दाऊद कर कुंजी ला रखथे, जेकर खोलल ला कोनोच हर बन्द नी कईर सकथे, अउ बंद करल ला कोनोच हर नी खोएल सकथे, ओहर ये कहथे,

⁸ मैहर तोर बुता मन ला जानथो। देखा, मैहर तोर आगू मे एक दूरा ला खोएल रखे हो, जेला कोनोच हर बंद नी कईर सकथे; तोर सामर्थ तनिक अकुन त आहे, फिर भी तय हर मोर बचन कर पालन करे हस, अउ मोर नाव कर इनकार नी करे।

⁹ देखा, मैहर शैतान कर ओ झुन्ड बाला मन ला तोर बश मे कईर देहू जेमन यहूदी बईन बईठिन है, पर है नही, बरन झूठ बोलथे, देखा, मैहर एकस करहू कि ओमन आए के तोर गोड़ मे गिरही, अउ एला जाएन लेही, कि मैहर तोर ले प्रेम रखे हो।

¹⁰ तय हर मोर धीरज कर बचन ला थामे हस, एकरे बर मैहर भी तोला परीक्षा कर समय मे बचाए रखहू, जेमन जगत मे रहे बाला मन कर परखे बर सबेच पृथ्वी मे आए बाला है।

¹¹ मैहर जलदिच आए बाला हो; जे कुछ हर तोर जग है ओला थामे रह, कि कोनोच हर तोर मुकूट ला लुईट झिन लेही।

¹² जेहर जय पाही, ओला मैहर अपन परमेश्वर कर मन्दिर मे एक खुटा बनाहु; अउ ओहर कभो बाहर नी हिकलही; अउ मैहर अपन परमेश्वर कर नाव अउ अपन परमेश्वर कर नगर मने कि नावा यरूशलेम कर नाव, जेहर मोर परमेश्वर कर लिघे ले स्वर्ग मे ले उतरे बाला हे, अउ अपन नावा नाव ओमे लिखहू।

¹³ जेकर कान हे, ओहर सुईन लेहे कि पवित्र आत्मा हर कलीसिया मन ले का कहथे।”

लौदीकिया हर गुनगुना कलीसिया

¹⁴ लौदीकिया के कलीसिया कर स्वर्गदूत ला ये लिख, “जेहर आमीन, अउ बिश्वास योग्य, अउ सहिच गवाह है, अउ परमेश्वर के सृष्टि कर मूल कारन है, ओहर ये कहथे:

¹⁵ मैहर तोर बुता मन ला जानथो कि तय हर न त ठण्डा हस अउ न गरम; भला होतीस कि तय हर ठण्डा या गरम होथे।

¹⁶ एकरे बर कि तय हर गुनगुना हस, अउ ना ठण्डा हस अउ न गरम, मैहर तोला अपन मुह मे ले उगले बर हो।

¹⁷ तय कहथस, कि मैहर धनी हो, अउ धनवान होए गए हो, अउ मोला कोनोच चीज मन कर कमी नी हे, अउ ये नी जानथस, कि तय हर अभागा अउ तुच्छ अउ कंगाल अउ अंधा, अउ नंगा हस,

¹⁸ एकरे बर मैहर तोला सलाह देहथो, कि आगी मे ताल सोना मोर ले खरीद ले, कि तय हर धनी होए जाबे; अउ उज्जर कपरा ले ले कि पहिर के तोला अपन नंगापन कर लाज नी होही; अउ अपन आएख मे लगाए बर सुरमा ले ले, कि तय देखे बर लगबे।

¹⁹ मैहर जेमन-जेमन ले प्रेम करथो, ओमन सबेच झन मन ला उलाहना अउ ताड़ना देथो; एकरे बर सरगरम हो, अउ मन फिरावा।

²⁰ देखा, मैहर दूरा मे ठड़होए के खटखटाथो; अगर कोनोच मन मोर अवाज ला सुईन के दूरा ला खोलही, त मैहर ओकर लिघे भीतरी कती आए के संग मे भात खाहु। अउ ओहर मोर संग मे।

²¹ जेहर जय पाही, मैहर ओला अपन संग अपन सिंहासन मे बईठाहू, जेकस मैहर भी जय पाए के अपन दाऊ कर संग मे ओकर सिंहासन मे बईठ गए हो।

²² जेकर कान हे, ओहर सुईन ले कि पवित्र आत्मा हर कलीसिया मन ले का कहथे।”