परकासितवाक्य 20 - सरगुजिया बाइबिलशैतान ला एक हजार साल बर अथाह कुण्ड मे डलई 1 फिर मैहर एक स्वर्गदूत ला स्वर्ग ले उतरत देखे; जेमन कर हाथ मे अथाह कुण्ड कर कुंजी, अउ एक बड़खा जंजीर रहिस। 2 अउ ओहर ओ अजगर, मने कि जूनहा साप ला, जेहर इबलिस अउ शैतान है; पकेड़ कर हजार बरस बर बाध देहिस, 3 अउ ओला अथाह कुण्ड मे डायल के बन्द कईर देहिस, अउ ओकर मे मुहर लगाए देहिस कि ओहर हजार बरस कर पूरा होए तक जाएत-जाएत कर मैनसे मन ला फिर नी भरमाही। एकर पाछू जरूरेच है, कि ओला तनिक देर बर फिरेच खोलल जाही। मसीह कर संग एक हजार साल तक राएज करई 4 फिर मैहर सिंहासन ला देखे, अउ ओमन मे मैनसे मन हर बईठ गईन, अउ ओमन ला न्याय करे कर अधिकार देहल गईस है। मैहर ओमन कर आत्मा मन ला भी देखे, जेमन कर मूड़ हर यीशु कर गवाही देहे अउ परमेश्वर के बचन कर कारन काटल गए रहिस, अउ जेमन हर न ओ जानवर कर, अउ न ओकर मूरती कर पूजा करथे, अउ न ओकर छाप ला अपन माथा मे अउ हाथ मे लेहे रहिस। ओमन मन हर जीवित होए के मसीह कर संग मे हजार बरस तक ले राएज करत रहिन। 5 जब तक ले ये हजार बरस पूरा नी होए गईस, तब तक ले बाचल मरल मन भी जी उठही। ये हर त पहिला पुनरुत्थान हे। 6 धन्य अउ पवित्र ओहर हे, जेमन ये पहिला पुनरुत्थान कर हिस्सा हे, एसन मन ले दूसरा मरे कर कुछूच भी अधिकार नी है, पर ओहर परमेश्वर अउ मसीह कर याजक होही, अउ ओमन कर संग मे हजार बरस तक राएज करही। शैतान कर बिनाश 7 जब हजार बरस हर पूरा होए जाही त शैतान ला कैद ले छोएड़ देहल जाही। 8 ओहर ओ जाएत मन ला जेमन पृथ्वी कर चाएरो कती होही, मने कि गोग अउ मागोग कर जेमन कर गिनती समुन्दर कर रेती कर बरोबर होही, भरमाए कर झगरा बर जमा करे बर हिकलही। 9 ओमन सबेच पृथ्वी मे फईल के पवित्र मैनसे मन कर छावनी अउ प्रिय नगर ला घेर लेही, अउ आगी हर स्वर्ग ले उतेर के ओमन ला भष्म करही। 10 ओमन कर भरमाए बाला शैतान हर आगी अउ गन्धरक ले ओ झील मे, जेमन मे वो जानवर अउ झूठा अगमजानी भी होही, डायल देहल जाही; अउ ओहर राएत-दिन युगयुग कर दुख मे तड़पत रही। उज्जर बड़खा सिंहासन अउ आखरी न्याय 11 फिर मैहर एक बड़खा उज्जर सिंहासन अउ ओमन ला जेहर ओमन मे बईठल रहिस, देखे; ओकर आगू ले पृथ्वी अउ अकाश हर भाएग गईस, अउ ओमन बर जगहा नी मिलिस। 12 फिर मैहर नान बड़खा सबेच मरल मन ला सिंहासन कर आगू मे ठड़होल देखे, अउ पुस्तक खोलल गईस; अउ फिर एक अउ पुस्तक खोलल गईस मने कि जीवन कर पुस्तक; अउ जईसन ओ पुस्तक मे लिखल रहिस ओहिच कस ओमन कर बुता मन कर अनुसार मरल मन कर न्याय करल गईस। 13 अउ समुन्दर हर ओ मरल मन ला जेहर ओमन मे रहिन दे देहिस, अउ मृत्यु अउ अधोलोक हर ओ मरल मन ला जेमन हर ओमन मे रहिन दे देहिस; अउ ओमन मे ले हर एक झन कर बुता मन कर अनुसार ओमन कर न्याय करल गईस। 14 मृत्यु अउ अधोलोक हर आगी कर झील मे डालल गईन। ये आगी कर झील हर दूसरा मृत्यु है। 15 अउ जे कोनो कर नाव हर जीवन कर पुस्तक मे लिखल, नी मिलिस, ओला भी आगी कर झील मे डालल गईस। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation