परकासितवाक्य 2 - सरगुजिया बाइबिल

इफिसुस बिना प्रेम कर कलीसिया

¹ इफिसुस के कलीसिया कर स्वर्गदूत ला ये लिख, जेहर सात तरई मन ला अपन जेवनी हाथ मे लेहल हे, अउ सोना कर सातो दीवट मन कर मांझा मे फिरथे, ओहर ये कहथे,

² “मैहर तोर बुता, अउ तोर मेहनत, अउ तोर धीरज ला जानथो; अउ एला भी कि तुमन हर बुरा लोग मन ला देख नी सकथस; अउ जेहर अपन आप ला प्रेरित कहथे, अउ है नही, ओमन मन तुमन ला परेख के झूठा पाईन हे।

³ तुमन हर धीरज धरथा, अउ मोर नाव बर दुख उठात-उठात नी थकथा।

⁴ पर मोला तोर बिरोध मे ये कहे बर है, कि तुमन हर अपन पहिला सा प्रेम ला छोएड़ देहे हा।

⁵ एकरे बर याद करा, कि तुमन हर कहा ले गिरे हा, अउ मन फिरावा, अउ आगू कर नियर बुता करा; अगर तुमन हर मन नी फिरईहा, त मैहर तोर लिघे आए के तोर दीवट ला ओकर जगहा ले हटाए देहू।

⁶ पर हा, तुमन मे ये गोएठ त हे, कि तय हर नीकुलई मन कर बुता ले घृना करथस, जेमन ले मैहर भी घृना करथो।

⁷ जेकर कान हे, ओहर सुईन लेहे कि पवित्र आत्मा हर कलीसिया मन ले का कहथे: जेहर जय पाही, मैहर ओला ओ जीवन कर रूख मे ले जेहर परमेश्वर कर स्वर्ग लोक मे है, फर खाए ले देहू।”

स्मुरना सताल कलीसिया

⁸ स्मुरना के कलीसिया कर स्वर्गदूत ला ये लिख, जेहर पहला अउ आखरी हे; जेहर मईर गए रहिस, अउ अब अझे जीवित होए गईस हे, ओहर ये कहथे,

⁹ “मैहर तोर क्लेश अउ दरिद्रता ला जानथो (लेकिन तुमन धनवान हा) अउ जे लोग हर अपन आप ला यहूदी कहथे, अउ है नही, पर शैतान कर झुन्ड है, ओमन कर निन्दा ला भी जानथो।

¹⁰ जे दुख तोला झेले बर होही, ओमन ले झिन डर: काबर कि देखा, शैतान हर तुमन मन ले कुछ झन मन ला जेलखाना मे डाले बर है ताकि तुमन परखल जईहा; अउ तुमन ला दस दिन तक ले क्लेश उठाए बर होही। प्रान देहे तक बिश्वासी रहा; त मैहर तोला जीवन कर मुकूट ला देहू।

¹¹ जेकर कान हे, ओहर सुईन लेहे, कि पवित्र आत्मा कलीसिया मन ले का कहथे: जेहर जय पाही, ओला दूसर मृत्यु ले कोनो हानी नी होही।”

पिरगमुन हर मिलल-जुलल कलीसिया

¹² पिरगमुन के कलीसिया कर स्वर्गदूत ला ये लिख, “जेकर जग दुई धारी अउ तेज तलवार हे, ओहर ये कहथे:

¹³ मैहर एला जानथो कि तुमन हर हुवा रहथस, जहा शैतान कर सिंहासन है; तय हर मोर नाव मे जमे रहथस; अउ मोर मे बिश्वास करे ले ओ दिन मे भी पाछू नी हटे जेमन मे मोर बिश्वास योग्य गवाही अन्तिपास, तुमन कर मांझा मे ओ जगहा मे मारल गईस जहा शैतान हर रहथे।

¹⁴ पर मोला तोर बिरोध मे कुछ गोएठ कहे बर है, काबर कि तोर हिया कुछ मन एसन है, जेमन बिलाम कर शिक्षा ला मानथे, जेहर बालाक ला इस्राएल मन कर आगू ठोकर के कारन रखे बर सिखईस, कि ओमन मूरती मन पर बलि चीज मन ला खाही, अउ ब्यभिचार करही।

¹⁵ ओहिच कस तोर हिया कुछ मन एसन है, जेमन नीकुलई मन कर शिक्षा ला मानथे।

¹⁶ तले मन फिराव, नही त मैहर तोर जग तुरतेच आए के, अपन मुह कर तलवार ले ओमन कर संग लड़हू।

¹⁷ जेकर कान हे, ओहर सुईन लेहे, कि पवित्र आत्मा हर कलीसिया मन ले का कहथे; जेहर जय पाही, ओला मैहर छिपल मन्ना मे ले देहू, अउ ओला एक उजर पखना भी देहू; अउ ओ पखना मे एक नाव लिखल रही, जेला ओकर पाए बाला कर सिवाए अउ कोनो मन नी जानही।”

थुआतीरा कर भ्रष्ट कलीसिया

¹⁸ “थुआतीरा के कलीसिया कर स्वर्गदूत ला ये लिख, परमेश्वर कर बेटा जेकर आएख आगी कर ज्वाला नियर, अउ जेकर गोड़ उत्तम पीतल के नियर है, ओहर ये कहथे:

¹⁹ मैहर तोर बुता मन ला, तोर प्रेम, अउ बिश्वास, अउ सेवा, अउ धीरज ला जानथो, अउ एला भी कि तोर पाछू कर बुता आगू मन ले बईड़ के हे।

²⁰ पर मोला तोर बिरोध मे ये कहे बर है, कि तय ओ महिला इजेबेल ला रहे बर देथस जेहर अपन आप ला अगमजानी कहथे, अउ मोर कमिया मन ला ब्यभिचार करे बर, अउ मूरती मन कर आगू मे बलि करल चीज मन ला खिलाए के अउ भरमाथे।

²¹ मैहर ओला मन फिराए बर मौका देहे, पर ओहर अपन ब्यभिचार ले मन फिराए बर नी चाहे।

²² देखा, मैहर ओला रोग कर खटिया मे डालथो; अउ जेमन ओकर संग मे ब्यभिचार करथे, अगर ओमन हर भी ओकर बुता मन ले मन नी फिराही त मैहर ओमन ला बड़खा क्लेश मे डालहू।

²³ मैहर ओकर लईका मन ला माएर देहू; तब सबेच कलीसिया मन जाएन लेही, कि हृदय कर अउ मन कर परखे बाला मैहर ही हो, अउ मैहर तुमन ले हर एक कर ओकर बुता मन कर अनुसार बदला लेहू।

²⁴ पर तुमन थुआतीरा कर बाचल मैनसे मन ले, जेतेक झन मन ये शिक्षा ला भी नी मानथे, अउ ओ गोएठ मन ला जेमन ला शैतान कर गहिल गोएठ कहथे, नी जानथा, ये कहथो, कि मैहर तुमन पर अउ बोझा नी डालहू।

²⁵ पर हव, जेहर तुमन जग आहे ओला मोर आए तक थामे रहा।

²⁶ जेहर जय पाही, अउ मोर बुता कर अनुसार आखरी ले करत रही, मैहर ओला सबेच जाएत के मैनसे मन पर अधिकार देहू,

²⁷ अउ ओहर लोहा कर राएज दण्ड लेहल ओमन पर राएज करही, जे मंधे कुमहार हर माटी कर भाड़ा मन ला चकना चूर होए जाथे: मैहर भी एहिच कस अधिकार अपन दाऊ ले पाए हो;

²⁸ अउ मैहर ओला भिनसरहा कर तरई ला देहू।

²⁹ जेकर कान हे, ओहर सुईन लेहे, कि पवित्र आत्मा हर कलीसिया मन ले का कहथे।”