परकासितवाक्य 19 - सरगुजिया बाइबिल

स्वर्ग मे परमेश्वर कर स्तुति

¹ एकर पाछू मैहर स्वर्ग मे माना बड़खा झुन्ड ला ऊचा गोएठ ले ये कहत सुने, “हालिलूय्याह! उद्धार, अउ महिमा, अउ सामर्थ हमर परमेश्वर कर ही है।

² काबर कि ओकर निरनय सच्चा अउ बड़िया है, एकरे बर ओहर ओ बड़खा बेश्या ले, जेहर अपन ब्यभिचार ले पृथ्वी ला भ्रष्ट करत रहिस, न्याय करिस, अउ ओमन हर अपन कमिया मन के लहू कर बदला लेहिस है।”

³ फिर दूसर तोर ओमन मन हर कहिन, “हालिलूय्याह! ओकर जरे कर कुहिरा हर युगानुयुग उठत रही।”

⁴ अउ चौबिस प्राचीन मन अउ चाएरो प्रानी मन हर गिर के परमेश्वर ला जोहारिन; जेहर सिंहासन पर बईठे रहिस, “अउ कहिन, आमीन! हालिलूय्याह!”

⁵ अउ सिंहासन मे ले एक शब्द हिकलिस, “हे हमर परमेश्वर ले सबेच झन डरे बाला कमिया मन, का छोटे, का बड़खा; तुमन सबेच झन हर ओकर स्तुति करा।”

⁶ फिर मैहर बड़खा झुन्ड कर एसन अउ ढेरेच पानी कर एसन शब्द, अउ गरजे कस बड़खा गोएठ सुने “हालिलूय्याह! काबर कि प्रभु हर हमर परमेश्वर सर्वशक्तिमान राएज करथे।

⁷ आवा, हमन आनन्दित अउ मगन होवब, अउ ओकर स्तुति करब, काबर कि मेमना कर बियाह हर आए पहुचिस हे, अउ ओकर दुल्हिन हर अपन आप ला तियार कईर लेहिस है।

⁸ ओला शुद्ध अउ चमकदार महीन मलमल पहिरे कर अधिकार देहल गईस है,” काबर कि ओ महीन मलमल कर अर्थ हे, पवित्र मैनसे मन कर धार्मिकता कर बुता मन है।

⁹ तब स्वर्गदूत हर मोर ले कहिस, “ये लिख, कि धन्य ओमन हे, जेमन मेमना कर बियाह कर भोज मे बुलाल गईन है।” फिर ओहर मोर ले कहिस, “ये बचन हर परमेश्वर कर सच्चा बचन है।”

¹⁰ तब मैहर ओला जोहारे बर ओकर गोड़ मे गिर गए। ओहर मोर ले कहिस, “देखा, एसन झिन करा, मैहर तोर अउ तोर भाई मन कर संगी कमिया हो, जेहर यीशु कर गवाही देहे मे स्थिर है। परमेश्वर ला ही जोहार।” काबर कि यीशु कर गवाही अगमजानी कर आत्मा है।

उज्जर घोड़ा मे एक सवारी

¹¹ फिर मैहर स्वर्ग ला खुलल देखे, अउ देखथो कि एक उज्जर घोड़ा है; अउ ओकर मे एक सवारी है, जेहर बिश्वास योग्य, अउ सच्चा कहलाथे; अउ ओहर धार्मिकता कर संग न्याय अउ लड़ाई करथे।

¹² ओमन कर आएख हर आगी कर ज्वाला है, अउ ओकर मूड़ मे ढेरेच अकुन राजमुकुट है। ओमे एक नाव लिखल है, जेला ओमन कर छोएड़ अउ कोनो झन मन नी जानथे।

¹³ ओहर लहू कर छिड़कल कपरा ला पहिरीस हे, अउ ओमन कर नाव “परमेश्वर कर बचन” है।

¹⁴ स्वर्ग कर सेना हर उज्जर घोड़ा मे सवार होए के अउ उज्जर अउ शुद्ध मलमल पहिरल ओमन कर पाछू-पाछू है।

¹⁵ जाएत-जाएत ला मारे बर ओकर मुह ले एक धार दार तलवार हिकलथे। ओहर लोहा कर राजदण्ड लेहल ओमन मे राएज करही, अउ सर्वशक्तिमान परमेश्वर कर भयानक प्रकोप कर जलजलाहट के मदिरा कर कुण्ड मे दाख खुदही।

¹⁶ अउ ओकर कपरा मे अउ जाघ मे ये नाव लिखल है, “राजा मन कर राजा अउ प्रभु मन कर प्रभु है।”

पशु अउ ओकर सेना कर हरई

¹⁷ फिर मैहर एक स्वर्गदूत ला सूरज मे ठड़होल देखे, ओमन हर बड़खा शब्द ले पुकाएर के अकाश कर मांझा मे ले उड़े बाला सबेच चरई मन ले कहिस, “आवा, परमेश्वर कर बड़खा भोज बर जमा होए जावा,

¹⁸ जेकर ले तुमन हर राजा मन कर मांस, अउ सरदार मन कर मांस, अउ शक्तिमान आदमी मन कर मांस, अउ घोड़ा मन कर अउ ओमन कर सवार होवल मन कर मांस, अउ का स्वतंत्र का कमिया, का छोटे का बड़खा, सबेच मैनसे मन कर मांस ला खावा।”

¹⁹ फिर मैहर ओ जानवर, अउ पृथ्वी कर राजा मन कर अउ ओमन कर सेना मन ला ओ घोड़ा कर सवार, अउ ओकर सेना ले लड़े बर जमा देखिस।

²⁰ अउ ओ जानवर, अउ ओकर संग ओ झूठा अगमजानी हर पकड़ाए गईस, जेमन हर ओकर आगू मे एसन चिन्हा दिखाए रहिन, जेमन कर द्वारा ओहर ओमन ला भरमईस, जेकर मे ओ पशु कर छाप रहिस, अउ जेहर ओकर मूरती कर पूजा करत रहिन। ये दुई झन जीते जीयत ओ आगी कर झील मे, जेहर गन्धरक ले जलत रहिस, डालल गईन।

²¹ अउ बाचल मैनसे मन ओ घोड़ा कर सवारी कर तलवार ले, जेहर ओकर मुह ले हिकलत रहिस, माएर देहल गईन; अउ सबेच चरई मन हर ओमन कर मांस ले अघाए गईन।