परकासितवाक्य 17 - सरगुजिया बाइबिल

औरत अउ लाल रंग कर पशु

¹ जे सात स्वर्गदूत मन कर लिघे ओमन सात कटोरा लेहे रहिन, ओमन मन ले एक झन हर आए के मोर ले ये कहिस, “इते आ, मय तोला ओ बड़खा बेश्या कर सजा ला देखाहू, जेहर ढेरेच पानी मे बईठिस हे।

² जेकर संग मे धरती कर राजा मन ब्यभिचार करिन, अउ धरती मे रहे बाला ओकर ब्यभिचार कर मदिरा ले मतवार होए गए रहिन।”

³ तब ओहर मोला आत्मा हर जंगल मे ले गईस, अउ मय लाल रंग कर जानवर मे, जेहर निन्दा कर नाव मन ले भरे रहिस अउ जेकर सात मूड़ अउ दस सींग रहिन, एक महिला ला बईठल देखिस।

⁴ ये महिला हर बैजनी, अउ लाल रंग कर कपरा पहिने रहिस, अउ सोना अउ बहुतेच किमती मनि मन अउ मोती मन ले सजे रहिस, अउ ओकर हाथ मे सोना कर कटोरा रहिस जेहर घृनित चीज मन ले अउ ओकर ब्यभिचार कर अशुद्ध चीज मन ले भरे रहिस।

⁵ ओकर कपार मे ये नाव लिखाए रहिस, “भेद-बड़खा बेबीलोन शहर धरती कर बेश्या मन कर अउ घृनित चीज मन कर दाई।”

⁶ मैहर ओ महिला ला पवित्र मैनसे मन कर लहू अउ यीशु कर गवाह मन कर लहू पीए ले मातल देखे; ओला देख के मैहर चकित होए गए।

औरत अउ पशु के मतलब

⁷ तब ओ स्वर्गदूत हर मोर ले कहिस, “तय काबर अकचकाए गए? मय हर ये महिला अउ ओ जानवर कर, जेकर मे ओ सवार हे, अउ जेकर सात मूड़ अउ दस सींग हे, तोला भेद बताथो।

⁸ जे जानवर ला तय हर देखे रहे, ओहर आगू त रहिस अब नी हे, अउ अथाह कुण्ड ले हिकेल के बिनाश मे पड़ही, अउ पृथ्वी कर रहे बाला जेमन कर नाव पृथ्वी के बनाए कर समय ले जीवन कर पुस्तक मे लिखल नी गईस, ये पशु कर ये दशा ला देख के कि आगू रहिस, अउ अब नी है; अउ फिर ले आए जाही अचम्भा करही।

⁹ एला समझे बर ज्ञानी लोग मन कर आवश्यक हे: ओ सातोच मूड़ सात पहार है, जेमन मे ओ महिला हर बईठिस है।

¹⁰ ओमन सात राजा भी है, पाच त होए दारिन हे, अउ एगोठ हर अभी भी हे, अउ एक झन अभी ले नी अईस हे, अउ जब आही त कुछ समय ले ओकर रहई भी जरूरेच है।

¹¹ जे जानवर आगू रहिस, अउ अब ले भी नी है, ओहर अपनेच आठवा है; अउ ओ सातोच मन मे ले उत्पन्न होईस, अउ बिनाश मे पड़ही।

¹² जे दस सींग तय हर देखे ओमन हर दस राजा है; जेमन मन अब ले राएज ला नी पईन हे, लेकिन ओ जानवर कर संग तनिक समय बर राजा मन नियर अधिकार पाही।

¹³ एमन सबेच झन एक मन होही, अउ ओमन अपन-अपन सामर्थ अउ अधिकार ओ जानवर ला देही।

मेमना कर जीतई

¹⁴ ओमन मेमना संग लड़ही, अउ मेमना हर ओमन ले जीतही; काबर कि ओहर प्रभु मन कर प्रभु, अउ राजा मन कर राजा है, अउ जेमन बुलाल गईन, अउ चुनल मन अउ बिश्वास लाएक है, ओकर संग है, ओमन मन भी जय पाही।”

¹⁵ फिर ओहर मोर ले कहिस, “जे पानी तय हर देखे, जेकर मे बेश्या बईठिस हे, ओमन त लोग, अउ झुन्ड, अउ जाएत मन, अउ भाषा मन हे।

¹⁶ जे दस सींग तय हर देखे हस, ओमन अउ जानवर अउ ओ बेश्या ले बैर रखही, अउ ओला लाचार अउ नंगरी कर देही; अउ ओकर मांस खाए जाही, अउ ओला आगी मे जलाए देही।

¹⁷ काबर कि परमेश्वर ओमन कर मन मे ये डालही कि ओमन ओकर इक्छा ला पूरा करही; अउ जब ले परमेश्वर कर बचन पूरा नी होए लेही तब तक ले एक मन होए के अपन-अपन राएज ला जानवर ला दे देही।

¹⁸ ओ महिला, जेला तय देखे हस, ओहर बड़खा नगर है जेहर धरती कर राजा मन पर राएज करथे।”