मरकुस 15 - सरगुजिया बाइबिलपिलातुस कर यीशु ले प्रश्न ( मत्ती 27:1-2 , 11-14 ; लूका 23:1-5 ; यूहन्ना 18:28-38 ) 1 अउ भिनसरहा होवत ही तुरतेच प्रधान याजक मन, पुरनिए मन, अउ शास्त्री मन बरन सबेच महासभा हर सलाह कईर के यीशु ला बंधवईन, अउ ओला ले जाए के पिलातुस कर हाथ मे सोएप देहिन। 2 अउ पिलातुस हर ओकर ले पुछिस, “का तय यहूदी मन कर राजा हस?” यीशु हर ओला जवाब देहिस, “तय अपन ही कहथस।” 3 अउ प्रधान याजक मन ओकर पर ढेरेच गोएठ मन मे दोष लगात रहिन। 4 पिलातुस हर यीशु ले फिर पुछिस, “का तय कुछ जवाब नी देथस, देख एमन मन तोर पर केतेक गोएठ मे दोष लगात आहे?” 5 पर यीशु हर कोनो जवाब नी देहिस; हिया ले कि पिलातुस ला ढेरेच अचम्भा होईस। यीशु ला मारे कर हुकूम ( मत्ती 27:15-31 ; लूका 23:13-25 ; यूहन्ना 18:39-19:16 ) 6 पिलातुस ओ तिवहार मे कोनो एक बंदी ला जेला ओमन मन हर चाहथे, ओमन मन बर छोएड़ देहत रहिस। 7 बरअब्बा नाव कर एक आदमी रहिस ओहर उत्पात करोईया मन कर संग बांधल गए रहिस, जेमन मन उत्पात करई मे हत्या करे रहिन। 8 अउ भीड़ उपर कती जाए के पिलातुस ले बिनती करे लागिन, कि जेकस तय हमर बर करत आए हस ओहिच कस कर। 9 पिलातुस हर ओमन मन ला जवाब देहिस, “का तुमन मन चाहत हा कि मैहर तुमन मन बर यहूदी मन कर राजा ला छोएड़ देहू?” 10 काबर कि ओहर जानत रहिस कि महायाजक मन यीशु ला डाह ले धरवाए रहिन। 11 लेकिन प्रधान याजक मन हर लोग मन ला उभारिन कि ओहर बरअब्बा ही ला ओमन मन बर छोएड़ दे। 12 एला सुईन के पिलातुस हर ओमन मन ले फिर पुछिस, “त जेला तुमन मन यहूदी मन कर राजा कहथा, ओला मैहर का करो?” 13 ओमन मन फिर किरलईन, “ओला क्रूस पर चड़हाए दे!” 14 पिलातुस हर ओमन मन ले कहिस, “काबर, एहर का बुराई करिसे?” लेकिन ओमन मन अउ भी किरलाए लागिन, “ओला क्रूस पर चड़हाए दे!” 15 तब पिलातुस हर भीड़ ला खुश करे कर इक्छा ले, बरअब्बा ला ओमन मन बर छोएड़ देहिस, अउ यीशु ला कोड़ा लगवाए के दे देहिस कि क्रूस पर चड़हाल जाए। यीशु कर अपमान 16 सैनिक मन यीशु ला राजा कर महल के भीतर आंगन मे ले गईन जे जगहा हर प्रीटोरियम कहलात रहिस, अउ सबेच पलटन मन ला बुलाए लेहिन। 17 अउ ओमन मन यीशु ला बैजनी कपरा पहिनईन, अउ कंटा मन कर मुकूट गुईथ के ओकर मूड़ मे रखिन, 18 अउ ये कही के ओला नमस्कार करे लागिन, “हे यहूदी मन कर राजा, नमस्कार!” 19 ओमन मन यीशु के मूड़ मे सरकण्डा मारत, अउ ओकर पर थुकिन, अउ घुटना टेक के यीशु ला प्रनाम करत रहिन। 20 जब ओमन मन ओकर ठट्टा कईर दारिन, त ओकर पर ले बैजनी कपरा ला उताएर के ओकरेच कपरा ला पहिनईन; अउ तब ओला क्रूस मे चड़हाए बर बाहर कती ले गईन। यीशु ला क्रूस मे चड़हई ( मत्ती 27:32-44 ; लूका 23:26-39 ; यूहन्ना 19:17-19 ) 21 सिकन्दर अउ रूफुस कर दाऊ शमौन नाव एक कुरेनी आदमी, जेहर गाव कती ले आत रहिस ओ कती ले हिकलिस; ओमन मन ओला बेगार मे धरिन कि यीशु कर क्रूस उठाए के ले चले। 22 अउ ओमन मन यीशु ला गुलगुता नाव कर जगहा पर, जेकर अर्थ खोपड़ी कर जगहा है, लानिन। 23 अउ ओला गन्धरस मिलाल दाखरस देहे लागिन, लेकिन ओहर नी लेहिस। 24 तब ओमन मन यीशु ला क्रूस पर चड़हईन अउ ओकर कपरा बर चिठ्ठी डाएल के, कि कोन ला का मिलही, ओला बाएट लेहिन। 25 अउ एक पहर दिन चड़हे रहिस, जब ओमन मन ओके ला क्रूस पर चड़हईन। 26 अउ ओकर दोष पत्र ला लिख के ओकर उपर मे लगाए देहिन कि “यहूदी मन कर राजा।” 27 ओमन मन ओकर संग मे दुई झन डाकू, एक ओकर जेवनी कती अउ एक ओकर डेरी कती क्रूस पर चड़हईन। 28 (तब पवित्रशास्त्र कर ओ बचन हर कि ओहर अपराधी मन संग गिनल जाही, पूरा होईस)। 29 अउ डगर मे आए-जाए बाला मन मूड़ ला हिला-हिलाए के अउ ये कही के यीशु कर निन्दा करत रहिन, “वाह! मन्दिर ला ढाए बाला, अउ तीन दिन मे बनाए बाला! 30 क्रूस ले उतेर के अपन आप ला बचाए ले।” 31 एहिच रीति ले प्रधान याजक मन भी, शास्त्री मन समेत, अपन मे ठट्टा कईर के कहत रहिन, “एहर अउ झन मन ला बचईस, पर अपन ला नी बचाए सकत है। 32 इस्राएल कर राजा, मसीह, अब क्रूस पर ले उतेर आए कि हमन देख के बिश्वास करी।” अउ जेमन मन यीशु कर संग क्रूस पर चड़हाल गए रहिन, ओमन मन भी ओकर निन्दा करत रहिन। यीशु कर मरई ( मत्ती 27:45-56 ; लूका 23:44-49 ; यूहन्ना 19:28-30 ) 33 अउ दुईपहर होत ले सबेच देश मे अन्धार छाए लेहिस, अउ तीसरा पहर ले छाए रहिस। 34 तीसरा पहर मे यीशु हर बड़ेच गोएठ ले पुकाएर के कहिस, “इलोई, इलोई, लमा शबक्तनी?” जेकर अर्थ ये है, “हे मोर परमेश्वर, हे मोर परमेश्वर, तय हर मोला काबर छोएड़ देहे?” 35 जेमन मन लिघे ठड़होए रहिन, ओमन मन ले कुछ लोग मन एला सुईन के कहिन, “देखा, ओहर नबी एलिय्याह ला पुकारत है।” 36 अउ एक झन हर कुईद के सपंज ला सिरका मे डुबाए के, अउ सरकण्डा मे रईख के यीशु ला चूसईस अउ कहिस, “ठहरे रहा, देखब, एलिय्याह हर एला उतारे बर आथे कि नही।” 37 तब यीशु हर जोर ले किरलाए के प्रान छोएड़ देहिस। 38 अउ मन्दिर कर परदा हर उपर ले खाल्हे तक फईट के दुई भाग होए गईस। 39 जे सूबेदार हर यीशु कर आगू मे ठड़होए रहिस, जब यीशु ला एकस किरलाए के प्रान ला छोड़त देखिस, त ओहर कहिस, “सचमुच मे ये मैनसे हर, परमेश्वर कर बेटा रहिस।” 40 कई महिला मन भी दुरिहा ले देखत रहिन: ओमन मन मे मरियम मगदलीनी, छोटे याकूब अउ योसेस कर दाई मरियम, अउ सलोमी रहिन। 41 जब ओहर गलील परदेस मे रहिस, त एमन मन यीशु कर पाछू मे होए लेहत रहिन अउ ओकर सेवा टहल करत रहिन; अउ भी ढेरेच महिला मन भी रहिन, जेमन मन यीशु कर संग मे यरूशलेम शहर ले आए रहिन। यूसुफ कर कबर मे यीशु ला दफनईन ( मत्ती 27:57-61 ; लूका 23:50-56 ; यूहन्ना 19:38-42 ) 42 जब सांझ होए गईस, काबर कि सब्त कर दिन रहिस, जेहर सब्त कर दिन ले एक दिन आगू होत रहिस, 43 अरिमतियाह कर रहे बाला यूसुफ अईस, जेहर महासभा कर एक मुख्य सदस्य रहिस, अउ अपन भी परमेश्वर कर राएज कर इंतजार करत रहिस। ओहर साहस कईर के पिलातुस जग गईस अउ यीशु कर लाश ला मांगिस। 44 पिलातुस हर आश्चर्य करिस, कि ओहर एतेक जल्दी मईर गईस; अउ ओहर सूबेदार ला बुलाए के पुछिस, “का यीशु ला मरे ले देरी होईस?” 45 जब ओहर सूबेदार कर द्वारा हाल ला जाएन लेहिस, त लाश ला यूसुफ ला देवाए देहिस। 46 तब यूसुफ मलमल कर एक चादर बेसईस, अउ लाश ला उताएर के ओ चादर मे लपेटिस, अउ एक कबर मे जेहर पखनोरिहा मे खोदल गए रहिस रईख देहिस, अउ कबर कर दूरा मे एक पखना ला ढकेल देहिन। 47 अउ मरियम मगदलीनी अउ योसेस कर दाई मरियम देखत रहिन कि ओला कहा रखल गईस आहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation