मत्ती 9 - सरगुजिया बाइबिल

एक लकवा कर रोगी ला चंगा करई

¹ फिर यीशु हर डोंगा मे चईड़ के ओ पार गईस, अउ अपन नगर मे अईस।

² अउ देखा, कई झन लोग मन एक लकवा कर रोगी ला खटिया मे रईख के यीशु जग लानिन। यीशु हर ओमन कर बिश्वास ला देख के ओ लकवा कर रोगी ले कहिस, “हे बेटा, हिम्मत बांध; तोर पाप हर छमा होए गईस।”

³ अउ कई शास्त्री मन हर सोचिन, “एहर त परमेश्वर कर निन्दा करथे।”

⁴ यीशु हर ओमन के मन कर गोएठ ला जाएन के कहिस, तुमन मन अपन-अपन मन मे बुरा काबर सोचत हवा।

⁵ सहज का है? ये कहे बर, “तोर पाप छमा होईस” या ये कहबे, “उठ अउ रेंग-बुल।”

⁶ लेकिन एकरे बर कि तुमन हर जाएन ला कि मैनसे कर बेटा ला पृथ्वी मे पाप छमा करे कर अधिकार है। ओहर लकवा कर रोगी ले कहिस, “उठ अपन खटिया ला उठा, अउ अपन घर चईल जा।”

⁷ ओहर उईठ के अपन घर रेंग देहिस।

⁸ लोग मन एला देख के डईर गईन, अउ परमेश्वर कर महिमा करे लागिन, जेहर लोग मन ला एसन अधिकार देहिस है।

यीशु कर द्वारा मत्ती ला बुलई

⁹ हुवा ले आगू हिकेल के यीशु हर मत्ती नाव कर एक आदमी ला मलगुजारी कर चवकी मे बईठल देखिस, अउ ओकर ले कहिस, “मोर पाछू होए ले।” ओहर उईठ के ओकर पाछू होए लेहिस।

¹⁰ अउ जब ओहर घर मे भात खाए बर बईठिस त ढेरेच झन महसूल लेहोईया अउ पापी मन आए के यीशु अउ ओकर चेला मन कर संग खाए बर बईठिन।

¹¹ एला देख के फरीसी मन हर ओकर चेला मन ले कहिस, “तुमन कर गुरू हर मलगुजारी लेहे बाला मन अउ पापी मन कर संग मे काबर खाथे?”

¹² एला सुईन के यीशु हर ओमन ले कहिस, “बैध हर भला चंगा मन बर नही, लेकिन बिमार मन बर जरूरत रहथे।

¹³ एकरे बर तुमन जाएन के एकर अर्थ ला सिख लेवा, कि मैहर बलिदान ले नही लेकिन दया चाहथो, काबर कि मैहर धर्मी मन ला नही, लेकिन पापी मन ला बुलाए बर आए हो।”

यूहन्ना के चेला मन कर उपवास पर प्रश्न

¹⁴ तब यूहन्ना कर चेला मन ओकर लिघे आए के कहिन, “का कारन है कि हमन अउ फरीसी एतेक उपवास करथन, पर तोर चेला मन उपवास नी करथे?”

¹⁵ यीशु हर ओमन ले कहिस, “का बराती मन, जब ले दूल्हा हर ओमन कर संग मे है दुख कईर सकथे? पर ओ रोज आही, जे घनी दूल्हा ला ओमन ले अलग कईर देहल जाही, ओ घनी ओमन उपवास करही।

¹⁶ नावा कपरा कर पैबंध, जुनहा कपरा मे कोनोच हर नी लगाए, काबर कि ओहर पैबंध ले कपरा ला कुछ अउ खिच लेथे, अउ ओहर ढेरेच फईट जाथे।

¹⁷ अउ नावा दाखरस ला जुनहा हाड़ी मन मे कोनोच हर नी भरथे, काबर कि एकस करे ले हाड़ी मन हर फईट जाथे। अउ दाखरस हर बह जाथे। अउ मश्का मन नाएस होए जाथे। लेकिन नावा दाखरस हर नावा हाड़ी मन मे भरल जाथे, अउ ओ दोनोच हर बईच जाथे।”

मरल लड़की कर जी उठई

¹⁸ ओहर ओमन ले ये गोएठ मन ला कहतेच रहिस, कि देखा, कि एक सरदार हर आए के ओला प्रनाम करिस अउ कहिस, “मोर लड़की हर अझे मरिस आहे, लेकिन चईल के अपन हाथ ला ओकर मे रईख दे, त ओहर जीवित होए जाही।”

¹⁹ यीशु हर उईठ के अपन चेला मन सहित ओकर पाछू होए लेहिस।

²⁰ अउ देखा, एक महिला हर जेके ला बारह बरस ले लहू बहे कर रोग रहिस, ओकर पाछू कती ले आए के ओकर कपरा कर कोनहा ला छुईस।

²¹ काबर कि ओहर अपन मन मे कहत रहिस, “अगर मैहर ओकर कपरा ला ही छुई लेहू त चंगा होए जाहू।”

²² यीशु हर मुईड़ के ओला देखिस अउ कहिस, “बेटी हिम्मत रख; तोर बिश्वास हर तोला चंगा करिस आहे।” तले ओ महिला हर ओहिच घरी चंगा होए गिस।

²³ जब यीशु ओ सरदार कर घर मे पहुचिस, अउ बसरी बजाए बाला मन अउ भीड़ ला हुड़दंग मचात देखिस,

²⁴ तब कहिस, “हईट जावा, लड़की हर नी मरिस है, लेकिन सूतत आहे।” एकर बर ओमन मन यीशु पर हसे लागिन।

²⁵ लेकिन जब भीड़ ला हिकाएल देहल गईस, त ओहर भीतरी जाए के लड़की कर हाथ ला पकड़िस, अउ ओहर जी उठिस।

²⁶ अउ ये गोएठ कर चर्चा ओ सबेच परदेस मे बगेर गईस।

अंधा मन कर बिश्वास

²⁷ जे घनी यीशु हर हुवा ले आगू बड़हिस, त दुई झन अन्धवा मन ओकर पाछू ये चिकरत गईन, “हे दाऊद कर संतान, हमर पर दया कर!”

²⁸ जब ओहर घर मे पहुचिस, त ओ अन्धवा मन ओकर लिघे अईन, अउ यीशु हर ओमन ले कहिस, “का तुमन ला बिश्वास आहे, कि मैहर एला कईर सकथो?” ओमन मन ओकर ले कहिन, “हव, प्रभु!”

²⁹ तब ओहर ओमन कर आएख मन ला छुई के कहिस, “तुमन कर बिश्वास कर अनुसार तुमन बर होए जाए।”

³⁰ अउ ओमन कर आएख हर खुईल गिस। अउ यीशु हर ओमन ला चेताए के कहिस, “चवकस, कोनोच मन ये गोएठ ला झिन जाने पाए।”

³¹ पर ओमन मन हिकेल के सबेच देश मे ओकर यश ला बगराए देहिन।

एक गूंगा ला चंगाई

³² जब ओमन मन बाहर कती जात रहिन, त देखा, लोग मन एक गूंगा ला जेमे प्रेत आत्मा रहिस, यीशु के जग लानिन;

³³ अउ जब प्रेत आत्मा ला हिकाए देहल गईस, त गूंगा हर गोठियाए लागिस। एकरे ले भीड़ हर अकचकाए के कहिन, “इस्राएल मे एकस कभो नी देखल गए रहिस।”

³⁴ लेकिन फरीसी मन हर कहिन, “ये त प्रेत आत्मा मन कर सरदार कर सहयोग ले प्रेत आत्मा मन ला हिकालथे।”

कमिया मन ला भेजे बर बिनती

³⁵ अउ यीशु सबेच नगर अउ गाव मे फिरत रहिस अउ ओमन कर अराधनालय मन मे उपदेश करत, अउ राएज कर सुसमाचार प्रचार करत, अउ हर नियर कर बिमारी अउ कमजोरी मन ला भी दुरिहा करत रहिस।

³⁶ जब ओहर भीड़ देखिस त ओ लोग मन पर दया अईस, काबर कि ओमन मन ओ भेड़ मन कर नियर जेमन कर कोनोच देखरेख करे बाला नी है, ब्याकुल अउ भटकल रहिन।

³⁷ तब ओहर अपन चेला मन ले कहिस, “पाकल खेत त ढेरेच है, लेकिन कमिया मन तनिक अकुन है।

³⁸ एकरे बर खेत कर स्वामी ले बिनती करा कि अपन खेत ला काटे बर कमिया मन ला भेज देहे।”