मत्ती 8 - सरगुजिया बाइबिल

कोढ़ कर रोगी ला छुई के चंगा करई

¹ जब यीशु हर ओ पहार ले उतरिस, त एक बड़खा भीड़ ओकर पाछू मे होए लेहिन।

² अउ देखा एक कोढ़ी रोगी हर लिघे आए के यीशु ला प्रनाम करिस अउ कहिस, “हे प्रभु, अगर तय हर चाहबे, त मोला शुद्ध कईर सकथस।”

³ यीशु हर हाथ बड़हाए के ओला छुईस, अउ कहिस, “मैहर चाहत हो, तय हर शुद्ध होए जा।” अउ ओहर तुरतेच कोढ़ ले शुद्ध होए गिस।

⁴ यीशु हर ओकर ले कहिस, “देख, काकरो ले झिन कहबे, लेकिन अपन आप ला याजक ला दिखा अउ जे चड़हवा मूसा हर ठहरईस है ओला चड़हा, ताकि लोग मन बर गवाही होए।”

सूबेदार कर बिश्वास पर यीशु कर बड़ाई

⁵ अउ जब ओहर कफरनहूम नगर मे अईस त एक सूबेदार हर ओकर लिघे आए के ओकर ले बिनती करिस,

⁶ “हे प्रभु, मोर सेवक घर मे लकवा कर रोग ले ढेरेच दुख मे पड़िस है।”

⁷ ओहर ओकर ले कहिस, “मैहर आए के ओला चंगा करहू।”

⁸ सूबेदार हर उत्तर देहिस, “हे प्रभु, मैहर ये लाएक नी हवो कि तय मोर छानही कर खाल्हे आबे, लेकिन केबल मुह ले कह देबे त मोर सेवक हर चंगा होए जाही।

⁹ काबर कि मैहर भी पराधीन लोग हो, अउ सिपाही मन मोर हाथ मे है। जब मैहर एक झन ले कहथो, ‘जा!’ त ओहर जाथे; अउ दूसर ले, ‘आव!’ त ओहर आथे; अउ जब अपन कमिया ले कहथो, ‘एला कर!’ त ओहर ओला करथे।”

¹⁰ एला सुईन के यीशु ला अचम्भित होईस, अउ जेमन ओमन पाछू मे आत रहिन, ओमन ले कहिस, “मैहर तुमन ले सहिच कहथो कि मैहर इस्राएल देश मे भी एसन बिश्वास नी पाए।

¹¹ अउ मैहर तुमन ले कहथो, कि पूरब अउ पश्चिम ले ढेरेच लोग मन आए के अब्राहम अउ इसहाक अउ याकूब कर संग मे स्वर्ग कर राएज मे बईठही।

¹² लेकिन राएज कर संतान बाहर अन्धार मे डाएल देहल जाही: हुवा रोवई अउ दांत मन कर पिसई होही।”

¹³ यीशु हर सूबेदार ले कहिस, “जा, जईसन तोर बिश्वास है, ओहिच कस तोर बर होए जाए।” अउ ओकर सेवक ओहिच घरी चंगा होए गिस।

पतरस कर घर मे ढेरेच रोगी मन ला चंगाई

¹⁴ अउ यीशु जब पतरस कर घर मे अईस, त यीशु हर ओकर सास ला जर मे पड़ल देखिस।

¹⁵ ओहर ओकर हाथ ला छुईस अउ ओकर जर हर उतेर गईस, अउ ओहर उईठ के ओकर सेवा करे लागिस।

¹⁶ जब सांझ होईस तब ओमन मन ओकर लिघे ढेरेच झन मन ला लानिन जेमन मन मे भूत-प्रेत रहिस अउ यीशु हर ओ आत्मा मन ला अपन बचन कर द्वारा हिकाएल देहिस; अउ सबेच बिमार मन ला चंगा करिस।

¹⁷ ताकि जे बचन यशायाह अगमजानी कर द्वारा कहल गए रहिस ओहर पूरा होए, “ओहर अपन हमर कमजोरी मन ला ले लेहिस अउ हमर बिमार मन ला उठाए लेहिस।”

यीशु कर चेला बने कर किमत

¹⁸ यीशु हर अपन चाएरो कती एक बड़खा भीड़ ला देखिस त झील कर ओ पार जाए कर हुकूम देहिस।

¹⁹ तब एक शास्त्री हर ओकर लिघे आए के कहिस, “हे गुरू जी, जहा कही तय जाबे, मैहर तोर पाछू-पाछू मे होए लेहू।”

²⁰ यीशु हर ओकर ले कहिस, “सियार मन कर माड़ा अउ अकाश के चरई मन कर बसेरा होथे; लेकिन मैनसे कर बेटा बर मूड़ धरे कर भी जगहा नी है।”

²¹ एक अउ चेला हर यीशु ले कहिस, “हे प्रभु, मोला आगू जाए दे कि अपन दाऊ ला गाएड़ देहू।”

²² यीशु हर ओकर ले कहिस, “तय मोर पाछू होए ले, अउ मुरदा मन ला अपन मुरदा गाड़े दे।”

आंधी अउ तूफान मन ला शान्त करई

²³ जब यीशु हर डोंगा मे चड़हिस, त ओकर चेला मन ओकर पाछू मे होए लेहिन।

²⁴ अउ देखा, झील मे एक एसन बड़खा तूफान उठिस कि डोंगा हर लहर मन ले बुड़े लागिस, अउ ओहर सूतत रहिस।

²⁵ तब चेला मन लिघे आए के यीशु ला जगईन अउ कहिन, “हे प्रभु हमन ला बचाव, हमन नाएस होए जाथन।”

²⁶ यीशु हर ओमन ले कहिस, “हे आधा बिश्वास करे बाला मन, काबर डरथा?” तब ओहर उईठ के आंधी अउ पानी ला घुड़किस, अउ सबेच शान्त होए गईस।

²⁷ अउ लोग मन अचम्भा कईर के कहे लागिन, “एहर कईसन मैनसे है कि आंधी अउ पानी भी ओकर हुकूम ला मानथे।”

अशुद्ध आत्मा मन ला बरहा मन कर झुन्ड मे भेजई

²⁸ जब ओहर ओ पार गदेरनी मन कर देश मे पहुचिस, त दुई लोग जेमन मन मे भूत-प्रेत कर आत्मा रहिस मरघट मे ले हिकेल के ओकर ले मिलिन। ओमन मन एतेक गुस्सा करे बाला रहिन कि कोनोच हर ओ डगर मे नी जाए सकत रहिन।

²⁹ अउ ओमन मन किरलाए के कहिन, “हे परमेश्वर कर बेटा, हमर ले तोला का बुता? का तय हर हमन ला समय ले आगू दुख देह बर आए हस?”

³⁰ ओहर कुछ दुरिहा मे ढेरेच अकुन बरहा मन कर एक झुन्ड चरत रहिस।

³¹ अशुद्ध आत्मा मन ओकर ले ये कही के बिनती करिन, अगर तय हर हमन ला हिकालबे, त बरहा मन कर झुन्ड मे भेज दे।

³² यीशु हर ओमन मन ले कहिस, “जावा!” अउ ओमन हर हिकेल के बरहा मन मे बईठ गईन, अउ देखा सबेच झुन्ड हर करार ले झपेट के पानी मे बुईड़ मरीन।

³³ अउ चरवाहा मन भागीन, अउ शहर मे जाए के ये सबेच गोएठ अउ जेमन मे भूत-प्रेत कर आत्मा रहिस ओकर सबेच हाल-चाल ला सुनईस।

³⁴ अउ तब सबेच नगर कर लोग मन यीशु ले भेंट करे बर हिकेल अईन, अउ ओला देख के बिनती करिन कि हमर सीमा ले बाहर हिकेल जा।