मत्ती 3 - सरगुजिया बाइबिल

यूहन्ना बपतिस्मा देहे बाला कर प्रचार

¹ ओ दिन मे यूहन्ना बपतिस्मा देहे बाला आए के यहूदिया परदेस कर जंगल मे ये प्रचार करे लागिस:

² “मन फिरावा, काबर कि स्वर्ग कर राएज लिघे आए गईस है।”

³ ये ओहिच हे जेकर चर्चा यशायाह अगमजानी कर द्वारा करल गईस: “जंगल मे एक पुकारे बाला कर गोएठ होवत आहे, कि प्रभु कर डगर ला तियार करा, ओकर सड़क ला सीधा करा।”

⁴ ये यूहन्ना ऊट कर रावा कर कपरा पहिनल रहिस, अउ अपन कनिहा मे चमरा कर कनिहाबन्ध बांधे रहिस। ओकर खाना फमफा अउ बन मधु रहिस।

⁵ तब यरूशलेम शहर अउ सबेच यहूदिया परदेस, अउ यरदन नदी कर आस-पास कर सबेच जगहा मन मे मैनसे मन ओकर लिघे हिकेल के अईन।

⁶ ओमन मन अपन-अपन पाप ला माएन के यरदन नदी मे ओकर ले बपतिस्मा लेहिन।

⁷ जब ओहर ढेरेच झन फरीसी मन अउ सदूकी मन ला बपतिस्मा बर अपन लिघे आत देखिस, त ओमन ले कहिस, “हे साप कर लईका मन, तुमन ला कोन बताए देहिस कि आए बाला गुस्सा ले भागा?

⁸ एकरे बर मन फिराव कर लाएक फर लाना;

⁹ अउ अपन-अपन मन मे ये झिन सोचा कि हमर दाऊ अब्राहम है; काबर कि मैहर तुमन ले कहथो कि परमेश्वर हर ये पखना मन ले अब्राहम बर संतान जन्माए सकथे।

¹⁰ अउ अब टांगी हर रूख कर जईर पर धरल आहे, एकरे बर जे-जे रूख हर बड़िया फर नी लानही, ओहर काटल अउ आगी मे ढोए देहल जाही।

¹¹ मैहर त पानी ले तुमन ला मन फिराव कर बपतिस्मा देहथो, लेकिन जे मोर पाछू आए बाला हे, ओहर मोर ले शक्तिशाली है, मैहर ओकर पनही ला उठाए कर लाएक नी हो। ओहर तुमन ला पवित्र आत्मा अउ आगी ले बपतिस्मा देही।

¹² ओकर सूपा हर ओकर हाथ मे रही अउ ओहर अपन कोठार ला बड़िया रीति ले सफा करही, अउ अपन गेहू ला त कोठी मे भरही, लेकिन भूसा ला ओ आगी मे जलाही जेहर बुझाए बाला नी है।”

यूहन्ना कर द्वारा यीशु मसीह कर बपतिस्मा

¹³ ओ समय यीशु गलील परदेस ले यरदन नदी कर कगरे यूहन्ना कर लिघे ओकर ले बपतिस्मा लेहे बर अईस।

¹⁴ लेकिन यूहन्ना ये कही के यीशु ला रोके लागिस, “मोला त तोर हाथ ले बपतिस्मा लेहे कर जरूरत आहे, अउ तय मोर जग आए हस?”

¹⁵ यीशु हर ओला कहिस, अब त एहिच कस होए दे, काबर कि हमन ला एहिच रीति ले सबेच धार्मिकता ला पूरा करे बर आहे। तब यूहन्ना हर यीशु कर गोएठ ला माएन लेहिस।

¹⁶ अउ यीशु बपतिस्मा ले के तुरतेच पानी ले उपर अईस, अउ देखा, यीशु बर अकाश हर खुईल गईस, अउ ओहर परमेश्वर कर आत्मा ला परेवा जईसन उतरत अउ अपन उपर आत देखिस।

¹⁷ अउ देखा, ये अकाशबानी होईस, “ये मोर दुलरवा बेटा है, जेकर ले मैहर ढेरेच खुश हो।”