मत्ती 27 - सरगुजिया बाइबिल

पिलातुस कर आगू मे यीशु

¹ जब भिनसरहा होईस त सबेच प्रधान याजक मन ला अउ लोग मन कर पुरनिए हर यीशु ला माएर देहे कर सलाह करिन।

² ओमन मन यीशु ला बाएध देहिन अउ ले जाए के पिलातुस हाकिम कर हाथ मे दे देहिन।

यहूदा इस्करियोती कर आत्महत्या

³ जब ओकर धरवाए बाला यहूदा हर देखिस कि यीशु हर दोषी ठहराल गईस है, त ओहर पछतईस अउ ओ तीस चांदी कर सिक्का ला प्रधान याजक अउ पुरनिए मन ठन फिर लानिस।

⁴ अउ कहिस मैहर निर्दोष ला घात करे बर धरवाए कर पाप करे हो। ओमन मन कहिन, हमन का करी तए ही जान।

⁵ त ओहर ओ सिक्का मन ला मन्दिर मे फेक के चईल देहिस, अउ जाए के अपन आप ला फासी देहिस।

⁶ प्रधान याजक मन ओ सिक्का मन ला लेकर कहिस। एला भण्डार मे रखई उचित नी है, काबर कि एहर लहू कर दाम है।

⁷ तले ओमन मन सलाह कईर के ओ सिक्का ला परदेसी मन कर मरल मन ला गाड़े जाए बर कुमहार कर खेत ला बेसाए लेहिन।

⁸ एकर बर ओ खेत आएज ले लहू कर खेत कहलाथे।

⁹ त जे बचन यिर्मयाह अगमजानी कर द्वारा कहे रहिस, ओहर पूरा होईस। ओमन हर वो तीस सिक्का मने कि ओ ठहराल, किमत ला जेला इस्राएल कर संतान मे ले केतेक हर ठहराए रहिन।

¹⁰ अउ जेकस प्रभु हर मोला हुकूम देहिस, ओहिच कस कुमहार कर खेत कर किमत मे दे देहिन।

पिलातुस कर यीशु मसीह ले प्रश्न

¹¹ जब यीशु हर पिलातुस हाकिम कर आगू मे ठड़होए रहिस, त हाकिम हर ओला पुछिस, का तय यहूदी मन कर राजा हस यीशु हर ओला कहिस, तय हर अपन ही कहथस।

¹² जब प्रधान याजक अउ पुरनिए ओकर मे दोष लगात रहिन, त ओहर कुछ जवाब नी देहिस।

¹³ एकर बर पिलातुस हाकिम हर यीशु ले कहिस, का तय नी सुनथस कि एमन हर तोर बिरोध मे केतेक गवाही देथे।

¹⁴ लेकिन ओहर ओला एक गोएठ कर भी उत्तर नी देहिस, यहा ले कि पिलातुस हाकिम ला बड़ेच अचम्भा होईस।

यीशु मसीह ला छोड़े मे पिलातुस सफल नी होईस

¹⁵ अउ पिलातुस हाकिम कर ये रीति रहिस, कि ओ तिवहार मे लोग मन बर कोनो एक बंदी ला, जेला ओमन हर चाहथे, छोएड़ देहत रहिस।

¹⁶ ओ समय बरअब्बा नाव कर एक जानल-मानल बंदी रहिस।

¹⁷ तले जब हुवा जमा होईन त पिलातुस हाकिम हर ओकर ले कहिस, तुमन कोन ला चाहथा कि मैहर तुमन बर छोएड़ देहू? बरअब्बा ला या यीशु ला जेहर मसीह कहलाथे?

¹⁸ काबर कि ओहर जानत रहिस, कि ओमन मन हर यीशु ला डाह कईर के धरवाईन है।

¹⁹ जब ओहर न्याय कर सिंहासन मे बईठल रहिस त ओकर घरदारिन हर ओला कहलाए भेजिस, तय ओ धर्मी कर बिषय मे हाथ झिन डालबे। काबर कि मैहर अझे सपना मे ओकर कारन ढेरेच दुख उठाए हो।

²⁰ प्रधान याजक अउ पुरनिए मन हर लोग मन ला उभारिन कि ओहर बरअब्बा ला माएंग लेहिन। अउ यीशु ला नाश कराए।

²¹ हाकिम हर ओकर ले पुछिस, ये दोनो मे ले, कोन ला पतियाथा कि मैहर तुमन मन बर छोएड़ देहू? ओमन मन कहिन, बरअब्बा ला।

²² पिलातुस हाकिम हर ओला पुछिस, फिर यीशु ला जेहर मसीह कहलाथे, का करो? सबेच झन मन ओला कहिन, ओला क्रूस मे चड़हाए दे।

²³ पिलातुस हाकिम हर कहिस, काबर यीशु हर का बुराई करिस है? लेकिन ओमन मन अउ भी किरलाए-किरलाए के कहिन, ओला क्रूस मे चड़हाए दे।

²⁴ जब पिलातुस हाकिम हर देखिस कि कुछूच बईन नी पड़थे, लेकिन एकर उलटा हुल्लड़ बड़हत गईस, त ओहर पानी ला ले के भीड़ के आगू मे अपन हाथ ला धोईस अउ कहिस, मैहर ये धर्मी कर लहू ले निर्दोष हो, तुमन ही जानिहा।

²⁵ सबेच लोग मन उत्तर देहिन, एकर लहू हमन मे अउ हमर संतान मे होही।

क्रूस पर चड़हाए बर देहई

²⁶ एकर कारन ओहर बरअब्बा ला ओमन मन बर छोएड़ देहिस अउ यीशु ला कोड़ा लगवाए बर दे देहिस, कि क्रूस मे चड़हाल जाए।

सिपाही मन कर द्वारा यीशु कर अपमान

²⁷ तब पिलातुस हाकिम कर सिपाही मन हर यीशु ला राजा कर महल मे ले जाए के सबेच सैनिक मन ओकर चाएरो कती जमा होईन।

²⁸ अउ ओकर कपरा ला उताएर के ओला लाल रंग कर बागा पहिरईन।

²⁹ अउ कंटा मन कर मुकूट गुईथ कर ओकर मूड़ मे रखिन अउ ओकर हाथ मे सरकण्डा देहिन अउ ओकर आगू घुटना टेक कर ओला ठठ्ठा मे उड़ईन अउ कहिन, “हे यहूदी मन कर राजा नमस्कार।”

³⁰ अउ यीशु पर थुकिन, अउ ओहिच सरकण्डा ला ले के ओकर मूड़ मे मारे लागिन।

³¹ जब ओमन मन यीशु कर ठठ्ठा कईर दारिन त ओहर बागा ला ओकर मे ले उताएर कर फिर ओकरेच कपरा ला ओला पहिरईन, अउ क्रूस मे चड़हाए बर बाहर कती ले गईन।

यीशु कर क्रूस पर चड़हई

³² बाहरी जात ओमन मन शमौन नाव कर एक कुरेनी आदमी मिलिस, ओमन मन ओला बेगार मे धरिन, कि यीशु कर क्रूस उठाए के ले चले।

³³ ओ जगहा मे पहुच के जेहर गुलगुता मने कि खोपड़ी कर जगहा कहलाथे,

³⁴ ओमन मन पित्त मिलाल, दाखरस ओला पीए बर देहिन, लेकिन यीशु हर चईख के पीए बर नी चाहिस।

³⁵ तब ओमन मन यीशु मसीह ला क्रूस मे चड़हईन, अउ चिठ्ठी डाएल के ओकर कपरा ला बाएट लेहिन।

³⁶ अउ हुवा बईठ के ओकर पहरा देहत रहिन।

³⁷ अउ यीशु कर दोष पत्र ला ओकर मूड़ कर उपरे लगईन, कि “एहर यहूदी मन कर राजा यीशु है।”

³⁸ तब यीशु कर संग मे दुई डाकू मन ला, एक जेवनी कती अउ एक डेरी कती, क्रूस मे चड़हाए देहिन।

³⁹ आए-जाए बाला मन मूड़ ला हिलाए-हिलाए के ओकर निन्दा करत रहिन।

⁴⁰ अउ ये कहत रहिन, “हे मन्दिर कर ढाए बाला अउ तीन रोज मे बनाए बाला, अपन आप ला तय बचाए ले। अगर तय परमेश्वर कर बेटा हस, त क्रूस मे ले उतेर आ।”

⁴¹ एहिच रीति ले प्रधान याजक, शास्त्री अउ पुरनिए मन सहित ठठ्ठा कईर-कईर के कहत रहिन।

⁴² एहर अउ झन ला बचईस, अउ अपन आप ला नी बचाए सकथे, एहर त इस्राएल कर राजा है, अझे क्रूस मे ले उतेर आही त हमन मन ओकर पर बिश्वास करब।

⁴³ ओहर परमेश्वर मे भरोसा रखिस। अगर ओहर एला पतियाथे त अझेच एला चड़हाए ले। काबर कि एहर कहे रहिस, मैहर परमेश्वर कर बेटा हो।

⁴⁴ एहिच कस डाकू मन भी जेमन मन ओकर संग क्रूस मे चड़हाल गए रहिन, ओकर निन्दा करत रहिन।

यीशु मसीह कर प्रान छोड़ई

⁴⁵ दुईपहर ले ले के तीसरा पहर तक ले ओ सबेच देश मे अन्धार छाए रहिस।

⁴⁶ तीसरा पहर कर लिघे यीशु हर बड़खा शब्द ले पुकारिस, अउ कहिस, “एली, एली, लमा शबक्तनी” मने कि “हे मोर परमेश्वर, हे मोर परमेश्वर, तय हर मोला काबर छोएड़ देहे?”

⁴⁷ जेमन मन हुवा ठड़होए रहिन, ओमन मन ले केतेक झन मन एला सुईन के कहिन, ओहर त एलिय्याह ला पुकारत है।

⁴⁸ ओमन मे ले एक झन हर तुरतेच, कुदिस, अउ सपंज ला ले के सिरका मे डुबईस, अउ सरकण्डा मे रईख के ओला चूसवाईस,

⁴⁹ अउ झन मन कहिन, रूक जावा, देखा एलिय्याह हर ओला बचाए बर आथे कि नही।

⁵⁰ तब यीशु हर फिर जोर से किरलाए के प्रान छोएड़ देहिस।

⁵¹ अउ देखा मन्दिर कर परदा उपर ले खाल्हे तक फईट के दुई टुड़का होए गईस। अउ धरती, डोएल गईस अउ चट्टान मन तड़क गईन।

⁵² अउ कबर मन हर खुईल गईस अउ सुतल पवित्र लोग मन कर ढेरेच मुरदा मन जी उठिन।

⁵³ अउ ओकर जी उठे कर पाछू ओहर कबर मे ले हिकेल के पवित्र नगर मे गईन, अउ ढेरेच झन मन ला दिखाई देहिस,

⁵⁴ तब सूबेदार अउ जेमन मन ओकर संग यीशु कर पहरा देहत रहिन, भूईडोल अउ जे कुछ होए रहिस, ओला देख के ढेरेच झन मन डईर गईन, अउ कहिन, “सचमुच एहर परमेश्वर कर बेटा रहिस।”

⁵⁵ हुआ ढेरेच औरत मन ला जेमन मन गलील परदेस मे ले यीशु कर सेवा करत रहिन ओकर संग अईन, दुरिहा ले एला देखत रहिन।

⁵⁶ ओमन मे ले, मरियम मगदलीनी, अउ याकूब अउ योसेस कर दाई मरियम, अउ जब्दी कर बेटा मन कर दाई रहिस।

यीशु कर दफनई

⁵⁷ जब सांझ होईस त यूसुफ नाव कर अरिमतियाह कर एक धनी आदमी, जेहर अपन ही यीशु कर चेला रहिस, अईस।

⁵⁸ ओहर पिलातुस कर लिघे जाए के यीशु कर लाश ला मांगिस। एकर मे पिलातुस हर दे देहे कर हुकूम देहिस।

⁵⁹ यूसुफ हर लाश ला लेहिस, अउ ओला उज्जर चादर मे लपेटिस,

⁶⁰ अउ ओला अपन नावा कबर मे रखिस, जेहर ओ चट्टान मे खोदवाए रहिस। अउ कबर कर दूरा मे बड़खा पखना ला लुड़काए के चईल देहिन।

⁶¹ अउ मरियम मगदलीनी अउ दूसर मरियम हुवा कबर कर आगू मे बईठे रहिन।

यीशु कर कबर पर पहिरा

⁶² दूसर रोज जेहर तियारी कर रोज कर आगू के रोज रहिस, प्रधान याजक मन अउ फरीसी मन हर पिलातुस कर लिघे जुईट के कहिन,

⁶³ “हे महाराज, हमन ला याद है कि ओ भरमाए बाला हर जे घनी ओहर जिन्दा रहिस, त कहे रहिस, मैहर तीन रोज कर बाद मे जी उठहू।”

⁶⁴ तले हुकूम दे कि तीसरा रोज तक ले कबर कर रखबाली करल जाए, एकस झिन होए कि ओकर चेला मन आए के ओला चोराए ले जाही, अउ मैनसे मन ला कहे लागही, ओहर मरल मे ले जी उठिस है। त पीछू कर धोखा पहिला ले भी बुरा होही।

⁶⁵ पिलातुस हाकिम हर ओमन ले कहिस, तुमन जग पहरूवा मन त है, जावा अपन समझ कर अनुसार ओकर रखबाली करा।

⁶⁶ तले ओमन मन हर पहरूवा मन ला संग मे ले के गईन अउ पखना मे मोहर लगाए के रखबाली करिन।