मत्ती 26 - सरगुजिया बाइबिल

यीशु कर हत्या कर षडयंत्र

¹ जब यीशु हर ये सबेच गोएठ ला कईर दारिस त अपन चेला मन ले कहे लागिस,

² “तुमन मन जानथा, कि दुई दिन कर बाद मे फसह कर तिवहार है, अउ मैनसे कर बेटा क्रूस मे चड़हाल जाए बर धरवाल जाही।”

³ त प्रधान याजक अउ प्रजा कर पुरनिए कैफा नाव कर महायाजक कर आंगन मे जुटिन।

⁴ अउ अपन मे बिचार करे लागिन कि यीशु ला धोखा ले पकेड़ के माएर मरवाबो।

⁵ लेकिन ओमन मन कहत रहिन, “तिवहार कर समय नही, कहो एसन झिन होए कि लोग मन मे खलबली मईच जाही।”

यीशु मसीह पर ढेरेच महगा इत्र ला छिड़किन

⁶ जब यीशु हर बैतनिय्याह परदेस मे शमौन कोढ़ी कर घर मे रहिस,

⁷ त एगोठ महिला संगमरमर कर भाड़ा मे ढेरेच महगा इत्र लाएन के ओकर जग अईस, अउ जब यीशु हर भात खाए बर बईठे रहिस त ओकर मूड़ मे उंडेल देहिस।

⁸ एला देख के ओकर चेला मन रिसईन अउ कहे लागिन, “एला काबर नाश करल गईस?

⁹ एला त बड़िया दाम मे बेच के कंगाल मन मे बाटल जाए सकत रहिस।”

¹⁰ एला जाएन के यीशु हर ओमन मन ले कहिस, “महिला ला काबर तंग करथा? ओहर मोर संग मे भलाई करिस है।

¹¹ कंगाल मन त तुमन मन कर संग मे हमेसेच रही, लेकिन मैहर तुमन मन कर संग हमेसेच बर नी रहू।

¹² ओहर मोर देह मे ये इत्र उंडेलिस है, ओहर मोर माटी मे गाड़े जाए बर करिस है।

¹³ मैहर तोर ले सहिच कहथो कि सबेच जगत मे जे जग सुसमाचार प्रचार करल जाही, ओ जग ओकर ये बुता कर बखान भी ओकर याद मे करल जाही।”

यहूदा इस्कारियोती कर बिश्वासघात

¹⁴ तब यहूदा इस्कारियोती हर, जेहर बारह चेला मन मे ले एक रहिस, प्रधान याजक मन जग जाए के कहिस,

¹⁵ “अगर मैहर यीशु ला तुमन मन कर हाथ मे धरवाए देहू त मोला का देईहा?” ओमन मन ओला तीस चांदी कर सिक्का तउल के दे देहिन।

¹⁶ अउ ओहर ओहिच समय ले ओला धरवाए बर अवसर खोजे लागिस।

चेला मन कर संग फसह कर आखरी भोज

¹⁷ अखमीरी रोटी कर तिवहार कर आगू दिन, चेला मन यीशु जग आए के पूछे लागिन, “तय कहा चाहथस कि हमन तोर फसह खाए बर तियारी करी?”

¹⁸ ओहर कहिस, “नगर मे फलना जग जाए के ओकर ले कहा, ‘गुरू कहिस है कि मोर समय लिघे है। मैहर अपन चेला मन संग फसह कर तिवहार मनाहू।’”

¹⁹ तले चेला मन यीशु कर हुकूम ला मानिन अउ फसह तियार करिन।

²⁰ जब सांझ होईस त ओहर बारह चेला मन कर संग भात खाए बर बईठिस।

²¹ जब ओमन मन खात रहिन त यीशु हर कहिस, “मैहर तुमन मन ले सहिच कहथो कि तुमन मन मे ले एक झन मोला धरवाही।”

²² एकर मे ओमन मन ढेरेच उदास होईन, अउ सबेच झन मन ओकर ले पूछे लागिन, “हे गुरू, का ओहर मय हो?”

²³ ओहर उत्तर देहिस, “जेहर मोर संग थरीया मे हाथ डालिस है, ओहिच हर मोला धरवाही।

²⁴ मैनसे कर बेटा त जेकस ओकर बिषय मे लिखल आहे, जात ही है; लेकिन ओ लोग बर दुख है जेकर द्वारा लोग मन कर बेटा हर धरवाल जाथे: अगर ओ लोग कर जनम ही नी होतीस, त ओकर बर बड़िया होतीस।”

²⁵ त ओकर धरवाए बाला यहूदा हर कहिस, “हे गुरू का ओहर मय हो? ओहर ओकर ले कहिस, तय कह दारे।”

प्रभु भोज

²⁶ जब ओमन मन खात रहिन, त यीशु हर रोटी लेहिस, अउ आशीष माएंग के तोड़िस, अउ चेला मन ला दे के कहिस, “लेवा, खावा; एहर मोर देह है।”

²⁷ फिर यीशु हर कटोरा ला ले के धन्यवाद करिस, अउ ओमन मन ला दे के कहिस, “तुमन मन सबेच झन एला पीया,

²⁸ काबर कि एहर बाचा कर मोर ओ लहू है, जेहर ढेरेच झन मन कर पाप छमा कर निमित्त बहाल जाथे।

²⁹ मैहर तुमन मन ले कहथो, कि दाख कर ये रस ओ दिन तक कभो नी पीहू, जब तक तुमन मन कर संग अपन दाऊ कर राएज मे नावा नी पीहू।”

³⁰ फिर ओमन मन भजन गाए के जैतून पहार मे गईन।

पतरस कर मना करे कर भविष्यवानी

³¹ तब यीशु हर ओमन मन ले कहिस, “तुमन मन सबेच आएज ही राएत मे मोर बारे मे ठोकर खईहा, काबर कि लिखल आहे, ‘मैहर चरवाहा ला मारहू अउ झुन्ड कर भेड़ मन इते-उते होए जाही।’”

³² “लेकिन मैहर अपन जी उठे कर बाद मे तुमन मन ले आगू गलील परदेस जाहू।”

³³ एकर मे पतरस हर ओकर ले कहिस, “अगर सबेच तोर बिषय मे ठोकर खाही त खाही, लेकिन मैहर कभो ठोकर नी खाहु।”

³⁴ यीशु हर ओकर ले कहिस, “मैहर तोर ले सहिच कहथो, कि आएज ही राएत मे मुरगा कर बांग देहे कर आगू तय तीन बार मोर ले मुकेर जाबे।”

³⁵ पतरस हर यीशु ले कहिस, “अगर मोला तोर संग मरे बर भी पड़ही, तबो ले मैहर तोर ले कभो नी मुकरहू।” अउ एहिच नियर सबेच चेला मन भी कहिन।

गतसमनी कर बगीचा मे प्रार्थना

³⁶ तब यीशु हर अपन चेला मन संग गतसमनी नाव कर एक जगहा मे अईन अउ अपन चेला मन ले कहे लागिस, “एहिच जग बईठे रहा, जब तब ले मय हुवा जाए के प्रार्थना करहू।”

³⁷ अउ यीशु हर पतरस अउ जब्दी कर दुई बेटा मन ला संग मे ले गईस, अउ उदास अउ ब्याकुल होए लागिस।

³⁸ तब यीशु हर ओमन मन ले कहिस, “मोर मन ढेरेच उदास है, हिया तक ले कि मोर प्रान हर हिकेल जाथे। तुमन मन एहिच रूके रहा अउ मोर संग मे जागत रहा।”

³⁹ फिर ओहर तनिक अउ आगू बईड़ के मुह के बल गिरिस, अउ ये प्रार्थना करिस, “हे मोर दाऊ अगर होए सकही त ये कटोरा हर मोर ले दुरिहा हो जाए, तबो ले जेकस मय चाहथो, ओकस नही, लेकिन जेकस तय हर चाहथस ओहिच कस होए।”

⁴⁰ फिर ओहर चेला मन जग आए के ओमन मन ला सूतत पईस अउ पतरस ले कहिस, “का तुमन मन मोर संग एक घरी भी नी जाएग सका?

⁴¹ जागत रहा, अउ प्रार्थना करत रहा कि तुमन मन परीक्षा मे झिन पड़ा, आत्मा हर तियार है, लेकिन देह हर कमजोर है।”

⁴² फिर यीशु हर दूसर बार जाए के ये प्रार्थना करिस, “हे मोर दाऊ अगर एहर मोर पीए बगेर नी हईट सकथे त तोर मर्जी पूरा होए।”

⁴³ तब यीशु हर आए के ओमन मन ला फिर सूतत पईस, काबर कि ओमन मन कर आएख हर नींद ले भरे रहिस।

⁴⁴ ओमन मन ला छोएड़ के फिर चईल देहिस, अउ ओहिच नियर तीसरा बार प्रार्थना करिस।

⁴⁵ तब यीशु हर चेला मन जग आए के ओमन मन ले कहिस, “अब सूतत रहा, अउ अराम करा, देखा समय आए पहुचिस है, अउ मैनसे कर बेटा पापी मन कर हाथ मे धरवाए जाथे।

⁴⁶ उठा, चला; देखा, मोर धरवाए बाला हर लिघे आए पहुचिस है।”

यीशु मसीह ला बन्धुवा बनई

⁴⁷ यीशु हर ये कहतेच रहिस कि यहूदा जेहर बारह चेला मन ले एक रहिस अईस, अउ ओकर संग मे प्रधान याजक मन अउ लोग मन कर पुरनिए मन कती ले बड़खा भीड़, तलवार अउ लाठी ले के अईन।

⁴⁸ यीशु कर धरवाए बाला हर ये संकेत देहे रहिस: जेला मैहर चुईम लेहू ओहिच हर है; ओला पकेड़ लेईहा।

⁴⁹ अउ तुरतेच यीशु जग आए के कहिस, “हे गुरू, नमस्कार!” अउ ओला ढेरेच चूमिस।

⁵⁰ अउ यीशु हर ओकर ले कहिस, “हे संगता, जे बुता बर तय आए हस ओला कईर ले।” त ओमन मन लिघे आए के यीशु मे हाथ डालिन अउ ओला धईर लेहिन।

⁵¹ यीशु कर साथी मन ले एक झन हाथ बड़हाए के अपन तरवार ला खिच लेहिस, अउ महायाजक कर कमिया पर चलाए के ओकर कान ला काएट देहिस।

⁵² तब यीशु हर पतरस ले कहिस, “अपन तलवार ला म्यान मे रख ले काबर कि जेमन मन तलवार चलाथे ओमन मन सबेच झन तलवार ले नाश करल जाही।”

⁵³ का तय नी जानथस कि मय अपन दाऊ ले बिनती कईर सकथो, अउ ओहर स्वर्गदूत मन कर बारह पलटन ले बगरा मोर ठन तुरतेच भेज देही?

⁵⁴ लेकिन पवित्रशास्त्र कर ओ गोएठ मन कि एहिच नियर होही जरूरेच है, कईसे पूरा होही?

⁵⁵ ओ समय यीशु हर भीड़ ले कहिस, “का तुमन मन तलवार अउ लाठी ले के मोला डाकू नियर धरे बर हिकले हा? मय रोज दिन मन्दिर मे बईठ के उपदेश देहत रहे अउ तुमन मन मोला नी धरा।

⁵⁶ लेकिन ये सबेच एकरे बर होईस है कि अगमजानी मन कर बचन पूरा होए।” तब सबेच चेला मन ओला छोएड़ के भाएग गईन।

कैफा कर आगू मे यीशु

⁵⁷ अउ यीशु के धरवाए बाला हर ओला कैफा नाव कर महायाजक जग ले गईन, जे जग शास्त्री अउ पुरनिए मन जुटे रहिन।

⁵⁸ अउ पतरस दुरिहा ही दुरिहा यीशु कर पाछू-पाछू महायाजक कर आंगन तक गईस, अउ भीतरी जाए के अन्त देखे बर प्यादा मन कर संग मे बईठ गईस।

⁵⁹ प्रधान याजक अउ सबेच महासभा यीशु ला माएर देहे बर ओकर बिरोध मे झूठ के गवाही कर खोज मे रहिन,

⁶⁰ लेकिन बहुतेच झूठ कर गवाह मन कर आए ले भी नी पईन। आखरी मे दुई झन अईन,

⁶¹ अउ कहिन, “एहर कहिस है कि मय परमेश्वर कर मन्दिर ला गिराए सकथो अउ ओला तीन दिन मे बनाए सकथो।”

⁶² तब महायाजक हर ठड़होए के यीशु ले कहिस, “का तय कोनो जवाब नी देहथस? ये लोग मन तोर बिरोध मे का गवाही देहथे?”

⁶³ लेकिन यीशु हर चुप रहिस। तब महायाजक हर ओकर ले कहिस, “मय तोला जीवित परमेश्वर कर कसम देहथो कि अगर तय परमेश्वर कर बेटा मसीह हस त हमन मन ले कह दे।”

⁶⁴ यीशु हर ओकर ले कहिस, “तय अपन ही कह देहे; बल्कि मैहर तुमन मन ले ये भी कह देहथो कि अब ले मैनसे कर बेटा ला सर्वशक्तिमान कर जेवनी कती बईठल, अउ अकाश कर बदरी मे ले आत देखिहा।”

⁶⁵ एकर मे महायाजक हर अपन कपरा ला चीर के कहिस, अउ कहिस, “एहर परमेश्वर कर निन्दा करिस आहे, अब हमन ला गवाह मन कर का जरूरत? देखा, तुमन मन अभी ये निंदा ला सुने हा!

⁶⁶ तुमन का सोचथा?” ओमन जवाब देहिस, “एहर जान ले मारे कर लाएक है।”

⁶⁷ तब ओमन मन यीशु कर मुह मे थुकिन अउ यीशु ला घूसा मारिन, दूसर मन झापड़ माएर के कहिन,

⁶⁸ “हे मसीह, हमन ले भविष्यद्वानी कईर के बता कि कोन तोला मारिस?”

पतरस द्वारा यीशु ला नकारना

⁶⁹ पतरस हर बाहरी आंगन मे बईठे रहिस कि एगोठ नौकरानी ओकर जग अईस अउ कहिस, “तय भी यीशु गलीली कर संग मे रहे।”

⁷⁰ ओहर सबेच कर आगू ये कहिके नकाएर देहिस, “मय नी जानथो तय का कहथस।”

⁷¹ जब पतरस हर बाहर डेवढ़ी मे गईस त दूसर नौकरानी हर ओला देख के ओमन मन ले जेमन मन ओ जग रहिन कहिस, “एहर भी त यीशु नासरी कर संग मे रहिस।”

⁷² पतरस कसम खाए कर फिर ले नकाएर देहिस, “मय ओ मैनसे ला नी जानथो।”

⁷³ तनिक देर कर पाछू मे लोग मन जेमन मन ओ जग ठड़होए रहिन, पतरस जग आए के ओकर ले कहिन, “सहिच तय हर भी ओमन मन मे ले एक झन हस, काबर कि तोर गोएठ हर तोर भेद ला खोएल देहत आहे।”

⁷⁴ तब पतरस हर कोसेक अउ कसम खाए लागिस, “मैहर ओ मैनसे ला नी जानथो।” अउ तुरतेच मुरगा हर बांग देहिस।

⁷⁵ तब पतरस ला यीशु कर कहल गोएठ हर याद अईस, “मुरगा कर बांग देहे कर आगू तय तीन बार मोर इनकार करबे।” अउ ओहर बाहर जाए के फुईट-फुईट के रोए लागिस।