मत्ती 23 - सरगुजिया बाइबिल

शास्त्री अउ फरीसी मन कर आलोचना

¹ तब यीशु हर भीड़ ले अउ अपन चेला मन ले कहिस,

² शास्त्री अउ फरीसी मन मूसा कर आसन मे बईठिन है;

³ एकरे बर ओमन तुमन ले जे कुछ कही ओहिच ला करिहा, अउ मानिहा, लेकिन ओमन जईसन बुता झिन करिहा; काबर कि ओमन कहथे लेकिन नी करथे।

⁴ ओमन मन एक एसन भारी बोझ ला जेमन मन ला उठाए बर कठिन है, बाएध के ओला लोग मन कर खांध मे रखथे, लेकिन अपन मन ओला अपन ओगली ले भी सरकेक नी चाहथे।

⁵ ओमन मन अपन सबेच बुता ला लोग मन ला देखाए बर करथे: ओमन मन अपन ताबीज मन ला चवड़ा करथे अउ अपन कपरा मन कर कोर मन ला बगरा करथे।

⁶ भोज मे मुख्य-मुख्य जगहा अउ अराधनालय मे मुख्य-मुख्य आसन,

⁷ अउ बजार मन मे नमस्कार, अउ लोग मन ले गुरू कहलाए बर ओमन मन ला बड़िया लागथे।

⁸ लेकिन तुमन गुरू झिन कहलईहा, काबर कि तुमन कर एगोठ गुरू है, अउ तुमन सबेच भाई हवा।

⁹ अउ धरती मे कोनो ला अपन दाऊ झिन कईहा, काबर कि तुमन कर एगोठ दाऊ है, जेहर स्वर्ग मे है।

¹⁰ अउ मालिक भी झिन कहलईहा, काबर कि तुमन कर एगोठ स्वामी है, मने कि मसीह।

¹¹ जेहर तुमन मे बड़खा होही, ओहर तुमन कर सेवक बनही।

¹² जे कोनो अपन आप ला बड़खा बनाही, ओला छोटे करल जाही: अउ जे कोनो हर अपन आप ला छोटा बनाही, बड़खा करल जाही।

¹³ हे कपटी शास्त्री मन अउ फरीसी मन, तुमन मन पर हाए! तुमन मैनसे मन कर बिरोध मे स्वर्ग कर राएज कर दूरा ला ढाकथा, न त अपन ही ओमे ढुकथा अउ न ओमे ढुकईया मन ला ढुके बर देथा।

¹⁴ (हे कपटी शास्त्री अउ फरीसी मन, तुमन मन पर हाए! तुमन बिधवा मन कर घर मन ला खाए देथा, अउ देखाए बर ढेरेच देरी तक प्रार्थना करत रथा: एकरे बर तुमन मन ला ढेरेच सजा मिलही)।

¹⁵ हे कपटी शास्त्री मन अउ फरीसी मन, तुमन उपर हाए! तुमन एक झन ला अपन मत मे लाए बर सबेच पानी अउ जमीन मे फिरथा, अउ जब ओहर मत मे आए जाथे, त ओला अपन ले दूना नरक कर भागी बनाथा।

¹⁶ हे अन्धवा अगुवा मन, तुमन उपर हाए! जे कहथा कि अगर कोनो मन्दिर कर कसम खाही त कुछ नही, लेकिन अगर कोनो हर मंदिर कर सोना कर कसम खाथे त ओकर ले बईंध जाही।

¹⁷ हे मूर्ख अउ अन्धवा मन, कोन बड़खा है; सोना या मन्दिर जेकर ले सोना हर पवित्र होथे?

¹⁸ फिर कहथा कि अगर कोनो बेदी कर कसम खाथे त कुछ नही, लेकिन जे भेंट ओमे है अगर कोनो ओकर कसम खाही त बईंध जाही।

¹⁹ हे अन्धवा मन, कोन बड़खा है; भेंट या बेदी जेकर ले भेंट पवित्र होथे?

²⁰ एकर ले जेहर बेदी कर कसम खाथे, ओहर ओकर अउ जे कुछ ओमे है, ओकर भी कसम खाथे।

²¹ जेहर मन्दिर कर कसम खाथे, ओहर ओकर अउ ओमे रहे बाला मन भी कसम खाथे।

²² जेहर स्वर्ग कर कसम खाथे, ओहर परमेश्वर कर सिंहासन कर अउ ओमे बईठोईहा मन कर भी कसम खाथे।

²³ हे कपटी शास्त्री मन अउ फरीसी मन, तुमन मन पर हाए! तुमन मन पोदीने, अउ सौप, अउ जीरा मन कर दसवां हिस्सा ला त देथा, लेकिन ब्यवस्था कर गंभीर गोएठ मन ला मने कि न्याय, अउ दया, अउ बिश्वास ला छोएड़ देहे हवा, चाहे रहिस कि एमन मन ला भी करत रहता, अउ ओमन ला भी झिन छोड़ता।

²⁴ हे अन्धवा अगुवा मन, तुमन मन मच्छर ला त छाएन देथा लेकिन ऊट ला लील जाथा।

²⁵ हे कपटी शास्त्री अउ फरीसी मन, तुमन मन पर हाए! तुमन मन कटोरी अउ छीपा मन ला उपर ले त मांजथा लेकिन भीतर अन्धार अउ असंयम ले भरल आहे।

²⁶ हे अन्धवा फरीसी मन, आगू कटोरा अउ छीपा ला भीतरी ले मांजा कि ओमन मन ला बाहर ले भी साफ होए।

²⁷ हे कपटी शास्त्री मन अउ फरीसी मन, तुमन मन पर हाए, तुमन मन चूना पोतल कबर कर नियर हा जेहर उपर ले त बड़िया दिखथे, लेकिन भीतरी मरल मन कर हाड़ा अउ सबेच नियर के कचरा मन ले भरिस आहे।

²⁸ एहिच नियर तुमन मन भी उपर ले लोग मन ला धर्मी दिखाई देथा, लेकिन भीतर कपट अउ अधर्म ले भरल हा।

²⁹ हे कपटी शास्त्री मन अउ फरीसी मन, तुमन मन पर हाए! तुमन अगमजानी मन कर कबर मन ला संवारथा अउ धर्मी मन कर कबर मन ला बनाथा।

³⁰ अउ कहथा, अगर हमन अपन बाप दादा मन कर दिन मन मे रहतेन त अगमजानी मन हत्या मे ओमन मन कर साझी झिन होतेन।

³¹ एकर ले त तुमन मन अपन पर अपन ही गवाही देथा कि तुमन मन अगमजानी मन कर हत्यारा कर संतान हवा।

³² तले तुमन अपन बाप-दादा मन कर पाप कर घड़ा पूरी तरह भईर देवा।

³³ हे साप मन, हे करैत मन कर छउवा मन, तुमन नरक कर सजा ले कईसे बचिहा?

³⁴ एकरे बर देखा, मैहर तुमन मन जग अगमजानी मन अउ ज्ञानी मन अउ शास्त्री मन ला भेजथो, अउ तुमन मन ओमन मन ले कुछ मन ला माएर डालिहा, अउ क्रूस पर चड़हईहा, अउ कुछ मन ला अपन अराधनालय मन मे कोड़ा मारिहा अउ एक नगर ले दूसर नगर मे खदेड़त फिरिहा।

³⁵ जेकर ले धर्मी हाबिल ले ले के बिरिक्याह कर बेटा जकर्याह तक, जेला तुमन मन्दिर अउ बेदी कर मांझा मे माएर देहे रहा, जेतेक धर्मी मन कर लहू धरती मे बहाल गईस है ओहर सबेच तुमन कर मूड़ मे पड़ही।

³⁶ मैहर तुमन मन ले सहिच कहथो, ये सबेच गोएठ ये समय कर लोग मन पर आए पड़ही।

यीशु कर यरूशलेम शहर पर बिलाप

³⁷ “हे यरूशलेम, हे यरूशलेम! तुमन मन जे अगमजानी मन ला माएर देथा, अउ जेमन तुमन मन जग भेजल गईन, ओमन मन उपर पखना मारथा। केतेक तोर मैहर चाहे कि जईसन मुरगी अपन छउवा मन ला अपन डेना मन कर खाल्हे जमा करथे, ओहिच नियर मैहर भी तोर छउवा मन ला जुटाथे, लेकिन तुमन मन नी चाहा।

³⁸ देखा, तुमन मन कर घर तुमन बर उजड़े बर छोएड़ देहल जाथे।

³⁹ काबर कि मय तुमन ले कहथो, कि अब ले जब तक तुमन नी कईहा, ‘धन्य हे ओहर, जेहर प्रभु कर नाव ले आथे’ तब तक तुमन मन मोला फिर कभो नी देखिहा।”