मत्ती 22 - सरगुजिया बाइबिल

शादी के प्रीति भोज कर कहानी

¹ एकर पर यीशु फिर ओमन मन ले कहानी मे कहे लागिस।

² स्वर्ग कर राएज, ओ राजा कस है। जेहर अपन बेटा कर शादी करिस।

³ अउ ओहर अपन कमिया मन ला भेजिस कि नेवता बाला लोग मन ला शादी कर प्रीति भोज मे बुलवईस, लेकिन ओमन मन आए बर नी चाहिन।

⁴ फिर ओहर अउ कमिया मन ला ये कह कर भेजिस कि नेवता बाला लोग मन ला कईहा। देखा मैहर प्रीति भोज तियार कईर लेहे हो, मोर घर कर पालल जानवर अउ पोसल पशु माएर लेहे हो। अउ सबेच कुछ हर तियार है। शादी कर प्रीति भोज मे अईहा।

⁵ लेकिन ओमन मन मना कईर के चईल देहिन। कोनो हर अपन खेत ला, कोनो हर अपन ब्यवपार ला।

⁶ अउ दूसर लोग मन जेमन बचत रहिन, ओकर कमिया मन ला, पकेड़ के ओमन मन कर अनादर करिन, अउ माएर देहिन।

⁷ तब राजा ला गुस्सा अईस। अउ ओहर अपन सेना मन ला भेज के ओमन मन ला हत्यारा मन ला नाश करिस। अउ ओमन मन कर नगर मन ला फूईक देहिस।

⁸ त ओहर अपन कमिया मन ला कहिस, शादी कर प्रीति भोज हर त तियार है, लेकिन नेवता बाला लोग मन सही नी ठहरिन।

⁹ एकर बर चवराहा मन मे जावा अउ जेतेक लोग मन तुमन मन ला मिलही, सबेच झन ला शादी कर प्रीति भोज मे बुलाए लेईहा,

¹⁰ तले ओ दासो मन हर सड़क मे गईन अउ का बुरा, का भला, जेतेक भेटईन, सबेच मन ला जमा करिन, अउ शादी कर घर मे अतिथि मन ले भईर गईस।

¹¹ जब राजा हर मेहमान मन ला देखे बर भीतरी अईस, त ओहर हुवा एक आदमी ला देखिस, जेहर शादी कर कपरा ला नी पहिरे रहिस।

¹² राजा हर ओकर ले पुछिस, हे साथी, तय हर शादी कर कपरा बिन पहिरे हिया काबर आए। ओकर मुह हर बन्द होए गईस।

¹³ त राजा हर कमिया मन ला कहिस। एकर हाथ-गोड़ ला बाएध कर ओला बहरी कती अन्धार मे डाएल दा, हुवा रोना अउ दांत पिसेक होही।

¹⁴ काबर कि बुलाल मन त ढेरेच झन है लेकिन चुनल मन तनिक अकुन है।

कैसर ला मलगुजारी देहई

¹⁵ त फरीसी मन जाएन कर अपन मे बिचार करिन। कि ओला कोनो कस गोएठ मे फसाब।

¹⁶ तले ओमन मन अपन चेला मन ला हेरोदी मन कर संग, ओकर ठन ये कहे बर भेजिस, हे गुरू हमन जानथन कि तय सच्चा हस। अउ परमेश्वर कर डगर सहिच ला सिखाथस, अउ कोनो मन कर परवाह नी करथस काबर कि आदमी मन कर मुह देख के गोएठ नी करथस।

¹⁷ एकरे बर हमन ला बता तोर का बिचार है? कैसर ला मलगुजारी देहे बर सही है कि नही।

¹⁸ यीशु हर ओमन मन कर दुष्टता ला जाएन के कहिस, हे कपटी, मन मोला काबर परखत हा?

¹⁹ मलगुजारी कर सिक्का ला मोला दिखावा। त ओमन मन ओकर ठन एक दीनार ला लानिन।

²⁰ ओहर ओमन मन ले पुछिस, ये छाप अउ नाव काकर है?

²¹ ओमन मन हर ओके ला कहिस, “कैसर कर।” त ओहर ओकर ले कहिस, “त जेहर कैसर कर है, ओला कैसर ला, अउ जेहर परमेश्वर कर है, ओला परमेश्वर ला देवा।”

²² एला सुईन के ओमन अकचकाए गईन, अउ ओला छोएड़ के चईल देहिन।

पुनरुत्थान अउ शादी

²³ ओहिच रोज सदूकी मन जेमन कहथे, कि मरल मन कर पुनरुत्थान हैईच नही, यीशु ठन आए के, ओकर ले पुछिन,

²⁴ हे गुरू, मूसा हर कहे रहिस, कि अगर कोनो आदमी हर बिन संतान कर मईर जाही, त ओकर भाई ओकर घरदारिन ले शादी कईर के अपन भाई बर बंश पैदा करही।

²⁵ अब हमर हिया सात झन भाई मन रहिन। पहिला हर शादी कईर के मईर गईस, अउ संतान नी होईस अउ ओहर मईर गईस, अउ अपन घरदारिन ला अपन भाई बर छोएड़ देहिस।

²⁶ एहिच कस दूसर अउ तीसरा मन भी करिन अउ सातोच मन जग एहिच कस होईस।

²⁷ एकर पाछू मे ओ महिला हर भी मईर गईस।

²⁸ एकरे बर ओहर जी उठे कर बाद मे ओहर सातोच मन मे ले काकर घरदारिन होही? काबर कि ओहर सबेच झन कर घरदारिन बन गए रहिस।

²⁹ यीशु हर ओमन मन ला उत्तर देहिस। तुमन मन पवित्रशास्त्र अउ परमेश्वर के सामर्थ ला नी जानथा। एकरे बर भुल मे पड़े हा।

³⁰ काबर कि जी उठे कर बाद मे ओमन मन मे शादी-बिवाह नी होही। लेकिन ओहर स्वर्ग मे दूत मन कर नियर होही।

³¹ लेकिन मरल मन कर जी उठे कर बारे मे तुमन मन ये बचन ला नी पड़हे हा, जेला परमेश्वर हर तुमन ले कहिस।

³² मैहर अब्राहम कर परमेश्वर, अउ इसहाक कर परमेश्वर, अउ याकूब कर परमेश्वर हो? ओहर मरल मन कर नही लेकिन जिन्दा मन कर परमेश्वर है।

³³ एला सुईन के लोग मन ओकर उपदेश ले चकित होईन।

सबले बड़खा हुकूम

³⁴ जब फरीसी मन हर सुनिन कि यीशु हर सदूकी मन कर मुंह ला बन्द कईर देहिस, त ओमन मन जमा होईन।

³⁵ ओमन मन ले एक ब्यवस्थापक हर ओला परखे बर ओकर ले पुछिस,

³⁶ हे गुरू ब्यवस्था हर ले कोन हुकूम हर बड़खा है।

³⁷ ओहर ओकर ले कहिस, तय हर परमेश्वर अपन प्रभु ला अपन सबेच मन अउ अपन सबेच प्रान अउ अपन सबेच बुईध कर संग प्रेम करिहा।

³⁸ बड़खा अउ मुख्य हुकूम त एहिच है।

³⁹ अउ ओहिच नियर दूसर भी है, कि तय अपन पड़ोसी ला अपन नियर प्रेम रख।

⁴⁰ ये हर ही दूई हुकूम सबेच ब्यवस्था अउ अगमजानी मन कर अधार है।

मसीह दाऊद कर बेटा या दाऊद कर प्रभु है?

⁴¹ जब फरीसी मन जमा होईन, त यीशु हर ओला पुछिस,

⁴² मसीह कर बिषय मे तुमन मन का समझथा? ओहर काकर बेटा है? ओमन मन ओकर ले कहिन, “दाऊद कर।”

⁴³ ओहर ओमन मन ला पुछिस, त दाऊद हर आत्मा मे होए के, ओला प्रभु काबर कहथे?

⁴⁴ प्रभु हर, मोर प्रभु ले कहिस, मोर जेवनी बईठ, जब ले कि मैहर तोर बैरी मन ला तोर गोड़ कर खाल्हे नी कईर देहू।

⁴⁵ भला, जब दाऊद हर ओला प्रभु कहथे। त ओहर ओकर बेटा कईसे ठहरिस?

⁴⁶ एकर उत्तर मे कोनो हर भी एक भी गोएठ नी कह सकिन, ओ दिन ले कोनो ला फिर ओला कुछ पूछे कर साहस नी होईस।