मत्ती 21 - सरगुजिया बाइबिल

यीशु कर यरूशलेम शहर मे बिजय अवई

¹ जब यीशु अउ ओकर चेला मन यरूशलेम शहर के लिघे मे पहुचिन अउ जैतून पहार के बैतफगे कर लिघे अईन, त यीशु हर दुई चेला मन ला ये कहलाए भेजिस,

² आगू कर गाव मे जावा, हुवा पहुच के एक गदहा हर बांधल मिलही, अउ ओकर संग मे ओकर छउवा तुमन मन ला मिलही, ओला ढील के मोर जग मे ले लाना।

³ अगर तुमन मन ले कोनो हर कुछ कही, त कईहा कि प्रभु ला एकर जरूरत है, त ओमन मन हर ओला तुरतेच भेज देही।

⁴ एहर एकरे बर होही कि जे बचन ला अगमजानी मन कर द्वारा कहल गए रहिस, ओहर पूरा होए।

⁵ “सिय्योन देश कर बेटी ले कहा, ‘देख, तोर राजा हर तोर लिघे आत है। ओहर नम्र है, अउ गदहा मे बईठिस है; बरन गदहा कर छउवा मे।’”

⁶ चेला मन जाए के, जेकस यीशु हर ओमन ला कहे रहिस, ओहिच कस करिन।

⁷ अउ गदहा अउ छउवा ला, लाएन के ओकर उपर मे अपन कपरा मन ला ओड़हईन, अउ यीशु हर ओकर उपर मे बईठ गईस।

⁸ अउ ढेरेच लोग मन अपन कपरा ला डगर मे बिछईन अउ दूसर लोग मन हर रूख मन कर डार मन ला काएट के डगर मे बिछईन।

⁹ अउ जेमन मन भीड़ के आगू-आगू जात रहिन, अउ पाछू-पाछू रेंगत आत रहिस, पुकाएर-पुकाएर के कहत रहिन, “दाऊद कर संतान ला होशाना; धन्य हे, ओहर जेहर प्रभु कर नाव ले आथे, अकाश मे होशाना।”

¹⁰ जब यीशु हर यरूशलेम शहर मे घुसिस, त सबेच नगर मे हल्ला-गुल्ला होए लागिस, अउ लोग मन कहे लागिन, “एहर कोन है?”

¹¹ लोग मन हर कहिन, “एहर गलील परदेस कर नासरत नगर कर अगमजानी यीशु है।”

मन्दिर ले ब्यपारी मन कर हिकलई

¹² यीशु हर परमेश्वर कर मन्दिर मे जाए के, ओ सबेच झन ला जेमन मन मन्दिर मे खरीद-बिक्री करत रहिन, हिकाएल देहिस, अउ सर्राफा मन कर पिड़हा अउ परेवा बेचे बाला मन कर चौकी मन ला उलट देहिस।

¹³ अउ ओमन ले कहिस, “लिखल है, मोर घर हर प्रार्थना कर घर कहलाही, लेकिन तुमन ओला डाकू मन कर खोह बनाए लेहे हवा।”

¹⁴ त अन्धवा अउ लंगड़ा मन हर मन्दिर मे ओकर लिघे अईन अउ ओहर ओमन मन ला चंगा करिस।

¹⁵ लेकिन जब प्रधान याजक मन अउ शास्त्री मन हर ये अदभुत बुता मन ला जेला ओहर करिस, अउ छउवा मन ला मन्दिर मे, दाऊद कर संतान ला होशाना, चिकरत देखिस, त ओहर खिसयाए गईस,

¹⁶ अउ ओकर ले कहे लागिन, “का तय हर सुनथस, कि एहर का कहथे? यीशु हर ओकर ले कहिस, हवो, का तुमन ये कभो नी पड़हे हवा: छउवा मन अउ दूध पीयत छउवा मन कर मुह ले तय हर अपार स्तुति कराए हस?”

¹⁷ त यीशु हर ओला छोड़ाए के नगर कती बैतनिय्याह नगर गईस, अउ हुवा राएत गूजारिस।

अंजीर कर रूख ले शिक्षा

¹⁸ भिनसरहा मे जे घनी ओहर नगर मे ले फिरत रहिस त ओला भूख लागिस।

¹⁹ अउ अंजीर कर रूख ला सड़क कर किनारे मे देख के यीशु हर ओकर लिघे मे गईस, अउ पतई मन ला छोएड़ ओमे अउ कुछ नी पईस, त ओकर ले कहिस, अब ले तोर मे फिर कभो फर नी लगही, अउ अंजीर कर रूख हर तुरतेच सुईख गईस।

²⁰ एला देख के चेला मन अकचकाए गईन, अउ कहिन ये अंजीर कर रूख हर तुरतेच कईसे सुईख गईस?

²¹ यीशु हर ओमन मन ला उत्तर देहिस, “मैहर तुमन मन ले सहिच कहथो, अगर तुमन मन बिश्वास रखिहा अउ शंका नी करिहा त न केबल ये करिहा त जेकस ये अंजीर कर रूख ले करल गईस है, लेकिन अगर ये पहार ले भी कईहा, कि उखेड़ जा, अउ समुन्दर मे जाए पड़, त एहर होए जाही।”

²² अउ जे कुछ ला तुमन मन प्रार्थना मे बिश्वास ले मांगिहा ओ सबेच हर तुमन मन ला मिल जाही।

यहूदी मुखिया मन कर यीशु के अधिकार पर सन्देह

²³ यीशु हर मन्दिर मे जाए के उपदेश करत रहिस, त प्रधान याजक अउ लोग मन कर पुरनिए मन हर ओकर लिघे आए के पुछिन, तय ये बुता ला काकर अधिकार ले करथस? अउ तोला ये अधिकार कोन हर देहिस है?

²⁴ यीशु हर ओला उत्तर देहिस, मैहर तुमन ले एक गोएठ पूछथो, अगर ओला मोला बताए देईहा, त मैहर भी तुमन ला बताहु, कि ये बुता ला कोन अधिकार ले करथो।

²⁵ यूहन्ना कर बपतिस्मा हर कहा कती ले रहिस? स्वर्ग कती ले या लोग मन कती ले? तब ओमन मन अपन मे गोठियाए लागिन। अगर हमन कहब कि स्वर्ग कती ले त ओहर हमन ला कही? फिर तुमन मन हर ओकर बिश्वास काबर नी करा?

²⁶ अउ अगर कहब, लोग मन कती ले, त हमन ला भीड़ कर डर है, काबर कि ओमन मन हर सबेच झन मन यूहन्ना ला अगमजानी मानत रहिन।

²⁷ तले ओमन मन यीशु ला उत्तर देहिन, हमन नी जानी। यीशु हर भी ओमन मन ले कहिस, त मैहर भी तुमन ला नी बताओ, कि ये बुता ला कोन अधिकार ले करथो।

दूई बेटा मन कर कहानी

²⁸ तुमन काबर सोचथा? कोनो मैनसे मन कर दूई झन बेटा रहिस, ओहर आगू बाला कर लिघे जाए के कहिस, हे बेटा अझे दाख कर बारी मे बुता कर।

²⁹ ओहर उत्तर देहिस, मैहर नी जाहू। लेकिन पाछू मे पछतईस अउ गईस।

³⁰ फिर दाऊ हर दूसर बेटा कर लिघे जाए के एहिच कस कहिस, ओहर उत्तर देहिस, “जी हव जात हो।” लेकिन नी गईस।

³¹ ये दुईयोच झन मे ले कोन हर दाऊ कर इक्छा ला पूरा करिस? ओमन कहिन, आगू कर हर। यीशु हर ओकर ले कहिस, “मैहर तुमन ले सहिच कहथो, कि महसूल लेहे बाला अउ बेश्या मन, तुमन ले आगू परमेश्वर कर राएज मे घुसही।”

³² काबर कि यूहन्ना हर धर्मी कर डगर ले तुमन मन कर लिघे अईस, अउ तुमन मन ओकर पर बिश्वास नी करा, पर मलगुजारी लेहे बाला अउ बेश्या मन हर ओकर बिश्वास करिन: अउ तुमन मन एला देख के पाछू मे भी नी पछताए कि ओकर बिश्वास कईर लेतेन।

दुष्ट किसान मन कर कहानी

³³ एक अउ कहानी सुना, एक घरदार रहिस, जेहर दाख कर बारी लगईस, ओकर चाएरो कती, घोरना घोरिस। अउ ओमे रस कर कुण्ड खोदिस अउ गुम्मट बनईस, अउ किसान मन ला ओकर ठिका दे के दूसर देश चईल देहिस।

³⁴ जब फर कर समय लिघे अईस, त ओहर अपन कमिया मन ला ओकर फर लेहे बर किसान मन जग भेजिस।

³⁵ लेकिन किसान मन हर ओकर कमिया मन ला धईर के कोनो ला पीटिन अउ कोनो ला माएर देहिन अउ कोनो ला पखना ले मारिन।

³⁶ फिर ओहर अउ कमिया मन ला भेजिस जेमन मन आगू ले ढेरेच रहिन; अउ किसान मन ओमन मन ले भी ओहिच कस करिन।

³⁷ आखरी मे ओहर अपन बेटा ला ओकर लिघे मे ये सोएच के भेजिस कि ओमन मन हर मोर बेटा कर आदर करही।

³⁸ लेकिन किसान मन हर बेटा ला देख कर अपन मे कहिन, ये बेटा हर त वारिस है। आवा एला माएर डालब। अउ एकर भी मीरास ला ले लेहब।

³⁹ अउ ओमन मन ओला पकड़िन अउ दाख कर बारी ले बाहर कती हिकाएल के माएर देहिन।

⁴⁰ एकर बर जे घनी दाख कर बारी कर स्वामी आही त ओ किसान मन कर संग का करही?

⁴¹ ओमन ओला कहिन, ओहर ओ बुरा लोग मन ला बुरी रीति ले नाश करही। अउ दाख कर बारी कर ठेका दूसर किसान मन ला देही, जे समय मे ओला फर देही।

⁴² यीशु हर ओमन मन ले कहिस, का तुमन मन हर कभो पवित्रशास्त्र मे ये नी पड़हे हवा, “जे पखना ला राजमिस्त्री मन हर निकम्मा ठहराए रहिन, ओहिच हर कोनहा कर सिरा कर पखना होए गईस? एहर प्रभु कती ले होईस, अउ हमर नजर मे अदभुत है।”

⁴³ एकर बर मैहर तुमन ला कहथो कि परमेश्वर कर राएज तुमन मन ले लेहल जाही। अउ एकस जाएत जेहर ओकर बर फर लानही, देहल जाही।

⁴⁴ जेहर ये पखना मे गिरही, ओहर चकना चूर होए जाही, अउ जेकर मे ओ पखना हर गिरही, ओला पीस देही।

⁴⁵ प्रधान याजक अउ फरीसी मन ओकर कहानी मन ला सुईन के समझ गईन कि ओहर हमर बारे मे कहत रहिस।

⁴⁶ अउ ओमन ओला पकड़वाए बर चाहत रहिन, लेकिन लोग मन ला डईर गईन, काबर कि ओमन यीशु ला अगमजानी मानत रहिन।