मत्ती 19 - सरगुजिया बाइबिल

तलाक बर प्रश्न

¹ जब यीशु ये गोएठ मन ला कह दारिस, तब गलील परदेस मे चईल गईस, अउ यरदन नदी कर ओ पार यहूदिया परदेस मे अईस।

² त बड़खा भीड़ ओकर पाछू होए लेहिस, अउ ओहर हुवा ओला चंगा करिस।

³ तब फरीसी मन ओकर परीक्षा लेहे बर लिघे आए कर कहे लागिन, का हर एक कारन ले अपन घरदारिन ला छोएड़ देहे बर सही है?

⁴ ओहर उत्तर देहिस, का तय हर नी पड़हे हस कि जेहर तोला बनईस है, ओहर शुरू ले ही नर अउ नारी बनाए के कहिस।

⁵ एहिच कारन मैनसे मन हर अपन दाऊ-दाई ले अलगेच होए के अपन घरदारिन कर संग मे रही, अउ ओमन मन दोनोच एक देह होही।

⁶ तले अब ओमन मन अब दुई झन नही, लेकिन एक अंग है, एकरे बर जेला परमेश्वर हर जोड़िस है ओला मैनसे मन अलग झिन करे।

⁷ ओमन मन हर यीशु ले कहिन, “फिर मूसा हर ये काबर ठहरईसे कि त्याग-पत्र दे के ओला छोएड़ दे?”

⁸ यीशु हर ओमन मन ले कहिस, मूसा हर तुमन मन कर कठोर होए कर कारन तुमन मन ला अपन-अपन घरदारिन ला छोएड़ देहे कर हुकूम देहिस। लेकिन शुरू ले एकस नी रहिस।

⁹ अउ मैहर तुमन ले कहथो, कि जे कोनो हर ब्यभिचार ला छोएड़ अउ कोनो कारन ले अपन घरदारिन ला छोएड़ के तलाक दे के दूसर ले बिवाह करही, ओहर ब्यभिचार करथे, अउ जेहर ओ छुटल ला बिवाह करथे, ओहर भी ब्यभिचार करथे।

¹⁰ चेला मन यीशु ले कहिन, अगर आदमी के घरदारिन कर संग एकस रिश्ता हे, त शादी करे ले बड़िया नी है,

¹¹ ओहर ओमन ले कहिस, सबेच झन मन ये बचन ला अपनाए बर नी सकथे। केबल ओमन मन ला जेमन ला ये दान देहल गईस हे।

¹² काबर कि कुछ मन नपुंसक एसन हे, जेहर दाई कर गर्भ ही ले एकस जनमिन है। अउ कुछ मन नपुंसक एकस हे जेला मैनसे मन हर नपुंसक बनईन। अउ कुछ मन नपुंसक एसन हे जेमन मन हर स्वर्ग कर राएज बर अपन आप ला नपुंसक बनईन है, जेहर एला गरहन कईर सकत हे, ओहर गरहन करे।

छउवा मन ला आशीर्वाद देहई

¹³ तब लोग मन छउवा ला ओकर लिघे लानिन, कि यीशु हर ओमन मन पर हाथ रखही, अउ बिनती करही लेकिन चेला मन ओमन मन ला डाटिन।

¹⁴ यीशु हर कहिस, “छउवा मन ला मोर लिघे आए देवा, अउ ओमन मन ला मना झिन करा, काबर कि स्वर्ग कर राएज हर एहिच मन कर है।”

¹⁵ अउ यीशु हर ओमन मन पर हाथ रईख के, हुवा ले चईल देहिस।

धनी जवान आदमी कर महत्वपूर्ण प्रश्न

¹⁶ अउ एक मैनसे हर यीशु कर लिघे अईस अउ ओकर ले कहिस, हे गुरू मैहर कोन सा भला बुता करहू कि अनन्त जीवन ला पाहू?

¹⁷ यीशु हर ओकर ले कहिस, तय हर मोला भलाई कर बारे मे काबर पूछथस, भला त एक झन ही है, अगर तय जीवन मे घुसे बर चाहथस, त हुकूम मन ला माएन ले।

¹⁸ ओहर यीशु ले कहिस, कोन सा हुकूम ला? यीशु हर कहिस, “ये कि हत्या झिन करिहा, ब्यभिचार झिन करिहा, चोरी झिन करिहा, झूठ कर गवाही झिन देईहा;

¹⁹ अपन दाऊ-दाई कर आदर करिहा अउ अपन पड़ोसी ला अपन नियर प्रेम करिहा।”

²⁰ ओ जवान हर यीशु ला कहिस, ये सबेच ला त मैहर मानथो, अझे मोला कोन बात मे कमी है?

²¹ यीशु हर ओला कहिस, अगर तय सिद्ध होए बर चाहथस त जा अपन माल ला बेच के कंगाल मन ला दे दे। अउ तोला स्वर्ग मे धन मिलही, अउ आए के मोर पाछू होए ले।

²² लेकिन ओ जवान हर ये गोएठ ला सुईन के उदास होए के चईल देहिस, काबर कि ओहर ढेरेच धनी रहिस।

²³ तब यीशु हर अपन चेला मन ले कहिस, मैहर तुमन मन ले सहिच कहथो, कि धनी हर स्वर्ग कर राएज मे घुसे बर कठिन है।

²⁴ तुमन मन ला फिर से कहथो कि परमेश्वर कर राएज मे धनवान कर घुसे ले ऊट के सूई कर नाका मे ले हिकेल जाए बर सहज है।

²⁵ एला सुईन के चेला मन ढेरेच अकचकाए के कहिन, फिर काकर उद्धार होए सकथे?

²⁶ यीशु हर ओमन मन कती देख के कहिस, लोग मन ले एहर नी होए सकथे, लेकिन परमेश्वर ले सबेच कुछ होए सकथे।

²⁷ एकर बर पतरस हर ओकर ले कहिस, देख हमन त सबेच कुछ ला छोएड़ के तोर पाछू मे होए लेहे हन। त हमन ला का मिलही?

²⁸ यीशु हर ओमन ले कहिस, मैहर तुमन मन ला सहिच कहथो, कि नावा सृष्टि मे जब मैनसे कर बेटा अपन महिमा कर सिंहासन मे बैठही त तुमन भी, जेहर मोर पाछू मे होए लेहे हा, बारह सिंहासन मन मे बईठ के इस्राएल के बारह गोत्र मन कर न्याय करिहा।

²⁹ अउ जे कोनो हर घर मे या भाई या बहिन, या दाऊ या दाई या छउवा या खेत मन ला मोर नाव बर छोएड़ देहिन है, ओके ला सौ गुना भेटाही, अउ ओहर अनन्त जीवन कर अधिकारी होही।

³⁰ लेकिन ढेरेच झन जेमन आगू है, पाछू होही, अउ जेमन पाछू है, ओमन मन आगू होही।