मत्ती 12 - सरगुजिया बाइबिल

यीशु बिश्राम दिन कर भी प्रभु

¹ ओ समय यीशु बिश्राम कर दिन खेत मन ले होए के जात रहिस, अउ ओकर चेला मन ला भूख लागिस, अउ ओमन मन बाएल मन ला टोएर-टोएर के खाए लागिन।

² फरीसी मन एला देख के ओमन ले कहिस, “देख तोर चेला मन ओ बुता ला करथे, जेला बिश्राम कर दिन करे बर ठीक नी है।”

³ यीशु मसीह हर ओमन ले कहिस, “का तुमन नी पढ़े हवा, कि दाऊद हर, जब ओला अउ ओकर संगता मन ला भूख लागिस त का करिन?

⁴ ओहर कईसे परमेश्वर कर घर मे गईस, अउ भेंट कर रोटी मन ला खईन, जेला खाए बर न त ओला अउ न ओकर संगता मन ला पर केबल याजक ला उचित रहिस?

⁵ का तुमन हर ब्यवस्था मे नी पड़हे हवा कि याजक सब्त कर दिन मन्दिर मे बिधी ला तोड़े ले भी निर्दोष ठहरथे?

⁶ पर मय हर तुमन ले कहथो, कि हिया ओहर है जेहर मन्दिर ले भी बड़खा है।

⁷ अगर तुमन एकर अर्थ ला जानथा, कि मैहर दया ले खुश होथो, बलिदान नही, त तुमन निर्दोष ला दोषी नी ठहराथा।

⁸ मैनसे कर बेटा हर त बिश्राम कर दिन कर भी प्रभु है।”

सुखल हाथ बाला मैनसे हर

⁹ हुवा ले चईल के यीशु ओमन मन कर अराधनालय मे अईस।

¹⁰ हुवा एक लोग हर रहिस, जेकर हाथ सुखल गए रहिस। ओमन मन यीशु कर उपर दोष लगाए बर ओकर ले पुछिन, “का बिश्राम कर दिन चंगा करे बर सही है?”

¹¹ यीशु हर ओमन ले कहिस, “तुमन मन ले एसन कोन है जेकर एगोठ भेड़ होही, अउ ओहर बिश्राम कर दिन गड़हा मे गिर जाही, त ओहर ओला धईर के नी हिकालही?

¹² भला, लोग मन कर किमत भेड़ ले केतेक बईड़ के है! एकरे बर बिश्राम कर दिन भलाई करई उचित है।”

¹³ तब यीशु हर ओ लोग ले कहिस, “अपन हाथ ला बढ़ाव।” ओहर बड़ईस, अउ ओहर फिर ले दूसर हाथ कर नियर बड़िया होए गईस।

¹⁴ तब फरीसी मन बाहर जाए के ओकर बिरोध मे सलाह लेहिन कि ओला कईसे मे नाश करब।

परमेश्वर कर चुनल सेवक

¹⁵ एला जाएन के यीशु हुवा ले चईल गईस। अउ ढेरेच लोग मन ओकर पाछू मे होए लेहिन, अउ ओ सबेच झन मन ला चंगा करिस।

¹⁶ अउ ओमन मन ला चितईस कि मोला परगट झिन करिहा।

¹⁷ एकरे बर कि जे बचन यशायाह अगमजानी कर द्वारा कहल गए रहिस, ओहर पूरा होए:

¹⁸ “देखा, एहर मोर सेवक है, जेला मय हर चुने हवो; मोर प्रिय, जेकर ले मोर मन हर खुश है: मय हर अपन आत्मा ला ओकर मे डालहू, अउ ओहर दूसर जाएत मन ला न्याय कर सुसमाचार देही।

¹⁹ ओहर न झगरा करही, अउ न हुल्लड़ मचाही, अउ न बजार मे कोनो हर ओकर गोएठ ला सुनही।

²⁰ ओहर कुचल सरकण्डा ला नी तोड़ही, अउ कूहरा देखत दीया ला नी बुझाए। जब ले ओहर न्याय ले प्रबल नी कराही।

²¹ अउ दूसर जाएत मन ओकर नाव मे आशा रखही।”

यीशु मसीह अउ प्रेत आत्मा मन कर मुखिया

²² तब लोग मन एक अन्धा-गूंगा ला जेमे प्रेत आत्मा रहिस, ओकर लिघे लानिन; अउ ओहर ओला ठीक करिस, अउ ओहर बोले अउ देखे लागिस।

²³ एमे सबेच झन चकित होए के कहे लागिन, “एहर का दाऊद कर बेटा है!”

²⁴ लेकिन फरीसी मन एला सुईन के कहिन, “एहर त प्रेत आत्मा मन कर सरदार शैतान कर सहयोग कर बिना प्रेत आत्मा मन ला नी हिकाले।”

²⁵ ओहर ओमन कर मन कर गोएठ ला जाएन के कहिस, “जे कोनो राएज मे फुट होथे, ओहर उजेड़ जाथे; अउ कोनो नगर या घराना मे जेमे फुट होथे, बने नी रहे।”

²⁶ अउ अगर शैतान हर शैतान ला हिकालही, त ओहर अपन ही बिरोधी होए गईस है, फिर ओकर राएज कईसे बनल रही?

²⁷ भला, अगर मैहर शैतान कर सहायता ले प्रेत आत्मा मन ला हिकालथो, त तुमन कर पुरखा मन काकर सहायता ले हिकालथे? एकर बर ओहिच मन तुमन कर न्याय करही।

²⁸ लेकिन अगर मैहर परमेश्वर कर आत्मा कर सहायता ले प्रेत आत्मा मन ला हिकालथो, त परमेश्वर कर राएज तुमन मन जग आए पहुचिस है।

²⁹ या कईसे कोनो लोग हर कोनो बलवान कर घर मे घुईस के ओकर माल ला लुईट सकथे जब ले आगू ओहर ओ बलवान ला नी बाएध लेही? तब ओहर ओकर घर ला लुईट सकही।

³⁰ जेहर मोर संग मे नी है ओहर मोर बिरोध मे है, अउ जेहर मोर संग मे नी बटोरेल ओहर बगराएल।

³¹ एकरे बर मैहर तुमन ले कहथो कि लोग मन कर सबेच नियर कर पाप अउ निन्दा छमा करल जाही, लेकिन पवित्र आत्मा कर निन्दा छमा नी करल जाही।

³² जे कोनो मैनसे कर बेटा कर बिरोध मे कोनो गोएठ कही, ओकर ये अपराध छमा करल जाही, लेकिन जे कोनो हर पवित्र आत्मा कर बिरोध मे कुछूच कही, ओकर अपराध न ये लोक मे अउ न परलोक मे छमा करल जाही।

हर एक रूख हर अपन फर ले पहिचानल जाथे

³³ “अगर रूख ला बड़िया कईहा, त ओकर फर ला भी बड़िया कहा, या रूख ला बुरा कईहा, त ओकर फर ला भी बुरा कहा; काबर कि रूख हर अपन फर ले पहिचानल जाथे।

³⁴ हे साप कर छउवा मन, तुमन बुरा होए के कईसे बड़िया गोएठ कह सकथा? काबर कि जेहर मन मे भरे रहथे ओहिच हर मुह मे आथे।

³⁵ भला लोग मन हर भले भण्डार ले भला गोएठ मन ला हिकालथे, अउ बुरा लोग मन हर मन के बुरा भण्डार ले बुरा गोएठ मन ला हिकालथे।

³⁶ अउ मय तुमन ले कहथो, कि जे-जे निकम्मा गोएठ मैनसे मन करही, न्याय कर दिन सबेच गोएठ मन कर लेखा देही।

³⁷ काबर कि तय अपन गोएठ कर कारन निर्दोष अउ अपन गोएठ ही कर कारन दोषी ठहराल जाबे।”

यीशु मसीह ले स्वर्ग कर चिन्हा मांगिन

³⁸ एकर मे कुछ शास्त्री अउ फरीसी मन ओकर ले कहिन, “हे गुरू, हमन तोर ले एक चिन्हा देखे बर चाहथन।”

³⁹ ओहर ओमन ला जवाब देहिस, “ये युग कर बुरा अउ ब्यभिचारी लोग मन चिन्हा खोजथे, लेकिन योना अगमजानी कर चिन्हा ला छोएड़ कोनो अउ चिन्हा ओमन ला नी देहल जाही।”

⁴⁰ योना तीन राएत-दिन बड़खा मछरी कर पेट मे रहिस, ओहिच नियर मैनसे कर बेटा तीन राएत दिन जमीन कर भीतर रही।

⁴¹ नीनवे के लोग मन कर न्याय कर दिन ये समय कर लोग मन संग ठड़होए के ओमन मन ला दोषी ठहराही, काबर कि ओमन योना कर प्रचार ला सुईन के मन फिरईन; अउ देखा, हिया ओहर है जेहर योना ले भी बड़खा है।

⁴² इस्राएल के दक्खिन कर रानी न्याय कर दिन ये समय के लोग मन कर संग उईठ के ओमन ला दोषी ठहराही, काबर कि ओहर सुलैमान राजा कर ज्ञान ला सुने बर दुनिया कर छोर ले अईस अउ देखा, हिया ओहर है जेहर सुलैमान राजा ले भी बड़खा है।

अशुद्ध आत्मा हर घर खोजथे

⁴³ “जब अशुद्ध आत्मा हर लोग मन मे ले हिकेल जाथे त झुरा जगहा मन मे बिश्राम खोजथे फिरथे, अउ जब नी पाथे,

⁴⁴ तब कहेल, ‘मय अपन ओहिच घर मे जिहा ले हिकले रहे फिर जाहू।’ अउ फिर कर ओला सुना, झाड़ल, बुहारल अउ सजल सजाए पाथे।

⁴⁵ तब ओहर जाए के अपन ले अउ बुरा सात आत्मा मन ला अपन संग मे ले आथे, अउ ओमन मन ओ लोग मे बईठ के घुसथे, अउ ओ लोग कर पाछू कर दशा आगू ले भी बुरा होए जाथे। ये युग कर बुरा लोग मन कर दशा भी एहिच नियर होही।”

यीशु मसीह कर सहिच परिवार

⁴⁶ तब यीशु हर भीड़ ले गोठियात रहिस, त ओकर दाई अउ भाई बहिरे ठड़होए रहिन, अउ ओकर ले गोठियाए बर चाहत रहिन।

⁴⁷ कोनो हर ओकर ले कहिस, “देख तोर दाई अउ भाई बाहरी ठड़होईन है अउ तोर ले गोठियाए बर चाहथे।”

⁴⁸ एला सुईन कर ओहर कहे बाला मन ला जवाब देहिस, “कोन है मोर दाई? अउ कोन है मोर भाई?”

⁴⁹ अउ अपन चेला मन कती अपन हाथ ला बड़हाए के कहिस, “देखा मोर दाई अउ मोर भाई एमन है।”

⁵⁰ काबर कि जे कोनो मोर स्वर्गीय दाऊ कर इक्छा पर चलथे, ओहिच मोर भाई, अउ मोर बहिन, अउ मोर दाई है।