मत्ती 11 - सरगुजिया बाइबिल

यूहन्ना बपतिस्मा देहे बाला कर प्रश्न

¹ इस्राएल कर देश मे यीशु हर अपन बारह चेला मन ला आदेश दे दारिस, त ओहर ओमन कर नगर मे उपदेश अउ प्रचार करे बर हुवा ले रेंग देहिस।

² यूहन्ना हर जेल मे मसीह कर बुता मन कर समाचार सुनिस अउ अपन चेला मन ला ओकर ले पूछे बर भेजिस।

³ का आए बाला तहिच हस या हमन दूसर झन कर आसरा देखी?

⁴ यीशु हर जवाब देहिस, “जे कुछ तुमन मन सुनथे अउ देखथे ओ सबेच ला यूहन्ना ले कह देईहा।”

⁵ कि अन्धा मन देखथे अउ लंगड़ा मन चलथे फिरथे, कोढ़ी मन शुद्ध करल जाथे, अउ भईरा मन सुनथे, मुरदा मन जीलाल जाथे, अउ कंगाल मन ला सुसमाचार सुनाल जाथे।

⁶ अउ धन्य है ओमन मन, जेहर मोर कारन ठोकर नी खाही।

यीशु कर द्वारा यूहन्ना कर आदर मान

⁷ जब ओहर हुवा ले चईल देहिस, त यीशु यूहन्ना कर बिषय मे लोग मन ले कहे लागिस, “तय जंगल मे का देखे बर गए रहे? का बईहर ले हिलत सरकंडा ला?”

⁸ फिर तय का ला देखे गए रहे? का कोमल कपरा पहिनल लोग मन ला? देखा जेमन कोमल कपरा पहिनथे, ओमन राजभवन मे रहथे।

⁹ त फिर काबर गए रहा? का कोनो अगमजानी ला देखे बर? हव मैहर तोर ले कहथो कि अगमजानी ले भी बड़खा ला।

¹⁰ एहर ओहिच हर है जेकर बिषय मे लिखल आहे: देख मैहर अपन दूत ला तोर आगू भेजथो, जेहर तोर आगू तोर डगर ला तियार करही।

¹¹ मैहर तोर ले सहिच कहथो कि जे औरत मन ले जनमिस है ओमन ले यूहन्ना बपतिस्मा देहे बाला ले कोनो हर बड़खा नी होईस, पर जेहर स्वर्ग कर राएज मे छोटे ले छोटे है ओहर सबले बड़खा है।

¹² यूहन्ना बपतिस्मा देहे बाला कर दिन मन मे ले अब तक ले स्वर्ग कर राज्य मे बल ले घुसई होवत रहिस अउ बलवान हर ओला लुईट लेथे।

¹³ यूहन्ना ले सबेच अगमजानी अउ ब्यवस्था अगमजानी करत रहिन।

¹⁴ अउ चाहा त माना कि एलिय्याह जेहर आए बाला रहिस, ओहर एहिच हर है।

¹⁵ जेकर सुने कर कान है, ओहर सुईन लेहे।

¹⁶ “मैहर ये समय कर लोग मन कर तुलना काकर ले करहू? ओमन ओ लईका मन कस है, जेमन बजार मन मे बईठ के एक दूसर ले किरलाए के कहथे:

¹⁷ हमन हर तुमन बर बांसुरी ला बजाएन, अउ तुमन मन नी नाचा, हमन बिलाप करेन, अउ तुमन मन छाती नी पीटा।

¹⁸ काबर कि यूहन्ना हर न खात अईस, न पीयत, अउ ओमन कहथे, ‘ओमे प्रेत आत्मा है।’

¹⁹ मैनसे कर बेटा हर खात पीयत अईस, अउ ओमन मन कहथे, देखा, पेटू अउ पीए बाला मैनसे, मलगुजारी लेहे बाला मन कर अउ पापी मन कर संगता! लेकिन ज्ञान मे अपन बुता मन ले सहिच ठहराल गईस है।”

मन नी फिराए बाला मन पर हाए

²⁰ तब ले ओहर ओ नगर मन ला उलाहना देहे लागिस, जेमन मे ओहर बहुतेच सामर्थ्य कर अदभुत बुता करे रहिस, काबर कि ओमन अपन मन नी फिराए रहिन।

²¹ “हाए, खुराजीन! हाए, बैतसैदा! जे सामर्थ्य कर बुता तुमन मे करल गईस, अगर ओमन सोर अउ सैदा मे करल जातीस, त टाट ओएड़ के, अउ राख मे बईठ के ओमन मन कब कर मन फिराए लेतिन।

²² लेकिन मय हर तोर ले कहथो कि न्याय कर दिन तुमन कर दशा ले सोर अउ सैदा कर दसा बगरा सहे लाएक होही।

²³ अउ हे कफरनहूम नगर, का तय हर स्वर्ग ले उपरे करल जाबे? त तय अधोलोक तक खाल्हे जाबे! जे सामर्थ्य कर बुता तोर मे करल गईस है, अगर सदोम मे करल जातीस, त ओहर आएज ले बनल रहतिस।

²⁴ पर मय तोर ले कहथो कि न्याय कर दिन तोर दशा ले सदोम नगर कर दसा बगरा सहे लाएक होही।”

यीशु कर लिघे बिश्राम

²⁵ ओहिच समय मे यीशु हर कहिस, “हे दाऊ, स्वर्ग अउ पृथ्वी कर प्रभु, मैहर तोर धन्यवाद करथो कि तय हर ये गोएठ मन ला ज्ञानी मन अउ समझदार मन ले छिपाए रखे, अउ लईका मन मे परगट करे हस।

²⁶ हव, हे दाऊ, काबर कि तोला एहिच हर बड़िया लागिस।”

²⁷ “मोर दाऊ हर मोला सबेच कुछ ला सौपिस आहे; अउ कोनो हर बेटा ला नी जानथा, केबल दाऊ; अउ कोनो हर दाऊ ला नी जाने, केबल बेटा; अउ ओहर जेमन मे बेटा ओहर परगट करे बर चाही।”

²⁸ “हे सबेच मेहनत करे बाला मन अउ बोझ ले दबल लोग मन, मोर जग आवा; मय तुमन ला बिश्राम देहू।

²⁹ मोर जूवा ला अपन उपर उठाए लेवा, अउ मोर ले सिखा; काबर कि मय नम्र अउ मन मे दीन हो: अउ तुमन मन अपन मन मे बिश्राम पईहा।

³⁰ काबर कि मोर जूवा हर सहज अउ मोर बोझ हर हल्का है।”