लूका 7 - सरगुजिया बाइबिल

सूबेदार कर बिश्वास पर यीशु चकित होवई

¹ जब यीशु हर लोग मन ले ये सबेच गोएठ मन ला कह दारिस, त कफरनहूम नगर मे अईस।

² अउ कोनो सूबेदार कर एक कमिया जेहर ओकर दुलरवा रहिस, ओहर बिमार रहिस, अउ मरे बाला रहिस।

³ ओहर यीशु कर चर्चा ला सुईन के यहूदी मन कर कई पुरनिए मन ला ओकर ले बिनती करे बर ओकर लिघे भेजिस कि आए के मोर कमिया ला चंगा कईर देही।

⁴ ओमन मन यीशु कर लिघे अईन, अउ ओकर ले ढेरेच बिनती कईर के कहे लागिन, “ओहर एकर लाएक है कि तय ओकर बर एला कर,

⁵ काबर कि ओहर हमर जाएत ले प्रेम रखथे, अउ ओहिच हर हमर अराधनालय ला बनईस है।”

⁶ यीशु ओमन मन कर संग मे गईस, पर जब ओहर घर ले दुरिहा नी रहिस, त सूबेदार हर ओकर लिघे कई संगता मन कर द्वारा कहलाए भेजिस, “हे प्रभु, दुख झिन उठा, काबर कि मैहर ये लाएक नी हवो कि तय मोर छानही कर खाल्हे आबे।

⁷ एहिच कारन मैहर अपन आप ला एकर लाएक नी समझे कि तोर लिघे आव, पर बचन ही कईह दे त मोर सेवक हर ठीक होए जाही।

⁸ मैहर भी पराधीन मैनसे हो, अउ सिपाही मन मोर हाथ मे है, अउ जब एक झन ले कहथो, ‘जा,’ त ओहर जाथे; अउ दूसर ले कहथो, ‘आव,’ त ओहर आथे; अउ अपन कोनो कमिया ले कि ‘कर,’ त ओहर ओला करथे।”

⁹ एला सुईन कर यीशु ला अचम्भित होईस अउ ओहर मुंह ला मोएड़ के ओ भीड़ ले जेहर ओकर पाछू मे आत रहिन, कहिस, “मैहर तुमन मन ले कहथो इस्राएल मे भी एसन बिश्वास नी पाए।”

¹⁰ अउ भेजल लोग मन हर घर फिर के ओ कमिया ला चंगा पईन।

मरल ला जीवन दान

¹¹ तनिक दिन कर बाद मे ओहर नाईन नाव कर एक नगर मे गईस, ओकर चेला मन अउ बड़खा भीड़ ओकर संग मे जात रहिस।

¹² जब ओहर नगर कर फाटक मे पहुचिस, त देखा, लोग मन एक लाश ला बाहरी कती ले जात रहिन; जेहर अपन दाई कर एकेच झन बेटा रहिस, अउ ओहर बिधवा रहिस; नगर कर ढेरेच झन लोग मन ओकर संग मे रहिन।

¹³ ओला देख के प्रभु ला दया अईस, अउ ओकर ले कहिस, “झिन रो।”

¹⁴ तब ओहर लिघे आए के अर्थी ला छुईस, अउ उठाए बाला मन रुईक गईन। तब ओहर कहिस, “हे जवान, मय हर तोर ले कहथो, उईठ जा!”

¹⁵ तब ओ मरल मुरदा उईठ बईठिस, अउ बतियाए लागिस। ओहर ओके ला ओकर दाई ला सौप देहिस।

¹⁶ एकरे बर सबेच झन मे डर छाए गईस, अउ ओमन मन परमेश्वर कर बड़ाई कईर के कहे लागिन, “हमर मांझा मे एक बड़खा अगमजानी उठिस है, अउ परमेश्वर हर अपन लोग मन पर कृपा दृष्टि करिस है।”

¹⁷ अउ ओकर बिषय मे ये गोएठ सबेच यहूदिया अउ लिघे-लिघे कर सबेच देश मे बगेर गिस।

यूहन्ना बपतिस्मा देहे बाला कर प्रश्न

¹⁸ अउ यूहन्ना कर चेला मन ये सबेच गोएठ कर समाचार देहिस।

¹⁹ तब यूहन्ना हर अपन चेला मन ले दुई झन ला बुलवाए के प्रभु कर लिघे ये पूछे बर भेजिस, “का आए बाला तय ही हस या हमन मन कोनो अउ कर बाट जोही?”

²⁰ ओमन मन ओकर लिघे आए के कहिन, “यूहन्ना बपतिस्मा देहे बाला हर हमन मन ला तोर लिघे ये पूछे बर भेजिस है कि का आए बाला तय हस, या हमन मन काकरो अउ दूसर झन कर आसरा देखी?”

²¹ ओहिच घरी ओहर ढेरेच झन मन ला बिमार अउ दुख मन ले, अउ प्रेत आत्मा मन ले छोड़ईस; अउ ढेरेच ले अन्धवा मन ला आएख देहिस;

²² अउ ओहर ओमन मन ले कहिस, “जे कुछ ला तुमन मन देखे अउ सुने हवा, जाए के यूहन्ना ले कह देवा, कि अन्धवा मन देखथे, लंगड़ा मन रेंगथे-बुलथे, कोढ़ मन ला शुद्ध करल जाथे, बहिरा मन सुनथे, मुरदा मन जीलाल जाथे, अउ कंगाल मन ला सुसमाचार सुनाल जाथे।

²³ धन्य है ओमन मन जेहर मोर कारन ठोकर नी खाही।”

²⁴ जब यूहन्ना कर भेजल लोग मन रेंग देहिन त यीशु यूहन्ना कर बिषय मे लोग मन ले कहे लागिस, “तुमन मन जंगल मे का देखे गए रहा? का बईहर ले हिलत सरकंडा मन ला?

²⁵ त फिर तुमन का देखे गए रहा? का कोमल कपरा पहिनल मैनसे ला? देखा, जेमन मन भड़किला कपरा पहिनथे अउ सुख-बिलास ले रहथे, ओमन मन राजभवन मन मे रहथे।

²⁶ त फिर तुमन मन का देखे गए रहा? का कोनो अगमजानी ला? हव, मैहर तुमन मन ले कहथो, बरन अगमजानी ले भी बड़खा ला।

²⁷ एहर ओहिच है, जेकर बिषय मे लिखल है: ‘देखा, मैहर अपन दूत ला तोर आगू-आगू भेजथो, जेहर तोर आगू तोर डगर ला सोझ करही।’

²⁸ मैहर तुमन मन ले कहथो कि जेमन मन महिला मन ले जनमिन है, ओमन मन ले यूहन्ना ले बड़खा कोनो नी है: पर जेमन मन परमेश्वर कर राएज मे छोटे ले छोटे है, ओहर ओकर ले भी बड़खा है।”

²⁹ अउ सबेच साधारन लोग मन हर सुईन के अउ मलगुजारी लेहे बाला मन हर भी यूहन्ना कर बपतिस्मा ला ले के परमेश्वर ला सच्चा मायन लेहिन।

³⁰ लेकिन फरीसी मन अउ ब्यवस्थापक मन हर ओकर ले बपतिस्मा नी ले के परमेश्वर कर उद्देश्य ला अपन बिषय मे टाएल देहिन।

³¹ “तले मैहर ये युग कर लोग मन कर तुलना काकर ले करहू कि ओमन मन काकर नियर है।

³² ओमन मन ओ लईका मन कर नियर है, जेमन मन बजार मे बईठ के एक दूसर ले किरलाए के कहथे, ‘हमन मन हर तुमन मन बर बांसुरी ला बजाएन, अउ तुमन मन नी नाचा; हमन मन हर बिलाप करेन, अउ तुमन मन नी रोया!’

³³ काबर कि यूहन्ना बपतिस्मा देहे बाला हर न रोटी खात अईस, न दाखरस पीयत अईस, अउ तुमन मन कहत हवा, ओमे अशुद्ध आत्मा है।

³⁴ मैनसे कर बेटा हर खात पीयत अईस है, अउ तुमन मन कहथा, ‘देखा, पेटू अउ पियक्कड़ मैनसे, मलगुजारी लेहे बाला मन कर अउ पापी मन कर संगता है।’

³⁵ पर ज्ञान अपन सबेच संतान मन कर द्वारा सहिच ठहराल गईस है।”

शमौन फरीसी कर घर पापिन महिला ला क्षमा दान

³⁶ फिर कोनो फरीसी हर यीशु ले बिनती करिस कि ओहर ओकर संग भात खाए, तले ओहर ओ फरीसी कर घर मे जाए के भात खाए बर बईठिस।

³⁷ ओ नगर कर एक पापी महिला ये जाएन के कि यीशु हर फरीसी कर घर मे भात खाए बर बईठिस है, संगमरमर कर भाड़ा मे इत्र लानिस,

³⁸ अउ ओकर गोड़ कर लिघे, पाछू मे ठड़होए के, रोवत ओकर गोड़ ला आसू ले भिगाए के अउ अपन मूड़ कर बाल मन ले पोछे लागिस, अउ ओकर गोड़ ला घरी-घरी चुईम के गोड़ मन मे इत्र मलिस।

³⁹ एला देख के ओ फरीसी हर जेहर ओला बुलाए रहिस, अपन मन मे सोचे लागिस, “अगर ये हर अगमजानी होतीस त जाएन जातीस कि ये जेहर ओला छुवत रहिस, ओहर कोन अउ कईसन महिला है, काबर कि ओहर त पापी है।”

⁴⁰ यीशु हर ओकर उत्तर मे कहिस, “हे शमौन, मोला तोर ले कुछ कहे बर है।” ओहर गोठियईस, “हे गुरू, कह।”

⁴¹ “कोनो महाजन कर दुई झन देनदार रहिस, एक पाच सौ अउ दूसर पचास दीनार कर देनदार रहिस।

⁴² अउ जब ओकर जग पटाए बर कुछ नी रहिस, तब ओहर दोनोच झन ला छमा कईर देहिस। एकरे बर ओमे ले कोन हर ओकर ले ढेरेच प्रेम रखही?”

⁴³ शमौन हर उत्तर देहिस, “मोर समझ मे ओहिच हर जेकर ओहर बगरा छोएड़ देहिस।” ओहर ओकर ले कहिस, “तय हर ठिकेच बिचार करे हस।”

⁴⁴ अउ ओ महिला कती फिर के शमौन ले कहिस, “का तय ये महिला ला देखथस? मैहर तोर घर मे आए लेकिन तय हर मोर गोड़ ला धोए बर पानी नी देहे, लेकिन एहर मोर गोड़ ला आसू ले भिगईस अउ अपन चुन्दी मन ले पोछिस।

⁴⁵ तय हर मोला नी चूमे, लेकिन जब ले मैहर आए हो तब ले एहर मोर गोड़ ला चूमे बर नी छोड़िस।

⁴⁶ तय हर मोर मूड़ मे तेल नी चुपराए, लेकिन एहर मोर गोड़ मे इत्र मलिस आहे।

⁴⁷ एकरे बर मैहर तोर ले कहथो कि एकर पाप जेहर ढेरेच रहिस, छमा होईस, काबर कि एहर ढेरेच प्रेम करिस; लेकिन जेकर तनिक छमा होईस, ओहर तनिक प्रेम करथे।”

⁴⁸ अउ ओहर महिला ले कहिस, “तोर पाप हर छमा होईस।”

⁴⁹ तब जे लोग मन ओकर संग मे भात खाए ले बईठे रहिन, ओमन मन अपन-अपन मन मे सोचे लागिन, “एहर कोन है जेहर पाप मन ला भी छमा करथे?”

⁵⁰ तब यीशु हर महिला ले कहिस, “तोर बिश्वास हर तोला बचाए लेहिस, कुशल ले रेंग दे।”