लूका 23 - सरगुजिया बाइबिल

पिलातुस कर द्वारा यीशु ले प्रश्न

¹ तब सबेच सभा उईठ के यीशु ला पिलातुस कर लिघे ले गईन।

² “ओमन मन ये कहे के ओकर पर दोष लगाए लागिन: हमन मन एके ला लोग मन ला बहकात, अउ कैसर ला कर देहे ले मना करथे, अउ अपन आप ला मसीह, राजा कहत सुने हन।”

³ पिलातुस हर ओकर ले पूछिस, “का तय हर यहूदी मन कर राजा हस?” यीशु हर उत्तर देहिस, “तय अपन ही कहथस।”

⁴ तब पिलातुस हर प्रधान याजक अउ लोग मन ले कहिस, “मैहर ये मैनसे मे कोनो दोष नी पाथो।”

⁵ पर ओमन मन अउ जबरजस्ती कहे लागिन, “एहर गलील परदेस ले ले के हिया तक ले, सबेच यहूदिया परदेस मे उपदेश दे देकर लोग मन ला भड़काथे।”

⁶ एला सुईन के पिलातुस हर पुछिस, “का ये लोग हर गलीली है?”

⁷ अउ एला जाएन के कि ओहर राजा हेरोदेस कर रियासत कर है, ओला हेरोदेस जग भेज देहिस, काबर कि ओ दिन मन मे ओहर भी यरूशलेम शहर मे रहिस।

यीशु कर हेरोदेस जग भेजई

⁸ राजा हेरोदेस हर यीशु ला देख कर ढेरेच खुश होईस, काबर कि ओहर ढेरेच दिन ले ओला देखे बर चाहत रहिस; एकरे बर कि ओकर बिषय मे सुने रहिस, अउ ओकर ले कुछ चिन्हा देखे कर आशा रखत रहिस।

⁹ ओहर ओकर ले ढेरेच अकुन गोएठ पुछत रहिस, पर ओहर ओमन मन ला कुछ भी उत्तर नी देहिस।

¹⁰ प्रधान याजक अउ शास्त्री मन ठड़होए तन मन ले ओकर पर दोष लगात रहिन।

¹¹ तब राजा हेरोदेस हर अपन सिपाही मन कर संग ओकर अपमान कईर के ठठ्ठा मे उड़ईन, अउ भड़किला कपरा पहिनाए के ओला पिलातुस कर लिघे फिराए देहिन।

¹² ओहिच दिन पिलातुस अउ हेरोदेस संगता होए गिन; एकर आगू ओमन मन एक दूसर कर बैरी रहिन।

पिलातुस द्वारा यीशु मसीह ला मरे कर सजा देहई

¹³ पिलातुस हर प्रधान याजक अउ सरदार अउ लोग मन ला बुलाए के ओमन मन ले कहिस,

¹⁴ “तुमन मन ये मैनसे ला लोग मन ला बहकाए बाला ठहराए के मोर जग लाने हा, अउ देखा, मैहर तुमन मन कर आगू मे एकर जांच करे, पर जे गोएठ मन कर तुमन मन यीशु पर दोष लगाथा ओ गोएठ मन कर बिषय मे मैहर ओमे कुछ भी दोष नी पाए हो;

¹⁵ न राजा हेरोदेस हर, काबर कि ओहर हमर लिघे फिराए देहिस है: अउ देखा, ओकर ले एसन कुछ नी होईस कि ओहर मृत्यु कर सजा कर लाएक ठहराल जाही।

¹⁶ एकरे बर मैहर ओला पिटवाए के छोएड़ देहत हो।”

¹⁷ (पिलातुस तिवहार कर समय ओमन मन बर एक बंदी ला छोएड़ देहे बर मजबूर रहिस)।

¹⁸ तब सबेच झन मन मिल के किरलाए उठिन, “एकर काम तमाम कर, अउ हमर बर बरअब्बा ला छोएड़ दे!”

¹⁹ ओहर कोनो बलवा मन के कारन जेहर नगर मे होए रहिस, अउ हत्या कर कारन जेलखाना मे डालल गए रहिस

²⁰ पर पिलातुस हर यीशु ला छोएड़ देहे कर इक्छा ले लोग मन ला फिर ले समझईस,

²¹ लेकिन ओमन मन किरलाए के कहिन, “ओला क्रूस पर चड़हावा, क्रूस पर!”

²² ओहर तीसर बार ओमन मन ले कहिस, “काबर, ओहर कोन नियर कर बुराई करिस है? मैहर ओमे मृत्यु कर सजा लाएक कोनो गोएठ नी पाए। एकरे बर मैहर ओला पिटवाए के छोएड़ देहत हो।”

²³ लेकिन ओमन मन किरलाए-किरलाए के पाछू पईड़ गईन कि ओला क्रूस पर चड़हाल जाए, अउ ओमन मन कर किरलई हर प्रबल होईस।

²⁴ तले पिलातुस हर हुकूम देहिस कि ओमन कर बिनती के अनुसार करल जाए।

²⁵ ओहर ओ लोग ला जेहर बलवा अउ हत्या कर कारन जेलखाना मे डालल गए रहिस, अउ जेला ओमन मन हर मांगत रहिन, छोएड़ देहिस; अउ यीशु ला ओमन मन कर इक्छा कर अनुसार सौप देहिस।

यीशु कर क्रूस पर चड़हई

²⁶ जब ओमन मन यीशु ला ले जात रहिन, त ओमन मन शमौन नाव कर एक कुरेनी ला जेहर गाव ले आत रहिस, धईर के ओकर उपर क्रूस ला लाएद देहिन कि ओला यीशु कर पाछू-पाछू ले चले।

²⁷ लोग मन कर बड़खा भीड़ ओकर पाछू होए लेहिन अउ ओमे ढेरेच झन महिला मन भी रहिन जेमन मन ओकर बर छाती-पिटत अउ बिलाप करत रहिन।

²⁸ यीशु हर ओमन मन कती मुईड़ के कहिस, “हे यरूशलेम शहर कर बेटी मन, मोर बर झिन रोवा; लेकिन अपन अउ अपन छउवा मन बर रोवा।

²⁹ काबर कि देखा, ओ दिन मन आत है, जेमे लोग मन कही, ‘धन्य है ओमन जेमन मन बांझ है अउ ओमन जेमन मन कर गर्भ हर नी जने अउ ओ स्तन जेमन मन दूध नी पिलईन।’

³⁰ ओ समय ‘ओमन मन पहार मन ले कहे लागही कि हमन पर गिर, अउ टीला मन ले कि हमन ला ढाएप लेवा।’

³¹ काबर कि जब ओमन मन हरियर रूख कर संग मे एसन कईर सकथे, त झुराल मन कर संग का कुछ नी करल जाही?”

³² ओमन अउ दूई झन मन ला भी जेमन कुकरमी मन रहिन ओकर संग घात करे बर लेते गईन।

³³ जब ओमन मन ओ जगहा जेला खोपड़ी कहथे पहुचिन, त ओमन मन हुवा ओला अउ ओ कुकरमी मन ला भी, एक ला जेवनी अउ दूसर ला डेरी कती क्रूस मन पर चड़हईन।

³⁴ तब यीशु हर कहिस, “हे दाऊ, एमन मन ला छमा कर, काबर कि एमन मन नी जानथे कि का करथे।” अउ ओमन मन चिठ्ठी डाएल के यीशु के कपरा मन ला बाएट लेहिन।

³⁵ लोग मन ठड़होए-ठड़होए देखत रहिन, अउ सरदार हर भी ठठ्ठा कईर के कहत रहिन, “एहर दूसर झन मन ला बचईस, अगर एहर परमेश्वर कर मसीह है, अउ ओकर चुनल है, त अपन आप ला बचाए लेहे।”

³⁶ सिपाही मन भी लिघे आए के अउ सिरका ला दे के यीशु मसीह कर ठठ्ठा कईर के कहत रहिन,

³⁷ “अगर तय हर यहूदी मन कर राजा हस, त अपन आप ला बचाए ले!”

³⁸ अउ यीशु कर उपर एक दोष पत्र ला भी लगे रहिस, “एहर यहूदी मन कर राजा है।”

क्रूस पर मन फिराए बाला कुकरमी

³⁹ जे कुकरमी मन हुवा लटकाल गए रहिन, ओमन मन ले एक झन हर यीशु मसीह कर निन्दा कईर के कहिस, “का तय मसीह नी हस? त अपन ला अउ हमन मन ला भी बचा!”

⁴⁰ एकर बर दूसर झन हर ओला जन्गाए के कहिस, “का तय हर परमेश्वर ले भी नी डरथस? तय हर भी ओहिच सजा ला पाथस,

⁴¹ अउ हमन मन त न्याय अनुसार दण्ड ला पात हन, काबर कि हमन अपन बुता कर सहिच फर ला पात हन; पर एहर कोनोच अनुचित बुता नी करिस।”

⁴² तब ओहर कहिस, “हे यीशु, जब तय अपन राएज मे आबे, त मोर सुधि लेबे।”

⁴³ यीशु हर कहिस, “मैहर तोर ले सहिच कहथो कि आएज ही तय मोर संग मे स्वर्ग लोक मे होबे।”

यीशु मसीह कर प्रान छोड़ई

⁴⁴ अउ लगभग दुईपहर ले तीसर पहर तक ले सबेच देश मे अन्धार छाए रहिस,

⁴⁵ अउ बेर कर इंजोर हर जात रहिस, अउ मन्दिर कर परदा हर मांझा ले फईट गईस,

⁴⁶ अउ यीशु हर जोर से किरलाए के कहिस, “हे दाऊ, मैहर अपन आत्मा ला तोर हाथ मे सौपत हो।” अउ ये कह के प्रान ला छोएड़ देहिस।

⁴⁷ सूबेदार हर, जे कुछ होए रहिस देख के परमेश्वर कर बड़ाई करिस, अउ कहिस, “जरूरेच ये मैनसे हर धर्मी रहिस।”

⁴⁸ अउ भीड़ जेहर एला देखे बर जुटे रहिन, ये घटना ला देख कर छाती पिटत फिर गईन।

⁴⁹ अउ ओकर सबेच जान पहिचान, अउ जे महिला मन गलील परदेस ले ओकर संग मे आए रहिन, दुरिहा ठड़होए ये सबेच देखत रहिन।

अरिमतियाह कर यूसुफ के द्वारा यीशु ला दफनई

⁵⁰ अउ हुवा यूसुफ नाव कर महासभा कर एक सदस्य रहिस, जेहर सज्जन अउ धर्मी आदमी रहिस।

⁵¹ अउ ओमन मन कर योजना अउ ओमन मन कर ये बुता ले खुश नी रहिन। ओ यहूदी मन कर नगर अरिमतियाह कर रहे बाला अउ परमेश्वर कर राएज कर बाट जोहत रहिस।

⁵² ओहर पिलातुस जग जाए के यीशु कर लाश ला मांगिस;

⁵³ अउ ओला उताएर के मलमल कर चादर मे लपेट कर, अउ एक कबर मे रखिन, जेहर चट्टान मे खोदल रहिस; अउ ओमे कोनोच ला कभो नी रखे गए रहिन।

⁵⁴ ओहर तियारी कर दिन रहिस, अउ सब्त कर दिन शुरू होए बर रहिस।

⁵⁵ अउ ओ महिला मन जेमन मन यीशु के संग गलील परदेस ले आए रहिन, पाछू-पाछू जाए के कबर ला देखिन, अउ ये भी कि यीशु कर लाश ला कोन रीति ले रखल गईस है।

⁵⁶ तब ओमन मन फिर के सुगन्ध चीज मन ला अउ इत्र तियार करिन; अउ सब्त कर दिन ओमन मन कर हुकूम कर अनुसार अराम करिन।