लूका 18 - सरगुजिया बाइबिल

बिधवा अउ अधर्मी न्यायी

¹ फिर ओहर एकर बिषय मे कि हमेसेच प्रार्थना करिहा अउ हियाव झिन छोड़िहा, ओमन मन ले ये कहानी ला कहिस:

² “कोनो नगर मे एक न्यायी रहत रहिस, जेहर न परमेश्वर ले डरत रहिस अउ न कोनो लोग मन कर परवाह करत रहिस।

³ ओहिच नगर मे एक बिधवा हर भी रहत रहिस, जेहर ओकर लिघे आए-आए के कहत रहिस, ‘मोर न्याय ला चुकाए के मोला बिरोधी मन ले बचाव।’

⁴ ओहर केतेक समय तक ले ओकर नी मानिस लेकिन आखरी मे मन मे सोच के कहिस, ‘जब कि मैहर परमेश्वर ले नी डरथो, अउ न लोग मन कर परवाह करथो;

⁵ तबो ले ये बिधवा हर मोला सतात रथे, एकरे बर मैहर ओकर न्याय ला चुकाहू, कहो एसन झिन होए कि घरी-घरी आए के आखरी ले मोर नाक मे दम झिन करे।’”

⁶ प्रभु हर कहिस, “सुना, ये अधर्मी न्यायी का कहथे?”

⁷ एकरे बर का परमेश्वर अपन चुनल मन कर न्याय ला नी चुकाही, जेमन मन राएत-दिन ओकर दुहाई देहत रहथे? का ओहर ओमन मन कर बिषय मे देरी करही?

⁸ “मैहर तुमन मन ले कहथो, ओहर तुरतेच ओमन मन कर न्याय ला चुकाही। तबो ले मैनसे कर बेटा हर आही, त का ओहर पृथ्वी मे बिश्वास ला पाही?”

कोन हर धर्मी ठहराल जाही?

⁹ ओहर ओमन मन ले जेमन अपन मन पर भरोसा रखत रहिन, कि हमन मन धर्मी हन, अउ दूसर मन ला घिनक जानत रहिन, ये कहानी ला कहिस:

¹⁰ “दुई झन मन मन्दिर मे प्रार्थना करे बर गईन; एक झन हर फरीसी रहिस अउ दूसर हर मलगुजारी लेहे बाला।

¹¹ फरीसी हर ठड़होए के अपन मन मे एसन प्रार्थना करे लागिस, ‘हे परमेश्वर, मैहर तोर धन्यवाद करथो कि मैहर दूसर लोग मन कर नियर अन्धेर करे बाला, अन्यायी अउ ब्यभिचारी नी हो अउ न ये मलगुजारी लेहे बाला कर नियर हो।

¹² मैहर सप्ताह मे दुई बार उपवास करथो; मैहर अपन सबेच कमाई कर दसवां हिस्सा भी देथो।’

¹³ लेकिन मलगुजारी लेहे बाला हर दुरिहा ठड़होए के, स्वर्ग कती अपन आएख ला भी नी उठाए बर चाहिस, बरन अपन छाती ला पीट-पीट के कहिस, ‘हे परमेश्वर, मुझ पापी पर दया कर!’

¹⁴ मैहर तुमन मन ले कहथो कि ओहर दूसर नही, लेकिन एहिच आदमी हर धर्मी ठहराल जाए के अपन घर गईस; काबर कि जे कोनो हर अपन आप ला बड़खा बनाही, ओहर छोटे करल जाही; अउ जेहर अपन आप ला छोटे बनाही, ओहर बड़खा करल जाही।”

परमेश्वर कर राएज लईका मन के नियर है

¹⁵ फिर लोग मन अपन लईका मन ला भी ओकर लिघे लाने लागिन कि ओहर ओमन मन पर हाथ रखे; लेकिन चेला मन देख के ओमन मन ला डाटिन।

¹⁶ यीशु हर लईका मन ला लिघे बुलाए के कहिस, “लईका मन ला मोर जग आए देवा, अउ ओमन मन ला मना झिन करा: काबर कि परमेश्वर कर राएज एमनेच मन कर है।”

¹⁷ “मैहर तुमन मन ले सहिच कहथो कि जे कोनो हर परमेश्वर कर राएज ला लईका मन कर नियर गरहन नी करही ओहर ओमे कभो घुसे नी पाही।”

एक धनी कर यीशु ले प्रश्न

¹⁸ कोनो सरदार हर ओकर ले पुछिस, “हे उत्तम गुरू, अनन्त जीवन कर अधिकारी होए बर मैहर का करो?”

¹⁹ यीशु हर ओकर ले कहिस, “तय मोला उत्तम काबर कहथस? कोनोच हर उत्तम नी है, केबल एक झन मने कि परमेश्वर।”

²⁰ “तय हुकूम मन ला त जानथस: ब्यभिचार झिन करबे, हत्या झिन करबे, अउ चोरी झिन करबे, झूठ कर गवाही झिन देबे, अपन दाऊ अउ अपन दाई कर आदर करबे।”

²¹ ओहर कहिस, “मैहर त ये सबेच मन ला छोटपन ही ले मानत आए हो।”

²² एला सुईन के यीशु हर ओकर ले कहिस, “तोर मे अझे ले एक गोएठ कर कमी है, अपन सबेच कुछ ला बेच के गरीब कंगाल मन ला बाएट दे; अउ तोला स्वर्ग मे धन मिलही, अउ आए के मोर पाछू मे होए ले।”

²³ ओहर एला सुईन के ढेरेच उदास होईस, काबर कि ओहर ढेरेच धनी रहिस।

²⁴ यीशु हर ओला देख के कहिस, “धनवान मन के परमेश्वर कर राएज मे घुसना केतेक कठिन है।”

²⁵ “परमेश्वर कर राएज मे धनवान कर घुसे ले ऊट के सूई कर नाका मे ले हिकेल जाए बर सहज है।”

²⁶ अउ सुने बाला मन कहिन, “त फिर काकर उद्धार होए सकथे?”

²⁷ ओहर कहिस, “जेहर लोग मन ले नी होए सकथे, ओहर परमेश्वर ले होए सकथे।”

²⁸ पतरस हर कहिस, “देख हमन मन त घर-बार ला छोएड़ के तोर पाछू मे होए लेहे हन।”

²⁹ यीशु हर ओमन मन ले कहिस, “मैहर तुमन मन ले सहिच कहथो कि एसन कोनोच हर नी है जेहर परमेश्वर कर राएज बर घर, या घरदारिन, या भाई मन, या दाऊ-दाई, या लईका-छउवा मन ला छोएड़ देहिस होही;

³⁰ अउ ये समय कई गुना अधिक नी पाही अउ आए बाला युग मे अनन्त जीवन।”

फिर जी उठे कर भविष्यवानी

³¹ फिर ओहर बारह चेला मन ला संग मे ले जाए के ओमन मन ले कहिस, “देखा, हमन मन यरूशलेम शहर जात हन, अउ जेतेक बात मैनसे कर बेटा बर अगमजानी मन कर द्वारा लिखल गईस है, ओ सबेच मन पूरा होही।”

³² काबर कि ओहर दूसर जाएत मन कर हाथ मे सौपल जाही, अउ ओमन मन ओकर ठठ्ठा उड़ाही; अउ ओकर अपमान करही, अउ ओकर मे थुकही,

³³ “अउ ओला कोड़ा मारही, अउ घात करही; अउ ओहर तीसर दिन मे जी उठही।”

³⁴ अउ ओमन मन ये गोएठ मन ले कोनोच ला नी समझिन, अउ ये गोएठ हर ओमन मन ले छिपल रहिस, अउ जेला कहल गए रहिस ओहर ओमन मन कर समझ मे नी अईस।

अन्धवा भिखारी कर आएख

³⁵ जब ओहर यरीहो शहर कर लिघे पहुचिस, त एक अन्धवा हर सड़क कर कगरे बईठ के भीख मांगत रहिस।

³⁶ ओहर भीड़ कर रेंगे कर अवाज ला सुईन के कहे लागिस, “ये का होवत है?”

³⁷ ओमन मन ओला बतईन, “यीशु नासरी हर जात है।”

³⁸ तब ओहर पुकाएर के कहिस, “हे यीशु, दाऊद कर संतान, मोर पर दया कर!”

³⁹ जेमन मन आगू-आगू जात रहिन, ओमन मन ओला डाटे लागिन कि चुप रह; लेकिन ओहर अउ भी किरलाए लागिस, “हे दाऊद कर संतान, मोर पर दया कर!”

⁴⁰ तब यीशु हर ठड़होए के हुकूम देहिस कि ओला मोर लिघे लाना, अउ जब ओहर लिघे मे आए गईस त ओहर ओला पुछिस;

⁴¹ “तय हर का चाहथस कि मैहर तोर बर करो?” ओहर कहिस, “हे प्रभु, ये कि मैहर देखे लागो।”

⁴² यीशु हर ओकर ले कहिस, “देखे लग; तोर बिश्वास हर तोला बड़िया कईर देहिस।”

⁴³ तब ओहर तुरतेच देखे लागिस अउ परमेश्वर कर बड़ाई करत ओकर पाछू मे होए लेहिस; अउ सबेच लोग मन देख के परमेश्वर कर स्तुति करिन।