लूका 17 - सरगुजिया बाइबिल

चेतई

¹ फिर यीशु हर अपन चेला मन ले कहिस, ये जरूरेच है कि ओ गोएठ मन जेहर पाप कर कारन है, “आही लेकिन हाय, ओकर पर जेकर कारन ओहर आथे।”

² जेहर ये छोटका मन ले कोनो एक ला ठोकर खिलाथे, ओकर बर ये भला होतीस कि चक्की कर पाट ला ओकर ढेटु मे लटकाल जातीस, अउ ओहर समुन्दर मे डाएल देहल जातीस।

³ चवकस रहा; अगर तोर भाई हर अपराध करही त ओला डाट, अउ अगर पछताही त ओला छमा कर

⁴ “अगर दिन भर मे ओहर सात बार ले अपराध करही अउ सातोच बार तोर लिघे आए के फिर कही मैहर पछतात हो, त ओला छमा कर।”

तुमन मन कर बिश्वास केतेक बड़खा है?

⁵ तब प्रेरित मन प्रभु ले कहिन, “हमर बिश्वास ला बड़हा।”

⁶ प्रभु हर कहिस, “अगर तुमन मन कर राई के दाना बरोबर बिश्वास होतीस, त तय हर तूत कर रूख ले कहथे कि जईर ले उखेड़ के समुन्दर मे लईग जा, त ओहर तोर ला माएन लेतिस।”

ढेरेच बड़िया सेवक

⁷ “तुमन मन ले एसन कोन है, जेकर कमिया हर नांगर जोतत रही या भेड़ चरात रही अउ जब ओहर खेत ले आही, त ओकर ले कही, ‘अउ तुरतेच आए के भात खाए बर बईठ?’

⁸ अउ का ये ओमन ले नी कही, मोर बर भात तियार कर, अउ जब ले मैहर खाहु-पीहू तब ले कनिहा ला बाएध के मोर सेवा कर; एकर पाछू तय हर भी खाए-पी लेबे?

⁹ का ओहर ओ कमिया कर अहसान ला मानही कि ओहर ओहिच बुता ला करिस जेकर हुकूम देहल गए रहिस?

¹⁰ एहिच नियर जब तुमन मन भी जब ओ सबेच बुता ला कईर दारिहा जेकर हुकूम तुमन मन ला देहल रहिस, त कईहा, ‘हमन मन निक्कमा कमिया हन; जेला हमन मन ला करे बर रहिस हमन मन केबल ओहिच ला करे हन।’”

एक कोड़ही कर अभार

¹¹ एसन होईस कि यीशु हर यरूशलेम शहर जात घनी सामरिया अउ गलील परदेस कर मांझा ले होए के जात रहिस।

¹² कोनो गाव मे घुसत घनी ओला दस कोड़ही मिलिन।

¹³ ओमन मन दुरिहा ठड़होए के ऊचा गोएठ ले कहिन, “हे यीशु, हे स्वामी, हमन मन पर दया कर।”

¹⁴ ओहर ओमन मन ला देख के कहिस, “जावा, अउ अपन आप ला याजक मन ला दिखावा।” अउ जातेच ही जात ओमन मन ठीक होए गिन।

¹⁵ तब ओमन मन ले एक झन एला देख के कि मैहर चंगा होए गए हो, ऊचा गोएठ ले परमेश्वर कर बड़ाई करत फिरिस;

¹⁶ अउ यीशु कर गोड़ मे मुंह के बल गिर के ओकर धन्यवाद करे लागिस; अउ ओहर सामरी जाएत कर रहिस।

¹⁷ एमे यीशु हर कहिस, “का दसो झन मन ठीक नी होईन, त फिर ओ नव झन मन कहा है?

¹⁸ का ये परदेसी ला छोएड़ के कोनो अउ नी हिकलिन जेहर परमेश्वर कर बड़ाई करतिन?”

¹⁹ तब यीशु हर ओकर ले कहिस, “उईठ के रेंग दे; तोर बिश्वास हर तोला चंगा करिस है।”

परमेश्वर के राएज कर परगट होवई

²⁰ जब फरीसी मन हर ओकर ले पुछिन, कि परमेश्वर कर राएज कब आही? त यीशु हर ओमन मन ला उत्तर देहिस, कि परमेश्वर कर राएज परगट रूप मे नी आथे।

²¹ अउ लोग मन ये नी कही, कि देखा, हिया है, या हुवा है, काबर कि देखा, परमेश्वर कर राएज तुमन मन कर मांझा मे है।

²² अउ ओहर चेला मन ले कहिस; ओ दिन आही, जेमन मे तुमन मन मैनसे मन कर बेटा के दिन मे ले एक दिन ला देखे बर चईहा, अउ नी देख पईहा।

²³ लोग मन तुमन मन ले कही, देखा, हुवा है, या देखा हिया है; लेकिन तुमन मन रेंग झिन देईहा अउ न ओमन मन कर पाछू होए लेईहा।

²⁴ काबर कि जईसन बिजली हर अकाश कर एक छोर ले हिकेल के दूसर छोर तक चमकथे, ओहिच कस मैनसे कर बेटा हर भी अपन दिन मे परगट होही।

²⁵ लेकिन आगू जरूरेच है, कि ओहर ढेरेच दुख उठाही, अउ ये युग कर लोग मन ओला तुच्छ ठहराही।

²⁶ जेकस नूह कर दिन मन मे होए रहिस, ओहिच कस मैनसे कर बेटा कर दिन मे भी होही।

²⁷ जे दिन तक ले नूह हर डोंगा मे नी चड़हिस, ओ दिन तक लोग मन खात पीयत रहिन, अउ ओमन मन मे बिवाह-शादी होवत रहिस; तब जल प्रलय हर आए के ओमन मन सबेच ला नाश करिस।

²⁸ अउ जईसन लूत कर दिन मन मे होए रहिस, कि लोग मन खात-पीयत लेन-देन करत रहिन, रूख लगात अउ घर बनात रहिन।

²⁹ लेकिन जे दिन लूत हर सदोम ले हिकलिस, ओहिच दिन आगी अउ गन्धक अकाश ले बरसिस अउ सबेच झन ला नाश कईर देहिस।

³⁰ मैनसे कर बेटा कर परगट होए कर दिन भी एहिच नियर होही।

³¹ ओ दिन जेमन मन छत मे होही; अउ ओकर चीज मन घर मे रही, ओहर ओला लेहे बर झिन उतरे, अउ ओहिच कस जेमन मन खेत मे रही ओहर पाछू झिन फिरे।

³² लूत कर घरदारिन ला याद रखा।

³³ जे कोनो हर अपन प्रान ला बचाए बर चाही ओहर ओला खोही, अउ जे कोनो हर ओला खोही ओहर ओला जीवित बचाही।

³⁴ मैहर तुमन मन ले कहथो, ओ राती मे दुई लोग एक खटिया मे होही, एक हर ले लेहल जाही, अउ दूसर ला छोएड़ देहल जाही।

³⁵ दुई महिला मन एक संग मे जतरा मे पिसत रही, एक झन ला ले लेहल जाही, अउ दूसर ला छोएड़ देहल जाही।

³⁶ दुई झन खेत मे होही एक झन ला ले लेहल जाही अउ दूसर ला छोएड़ देहल जाही।

³⁷ एला सुईन के ओमन मन ओकर ले पुछिन, हे प्रभु एहर कहा होही? ओहर ओमन मन ले कहिस, जहा लोथ है, हुवा गिद्ध जमा होही।