लूका 16 - सरगुजिया बाइबिल

चलाक ब्यवथापक

¹ फिर यीशु हर चेला मन ले कहिस, “कोनो धनवान कर एक भण्डारी रहिस अउ लोग मन ओकर आगू भण्डारी पर ये दोष लगईन कि तोर सबेच सम्पति मन ला उड़ाए देथे।

² तले ओहर ओला बुलाए के कहिस, ‘एहर का है जेला मैहर तोर बिषय मे सुनत हो? अपन भण्डारी पन कर लेखा दे, काबर कि तय आगू ले भण्डारी नी रहबे।’

³ तब भण्डारी हर सोचे लागिस, ‘अब मैहर का करहू? काबर कि मोर स्वामी अब भण्डारी कर बुता ला मोर ले वापस ले लेहथे। माटी त मोर ले खोदल नी जाही; अउ भीख मांगे ले मैहर लजाथो।

⁴ मैहर समझ गए हो कि का करहू, ताकि जब मैहर भण्डारी कर बुता ला छोड़ाल जाहू त लोग मन मोला अपन घर मे ले लेही।’

⁵ तब ओहर अपन स्वामी कर देनदार मन ला एक-एक कईर के बुलईस अउ आगू कर लोग ले पुछिस, ‘तोर पर मोर स्वामी कर केतेक करजा है?

⁶ ओहर कहिस, सव मन जैतून कर तेल, तब ओहर ओकर ले कहिस, अपन खाता बही मन ला ले अउ बईठ के तुरतेच पचास लिख ले।’

⁷ फिर ओहर दूसर ले पुछिस, ‘तोर पर केतेक करजा है?’ ओहर कहिस, ‘सव मन गेहू,’ तब ओहर ओकर ले कहिस, ‘अपन खाता बही ले के अस्सी लिख ले।’

⁸ स्वामी हर ओ अधर्मी भण्डारी ला सराहिस कि ओहर चतुराई ले बुता करिस है। काबर कि ये संसार कर लोग मन अपन समय कर लोग मन कर संग रीति बेवहार मे ज्योति कर लोग मन ले ढेरेच चतुर है।

⁹ अउ मैहर तुमन मन ले कहथो कि अधर्म कर धन ले अपन बर संगता बनाए लेवा, ताकि ओहर जब जात रही त ओहर अनन्त निवास मन मे ले लेहे।

¹⁰ जेमन कम ले कम मे बिश्वास योग्य है, ओहर ढेरेच मे भी बिश्वासयोग्य है: अउ जेहर कम ले कम मे अधर्मी है, ओहर ढेरेच मे भी अधर्मी है।

¹¹ एकरे बर जब तुमन मन अधर्म कर धन मे सहिच नी ठहरा, त सहिच धन ला तुमन मन ला कोन हर सोपही?

¹² अउ अगर तुमन मन ला पराए धन मे सहिच नी ठहरा त जेहर तुमन मन कर है, ओला तुमन मन ला कोन देही?

¹³ कोनो कमिया हर दूई स्वामी मन कर सेवा नी करे सकही: काबर कि एक ले बैर अउ दूसर ले प्रेम रखही; या एक ले मिलल रही अउ दूसर ला तुच्छ जानही। तुमन मन परमेश्वर अउ धन दोनोच कर सेवा नी कईर सकथा।”

परमेश्वर के राएज कर मूल्य

¹⁴ फरीसी जेमन मन लोभी रहिन, ये सबेच गोएठ ला सुईन के ओकर ठठ्ठा मे उड़ाए लागिन।

¹⁵ ओहर ओमन मन ले कहिस, “तुमन मन त लोग मन कर आगू मे अपन आप ला धर्मी ठहराथा, लेकिन परमेश्वर हर तुमन मन कर मन ला जानथे, काबर कि जे चीज हर लोग मन कर नजर मे महान है, ओहर परमेश्वर कर लिघे घृनित है।”

¹⁶ जब तक यूहन्ना अईस, तब तक “ब्यवस्था अउ अगमजानी मन प्रभाव मे रहिन; ओ समय ले परमेश्वर कर राएज कर सुसमाचार सुनाल जात रहिस, अउ सबेच झन मन ओमे प्रबलता ले घुसथे।

¹⁷ अकाश अउ पृथ्वी कर टल जवई ले ब्यवस्था कर एक बिन्दू कर मिट ले सहज है।

¹⁸ जे कोनो हर अपन घरदारिन ला छोएड़ के दूसर ले बिवाह करथे, ओहर ब्यभिचार करथे, अउ जे कोनो हर एसन त्यागल महिला ले बिवाह करथे, ओहर भी ब्यभिचार करथे।

धनवान मैनसे अउ गरीब लाजर

¹⁹ एक धनवान मैनसे रहिस जेहर बैजनी कपरा अउ मलमल पहिनत रहिस अउ रोज दिन सुख बिलास अउ धूम धाम कर संग रहत रहिस।

²⁰ लाजर नाव कर एक कंगाल घाव ले भरल ओकर चवखट पर छोएड़ देहल जात रहिस,

²¹ अउ ओहर चाहत रहिस कि धनवान कर मेज कर जुठन ले अपन पेट ला भरही; हिया तक कि कूकुर मन आए के ओकर घाव ला चाटत रहिन।

²² एसन होईस कि कंगाल हर मईर गईस, अउ स्वर्गदूत मन ओला ले के अब्राहम कर गोद मे पहुचईन। ओ धनवान हर भी मईर गईस अउ गाड़ल गईस,

²³ अउ अधोलोक मे ओहर दुख मे पड़ल अपन आएख ला उठईस, अउ दुरिया ले अब्राहम कर गोद मे लाजर ला देखिस।

²⁴ तब ओहर पुकाएर के कहिस, ‘हे दाऊ अब्राहम, मोर पर दया कईर के लाजर ला भेज दे, ताकि ओहर अपन अंगुली कर सिरा ला पानी मे भिगाए के मोर जीभ ला जुड़वाए, काबर कि मैहर ये ज्वाला मे तड़पत हो।’

²⁵ लेकिन अब्राहम हर कहिस, ‘हे बेटा, याद कर कि तय अपन जीवन मे बड़िया चीज मन ला ले दारे हस, अउ ओहिच कस लाजर हर बुरा चीज मन ला; लेकिन अब ओहर हिया शान्ति पात है, अउ तय हर तड़पत हस।

²⁶ ये सबेच गोएठ मन ला छोएड़ हमर अउ तुमन कर मांझा मे एक बड़खा भारी गड़हा ठहराल गईस आहे कि जेहर हिया ले ओ पार तोर लिघे जाएक बर चाही, ओहर नी जाए सकही; अउ न कोनो हर हुवा ले ये पार हमर लिघे आए सकथे।’

²⁷ ओहर कहिस, त हे दाऊ, मैहर तुमन ले बिनती करथो का तुमन ओला मोर दाऊ कर घर मे भेजिहा,

²⁸ काबर कि मोर पाच भाई मन है; ओहर ओमन मन कर आगू ये गोएठ मन कर गवाही देही, एसन झिन होए कि ओमन मन भी ये दुख कर जगहा मे आए।

²⁹ अब्राहम हर ओकर ले कहिस, ओमन मन कर लिघे त मूसा अउ अगमजानी मन कर पुस्तक मन है, ओमन मन ओकर सुने।

³⁰ ओहर कहिस, नही, हे दाऊ अब्राहम; पर अगर कोनो मरल मन ले ओमन मन कर लिघे जाही, त ओमन मन हर मन फिराही।

³¹ ओहर ओकर ले कहिस, ‘जब ओमन मन मूसा अउ अगमजानी मन कर नी सुनथे, त अगर मरल मन ले कोनो हर जी भी उठही त ओकर नी मानही।’”