लूका 12 - सरगुजिया बाइबिल

शास्त्री अउ फरीसी मन कर नियर झिन बना

¹ एतेक मे जब हजार मन कर भीड़ लईग गईस, हिया तक कि ओमन मन एक दूसर पर गिर पड़त रहिन, त यीशु हर सबले आगू अपन चेला मन ले कहे लागिस, “फरीसी मन कर कपट रूपी खमीर ले चवकस रईहा।

² कुछ ढपाल नी है, जेला खोलल नी जाही, अउ न कुछ लुकाल है, जेला जानल नी जाही।

³ एकरे बर जे कुछ तुमन मन अन्धार मे कहे हवा, ओहर इंजोर मे सुनल जाही, अउ जेला तुमन मन कोठरी मन मे कानो कान कहे हवा, ओला छत मन मे ले प्रचार करल जाही।

ओकरेच ले डरा

⁴ लेकिन मय हर तुमन मन ले जेमन मन मोर संगता हा, कि जेमन मन देह ला माएर सकथे, लेकिन ओकर ले ज्यादा अउ कुछ नी कईर सकथे, ओमन मन ले झिन डरा।

⁵ मय हर तुमन मन ला चिताथो, कि तुमन मन ला कोन ले डरे बर चाही, घात करे कर बाद जेला नरक मे डाले कर अधिकार है, ओकरेच ले डरा; बरन मैहर तुमन मन ले कहथो ओकरेच ले डरा।

⁶ का दुई पईसा कर पाच गौरेला चरई मन हर नी बेचाथे? तबो ले परमेश्वर हर ओमन मन ले एगोठ ला भी नी भुलाए।

⁷ बरन तुमन मन कर मूड़ कर सबेच चुन्दी हर भी गिनल है, एकरे बर झिन डरावा, तुमन मन ढेरेच गौरेला चरई मन ले बईड़ के हवा।

यीशु ला मना करे कर मतलब

⁸ मैहर तुमन मन ले कहथो, जे कोनो लोग मन कर आगू मे मोला माएन लेही ओला मैनसे कर बेटा हर भी परमेश्वर कर स्वर्गदूत मन कर आगू मे माएन लेही।

⁹ लेकिन जेहर लोग मन कर आगू मे मोला मना करही ओके ला परमेश्वर के स्वर्गदूत मन कर आगू मे भी मना करल जाही।

¹⁰ जे कोनो मैनसे के बेटा कर बिरोध मे कोनो गोएठ कही, ओकर ओ अपराध छमा करल जाही, लेकिन जेहर पवित्र आत्मा कर निन्दा करही, ओकर अपराध छमा नी करल जाही।

¹¹ जब लोग मन अराधनालय मन मे अउ हाकिम मन अउ अधिकारी मन कर आगू मे ले जाही, त चिन्ता झिन करिहा कि हमन मन कईसे या का उत्तर देबो, या का कहबो।

¹² काबर कि पवित्र आत्मा ओहिच समय तुमन मन ला सिखाए देही कि का कहे बर चाही।”

एक धनवान लोग कर कहानी

¹³ फिर लोग मे ले एक झन हर ओकर ले कहिस, “हे गुरू, मोर भाई ले कह कि दाऊ कर सम्पत्ति ला मोर संग मे बाएट लेही।”

¹⁴ यीशु हर ओकर ले कहिस, “हे मैनसे, कोन हर मोला तोर न्यायी या बाटे बाला ठहरईसे?”

¹⁵ अउ ओहर ओमन मन ले कहिस, “सावधान रहा, अउ हर नियर कर लोग मन ले अपन आप ला बचाए रखा; काबर कि कोनो कर जिनगी ओकर धन कर बगरा ले नी होथे।”

¹⁶ यीशु हर ओमन मन ले एक कहानी कहिस, “कोनो धनवान कर जमीन मे ढेरेच खेती होईस।

¹⁷ तब ओहर अपन मन मे बिचार करे लागिस, कि मय का करहू? काबर कि मोर हिया जगहा नी है जहा अपन खेती कर उपज ला रखहू।

¹⁸ अउ ओहर कहिस, ‘मय ये करहू: मय अपन कोठी मन ला टोएर के ओमन मन ले बड़खा बनाहु; अउ हुवा अपन सबेच अन्न अउ सम्पति मन ला रखहू;

¹⁹ अउ अपन जीव ले कहू कि जीव, तोर ठन ढेरेच बरस मन बर सम्पत्ति रखल आहे; चैन कर, खा, पी, सुख से रह।’

²⁰ लेकिन परमेश्वर हर ओकर ले कहिस, ‘हे मूर्ख! एहिच राएत तोर प्रान तोर ले ले लेहल जाही; तब जे कुछ तय हर जमा करे हस, ओहर काकर होही?’

²¹ एहिच नियर ओ मैनसे मन भी है जेहर अपन बर धन जुटाथे, लेकिन परमेश्वर कर नजर मे धनी नी है।”

कोनो बात कर चिन्ता झिन करिहा

²² फिर यीशु हर अपन चेला मन ले कहिस, “एकरे बर मय हर तुमन मन ले कहथो, अपन प्रान कर चिन्ता झिन करिहा कि हमन मन का खाबो; न अपन देह कर कि का पहिनबो।

²³ काबर कि भात ले प्रान, अउ कपरा ले देह हर बईड़ के है।

²⁴ कउवा चरई मन पर ध्यान देवा; ओमन न बुनथे, न काटथे; न ओमन मन कर भण्डार, अउ न कोठार होथे; तबो ले परमेश्वर हर ओमन मन ला खिलाथे। तुमन मन कर किमत चरई मन ले कहो बगरा है!

²⁵ तुमन मन ले एसन कोन है जेहर चिन्ता कईर के अपन जीवनकाल मे एक घरी भी बड़हाए सकथे?

²⁶ एकरे बर अगर तुमन मन सबले छोटे काम भी नी कईर सकथा, त अउ गोएठ मन कर काबर चिन्ता करथा?

²⁷ सोसन कर फूल मन पर ध्यान करा, कि ओमन मन कईसे बड़थे: ओमन मन न मेहनत करथे, न काटथे; तबो ले मय हर तुमन मन ले कहथो कि राजा सुलैमान हर भी अपन सबेच बैभव मे, ओमन मन ले कोनो एक कर नियर कपरा पहिनल नी रहिस।

²⁸ एकरे बर अगर परमेश्वर हर मैदान कर घास ला, जेहर आएज है अउ काएल भाड़ मे झोकल जाही, एसन पहिनाथे; त हे आधा बिश्वास करे बाला मन, ओहर तुमन मन ला काबर नी पहिनाही?

²⁹ अउ तुमन मन ये गोएठ कर खोएज मे झिन रहा कि का खाबो, अउ का पीबो, अउ न संदेह करा।

³⁰ काबर कि संसार कर जाएत मन ये सबेच चीज मन कर खोज मे रहथे: अउ तुमन मन कर दाऊ हर जानथे, कि तुमन मन ला ये चीज मन कर जरूरत है।

³¹ लेकिन ओकर राएज कर खोज मे रहा, त ये सब चीज मन हर भी तुमन मन ला भेटाए जाही।

धन ला कोन जग जुटई?

³² हे छोटे झुन्ड, झिन डरा; काबर कि तुमन मन कर दाऊ ला ये भईस कि तुमन मन ला राएज देहे।

³³ अपन संपत्ति मन ला बेच के दान कईर दा; अउ अपन बर एसन बटुआ बनावा, जेहर जूना नी होथे, मने कि स्वर्ग मे एसन धन ला जुटावा जेहर घटथे नही अउ जेकर लिघे मे चोर मन भी नी जाए, अउ किरा मन नी बिगाड़थे।

³⁴ काबर कि जे ठन तुमन मन कर धन है, हुवा तुमन मन कर मन हर भी लगे रहथे।

हमेसेच तियार रहा

³⁵ तुमन मन कर कनिहा मन हर बांधल रहे अउ तुमन मन कर दीया हर जलत रहे,

³⁶ अउ तुमन मन ओ मैनसे मन नियर बना, जेमन मन अपन मालिक कर आसरा देखत रहथे कि ओहर बिवाह ले कब फिरही, कि जब ओहर आए के दूरा ला खटखटाही त तुरतेच ओकर बर खोएल देही।

³⁷ धन्य है ओ कमिया मन जेमन मन ला मालिक आए के जागत पाही; मय तुमन मन ले सहिच कहथो कि ओहर कनिहा मन ला बाएध के ओमन मन ला भात खाए बर बईठाही, अउ लिघे आए के ओमन मन कर सेवा करही।

³⁸ अगर ओहर राएत कर दूसर पहर या तीसर पहर मे आए के ओमन मन ला जागत पाही, त ओ कमिया मन हर धन्य है।

³⁹ लेकिन तुमन मन ये जाएन रखा कि अगर घर कर मालिक हर जानतिस कि चोर हर कोन घरी आही, त जागत रहतिस अउ अपन घर मे सेंध लगे नी देतिस।

⁴⁰ तुमन मन भी तियार रहा; काबर कि जे समय तुमन मन नी सोचथा, ओहिच समय मैनसे कर बेटा हर आए जाही।”

बिश्वास योग्य सेवक कोन?

⁴¹ तब पतरस हर कहिस, “हे प्रभु, का ये कहानी तय हर हमन मन ही ले या सबेच झन ले कहथस।”

⁴² प्रभु हर कहिस, “ओ बिश्वास योग्य अउ बुईधमान भण्डारी कोन है, जेकर मालिक हर ओला नौकर-चाकर मन पर मुख्या ठहराही कि ओमन मन ला समय मे भात मन ला देही।

⁴³ धन्य है ओ दास, जेला ओकर मालिक हर आए के एहिच कस करत पाही।

⁴⁴ मैहर तुमन मन ले सहिच कहथो, ओहर ओला अपन सबेच संपत्ति पर अधिकारी ठहराही।

⁴⁵ लेकिन अगर ओ कमिया हर सोचे लगही कि मोर मालिक कर अवई मे देरी करथे, अउ कमिया-कमनिन मन ला मारे पीटे लगही, अउ खाही-पीए अउ दारू पीए लगही।

⁴⁶ त ओ कमिया कर मालिक हर एसन दिन, जब ओहर ओकर आसरा नी देखत रही, अउ एसन समय जेला ओहर जानत नी रही, आही अउ ओला भारी सजा दे के ओकर हिस्सा बिश्वासघाती मन कर संग ठहराही।

⁴⁷ अउ ओ कमिया जेहर अपन मालिक कर इक्छा ला जानत रहिस, अउ तियार नी रहिस, अउ न ओकर इक्छा के अनुसार चलिस, बहुत मार खाही।

⁴⁸ लेकिन जेहर नी जाएन के मार खाए के लाएक बुता करही ओहर कम मार खाही। एकरे बर जेला बगरा देहल गईस है, ओकर ले बगरा मांगल जाही; अउ जेला बगरा सौपल गईस आहे, ओकर ले बगरा लेहल जाही।

यीशु के आए कर परिनाम

⁴⁹ मय धरती मे आगी लगाए बर आए हो, अउ का चाहथो केबल ये कि अझे सुलेग जातीस!

⁵⁰ मोला त एगोठ बपतिस्मा लेहे बर आहे, अउ जब तक ले ओहर नी ले लेही तब तक ले मय कईसे सकेती मे रहू।

⁵¹ का तुमन मन समझथा कि मैहर धरती मे मेल कराए बर आए हो? मैहर तुमन मन ले कहथो; नही, बरन अलग करे बर आए हो।

⁵² काबर कि अब ले एगोठ घर मे पाच झन अपन मे बिरोध रखही, तीन झन दुई झन ले, अउ दुई झन तीन झन ले।

⁵³ दाऊ बेटा ले, अउ बेटा दाऊ कर बिरोध रखही; दाई हर बेटी ले, अउ बेटी हर दाई ले, सास हर बहुरिया ले, अउ बहुरिया हर सास ले बिरोध रखही।”

समय कर पहिचान

⁵⁴ अउ यीशु हर भीड़ ले भी कहिस, “जब तय बदरी ला पश्चिम ले चड़हत देखथा त तुरतेच कहथा कि बारिस होही, अउ एहिच नियर होथे;

⁵⁵ अउ जब दक्खिन बईहर चलत देखथा त कहथा कि लू चलही, अउ एहिच नियर होथे।

⁵⁶ हे कपटी मन, तुमन मन धरती अउ अकाश कर रूप रंग मे भेद कईर सकथा, लेकिन ये युग कर बिषय मे काबर भेद करे बर नी जानथा?

अपन समस्या ला सुलझावा

⁵⁷ तुमन मन खुद निरनय काबर नी करथा कि सही का है?

⁵⁸ जब तय अपन बिरोधी कर संग न्यायी जग जाथस त डगर मे ही ओकर ले छूटे कर कोशिश कईर ले, एसन झिन होए कि ओहर तोला न्यायी ठन खिच ले जाए, अउ न्यायी हर तोला सिपाही ला सौपे अउ सिपाही तोला जेल मे डाएल देही।

⁵⁹ मैहर तुमन मन ले कहथो, कि जब तक ले तय कौड़ी-कौड़ी भईर नी देबे तब ले हुवा ले छूटे बर नी पाबे।”