यहूदा 1 - सरगुजिया बाइबिलनमस्कार 1 यहूदा कती ले जेहर यीशु मसीह कर कमिया अउ याकूब कर भाई है, ओ बुलाल मन कर नाव जेहर परमेश्वर दाऊ कती ले प्रिय अउ यीशु मसीह बर सुरक्षित है। बिश्वास बर परिश्रम 2 दया अउ शान्ति अउ प्रेम तुमन ला बहुताएत ले मिलत रहे। 3 हे प्रिय मन, जब मैहर तुमन ला ओ उद्धार कर बिषय मे लिखे ढेरेच मेहनत ले प्रयास करत रहे जेमे हमन सबेच झन सहभागी हन; त मैहर तुमन ला एला समझाए बर जरूरेच जाने कि ओ बिश्वास बर यत्न करा जेहर पवित्र मैनसे मन ला एकेच तोर सौपल गए रहिस। 4 काबर कि केतेक एसन मैनसे दबेक के (चुप-चाप) हमन मे आए मिलिन आहे, जेमन कर ये दण्ड कर बखान पुराना समय मे आगू ले लिखल गए रहिस: एमन भक्तहिन है, अउ हमर परमेश्वर कर अनुग्रह ला लुचपन मे बदेल डालथे, अउ हमर एक ठे मात्र मालिक अउ प्रभु यीशु मसीह कर इनकार करथे। 5 पर अगर तुमन सबेच गोएठ ला एक तोर जाएन दारे हा, तबो ले मैहर तुमन ला ये गोएठ कर याद दिलाए बर चाहथो, कि प्रभु हर एक कुल ला मिस्र देश ले छोड़ाए कर पाछू बिश्वास नी लाए बाला मन ला नाश करिस। 6 फिर जे स्वर्गदूत मन अपन पद ला स्थिर नी रखिन बरन अपन नीज निवास ला छोएड़ देहिन, ओहर ओमन ला भी ओ भिषन दिन कर न्याय बर अंधार मे, जेहर हमेसेच बर है, बंधन मन मे रखे है। 7 जे रीति ले सदोम अउ अमोरा अउ ओमन कर आस-पास कर नगर, जेहर एमन कर नियर ब्यभिचारी होए गए रहिन अउ पराए देह कर पाछू लग गए रहिन, आगी कर अनन्त दण्ड मे पईड़ के कहानी कर रूप मे ठहरिन है। 8 ओहिच रीति ले ये सपना देखे बाला मन भी अपन-अपन देह ला अशुद्ध करथे, अउ प्रभुता ला तुच्छ जानथा; अउ ऊचा पद बाला मन ला बुरा-भला कहथे। 9 लेकिन प्रधान स्वर्गदूत मीकाईल हर, जब शैतान ले मूसा कर लाश कर बिषय मे बाद-बिवाद करिस, त ओला बुरा-भला कही के दोष लगाए कर साहस नी करिस; पर ये कहिस, “प्रभु तोला डाटे।” 10 पर एमन मैनसे मन जे गोएठ मन ला नी जानथा, ओमन मन ला बुरा-भला कहथे; अउ जे गोएठ मन ला अचेतन पशु कर समान आदत ले जानथे, ओमन मे अपन आप ला नाश करथे। 11 ओमन पर हाए! काबर कि ओमन कैन जईसन चाल चलिन, अउ मजदूरी बर बिलाम कर नियर भ्रष्ट होए गिन है, अउ कोरह कर नियर बिरोध कईर के नाश होईन है। 12 ये तुमन कर प्रेम सभा मन मे तुमन कर संग खात पीएत, समुन्दर मे छिपल चट्टाएन जईसन है, अउ बेधड़क अपन ही पेट मे भरे बाला रखबाला है; ओमन निरजल बदरी है; जेमन ला बईहर उड़ाए ले जाथे; पतझर कर बिन फर कर रूख है, जेमन दूई तोर मईर गईन है; अउ जएर ले उखेड़ गईन है; 13 ये समुन्दर कर प्रचण्ड हिलकोरे है, जेहर अपन लज्जा कर फन उठाथे; ये डावा डोल तरई मन है, जेमन बर हमेसेच कर युग तक ले घोर अन्धार रखल जाही। 14 हनोक हर भी जेहर आदम ले सातवा पीढ़ी ले रहिस, एमन कर बिषय मे ये भविष्यवानी करिन, “देखा, प्रभु अपन लाखो पवित्र स्वर्गदूत मन कर संग मे अईस। 15 कि सबेच कर न्याय करे, अउ सबेच भक्तहिन मन ला ओमन कर अभक्ति कर सबेच बुता मन कर बिषय मे जेला ओमन मन भक्तहिन होए के करिन है, अउ ओ सबेच कठोर गोएठ कर बिषय मे जेला भक्तहिन पापी मन ओकर बिरोध मे कहिन है, दोषी ठहराए।” 16 ये त असन्तुष्ट, कुड़कुड़ाए बाला, अउ अपन अभिलाषा मन कर अनुसार चले बाला है; अउ अपन मुह ले घमण्ड कर गोएठ गोठियाथे, अउ ओमन लाभ बर मुह देख बड़ाई करथे। मेहनत करे मे लगे रईहा 17 पर हे प्रिय मन, तुमन ओ गोएठ मन ला याद रखा; जेला हमर प्रभु यीशु मसीह कर प्रेरित कह दारिस हे। 18 ओमन तुमन ले कहत रहिन, “पाछू दिन मन मे एसन ठट्टा करे बाला होही जेमन अपन अभक्ति कर अभिलाषा मन कर अनुसार चलही।” 19 एमन ओमन है जेमन फुट डालथे; एमन शाररिक मैनसे मन है, जेमन मे आत्मा नी है। 20 पर हे प्रिय मन, तुमन अपन अति पवित्र बिश्वास मे उन्नति करत अउ पवित्र आत्मा मे प्रार्थना करत, 21 अपन आप ला परमेश्वर कर प्रेम मे बनाए रखा; अउ अनन्त जीवन बर प्रभु यीशु मसीह कर दया कर बाट जोहत रहा। 22 ओमन पर जेमन शंका मे है दया करा। 23 अउ ढेरेच झन मन ला आगी मे ले झपेट के हिकाला; अउ ढेरेच मन झन पर भय कर संग मे दया करा, पर ओ कपरा ले भी घृना करा, जेहर देह कर द्वारा कलंकित होए गिस है। परमेश्वर कर स्तुति करा 24 अब जेहर तुमन ला ठोकर खाए ले बचाए सकथे, अउ अपन महिमा कर भरपूरी कर आगू मगन अउ बिन दोष के कईर ठड़वाए सकथे। 25 ओ एक ठे परमेश्वर हमर उद्धारकर्ता ला महिमा, मान-सम्मान अउ पराक्रम अउ अधिकार, हमर प्रभु यीशु मसीह कर द्वारा जईसन सनातन काल ले है, अब भी हो अउ युगानुयुग रहे। आमीन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation