याकूब 4 - सरगुजिया बाइबिलसंसार ले मित्रता 1 तुमन मे लड़ाई अउ झगरा मन कहा कती ले आए गईस? का ओ सुख बिलास मन ले नी अईस जेहर तुमन मन कर देह मन मे लड़त-भिड़त रहथा? 2 तुमन मन लालसा रखथा, अउ तुमन मन ला मिलथे नही; एकरे बर तुमन मन हत्या करथा। तुमन डाह करथा, अउ कुछ भी नी पाथा; त तुमन झगरा अउ लड़था; तुमन मन ला एकरे बर नी मिलथे कि नी मांगा। 3 तुमन मान्गथा अउ नी पावा, एकरे बर कि बुरा इक्छा ले मान्गथा, ताकि अपन भोग-बिलास मे उड़ाए दा। 4 हे ब्यभिचारी मन, का तुमन नी जाना कि संसार ले संगता बनाना परमेश्वर ले बैर करे बर है? तले जे कोनो हर संसार कर संगता होए बर चाहथे, ओहर अपन आप ला परमेश्वर कर बैरी बनाथे। 5 का तुमन ये समझथा, कि पवित्रशास्त्र हर ब्यर्थ कहथे? “जे आत्मा ला ओहर हमर भीतर बसईस है, का ओहर एसन लालसा करथे, जेकर फर डाह होथे?” 6 ओहर त अउ भी अनुग्रह देथे; ये कारन ये लिखल आहे, “परमेश्वर हर अभिमानी मन कर बिरोध करथे, पर दीन मन पर अनुग्रह करथे।” 7 एकरे बर परमेश्वर कर अधीन होए जा; अउ शैतान कर सामना करा, त ओहर तुमन जग ले भाएग हिकलही। 8 परमेश्वर कर लिघे आवा, त ओहर भी तुमन मन कर लिघे आही: हे पापी मन, अपन हाथ ला शुद्ध करा; अउ हे दुचित्ता लोग मन, अपन ह्रदय ला पवित्र करा। 9 दुखी होवा, अउ शोक करा, अउ रोवा, तुमन कर हसी शोक मे अउ तुमन कर आनन्द उदास मे बदेल जाए। 10 प्रभु कर लिघे दीन बना, त ओहर तुमन मन ला शिरोमनी बनाही। 11 हे भाई मन, एक दूसर कर बदनामी झिन करा, जेहर अपन भाई कर बदनामी करथे, या भाई पर दोष लगाथे, ओहर ब्यवस्था कर बदनामी करथे, अउ अगर तय ब्यवस्था पर दोष लगाथस, त तय ब्यवस्था पर रेंगे बाला नही, पर ओकर पर न्याय करे बाला ठहरे। 12 ब्यवस्था देहे बाला अउ न्याय करे बाला त एकेच ठे है, जेहर बचाए अउ नाएस करे मे सामर्थ्य है; पर तय कोन हस, जेहर अपन परोसी पर दोष लगाथे? भविष्य कर चिन्ता 13 तुमन जे ये कहत हा, “अझे या काएल हमन कोनो अउ नगर मे जाए के हुवा एक बरस बिताबो, अउ ब्यपार कईर के लाभ कमाबो।” 14 अउ ये नी जानस कि काएल का होही। सुईन त लेवा, तुमन कर जीवन है ही का? तुमन त भाप कर नियर हा, जेहर तनिक देर दिखाई देथे फिर लोप होए जाथे। 15 एकर बिपरीत तुमन मन ला ये कहे बर चाही, “अगर प्रभु चाही त हमन जीवित रहबो, अउ ये या ओ बुता ला भी करबो।” 16 पर तुमन अपन डिंग मारे पर घमण्ड करथा, एसन सबेच घमण्ड बुरा होथे। 17 एकरे बर अगर जे कोनो हर भलाई करे बर जानथा अउ नी करे, त ओकर बर ये पाप है। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation