याकूब 3 - सरगुजिया बाइबिलजीभ एक आगी है 1 हे मोर भाई मन, तुमन मे ले ढेरेच उपदेशक झिन बनिहा, काबर कि जानत हा, कि हमन उपदेशक मन अउ भी दोषी ठहरब। 2 एकरे बर कि हमन हर ढेरेच तोर चुईक जाथी; जे कोनो हर बचन मे नी चुकथे ओहिच त सिद्ध आदमी मन है; अउ सबेच देह पर भी लगाम लगाए सकथे। 3 जब हमन अपन बश मे करे बर घोड़ा मन कर मुह मे लगाम लगाथन, त हमन ओकर सबेच देह ला भी घुमाए सकत हन। 4 देखा, जहाज मन भी, अगर एकस बड़खा होथे, अउ प्रचंड बईहर ले चलाए जाथे, तबो ले एक छोटे अकुन पतवार कर द्वारा मांझी के इक्छा कर अनुसार घुमाल जाथे 5 ओहिच कस ही जीभ भी एक छोटे अकुन देह है अउ ओहर बड़खा-बड़खा डिंग मारथे; देखा, तनिक अकुन आगी ले केतेक बड़खा बन मे आगी लईग जाथे। 6 जीभ हर भी एक आगी है, जीभ हमर हर देह मे अधर्म कर एक लोक है, अउ सबेच देह पर दाग लगाथे, अउ जीवन गति मे आगी लगाए देथे, अउ नरक कर कुण्ड कर आगी ले जलत रहथे। 7 काबर कि हरेक नियर कर जंगली जानवर, चरई, अउ रेंगे बाला जन्तु, अउ जलचर त लोग मन कर बश मे होए सकथे अउ होए भी गईन है। 8 पर जीभ ला लोग मन ले कोनोच हर बश मे नी कईर सकथे; ओहर एक एसन बला है जेहर कभो नी रूके; ओहर प्रान नाशक बिष ले भरिस आहे। 9 एकरे ले हमन प्रभु अउ दाऊ कर स्तुति करथन; अउ एकरे ले लोग मन ला जेमन मन परमेश्वर कर स्वरूप मे उत्पन्न होए हन श्राप देथन। 10 एक ही मुह ले धन्यवाद अउ श्राप दोनोच हिकलथे। हे मोर भाई मन, एसन नी होए बर चाही। 11 का स्रोत कर एक ही मुह ले मीठा अउ खरा पानी दोनोच हिकलथे? 12 हे मोर भाई मन, का अंजीर कर रूख ले जईतुन, या दाख कर लता मे अंजीर लग सकथे? ओहिच कस खरा स्रोत मे ले मीठा पानी नी हिकेल सकथे। सहिच बिवेक 13 तुमन मे ज्ञानवान अउ समझदार कोन है? जेहर एसन होही ओहर अपन बुता मन ला बड़िया चाल-चलन ले ओ नम्रता सहित परगट करे जेहर ज्ञान ले उत्पन्न होथे। 14 पर अगर तुमन मन अपन-अपन मे करूवा डाह अउ बिरोध रखथा, त सत्य कर बिरोध मे घमण्ड झिन करिहा, अउ न त झूठ बोलिहा। 15 ये ज्ञान ओहर नी है जेहर स्वर्ग कती ले उतरथे, बरन सांसारिक, अउ शारीरिक, अउ शैतानी है। 16 काबर कि जहा डाह अउ बिरोध होथे, हुवा लड़ाई अउ हर नियर कर दुष्कर्म भी होथे। 17 पर जे ज्ञान हर उपर कती ले आथे ओहर त आगू ले पवित्र होथे फिर मिनलसार, कोमल अउ मृदुभाव अउ दया, अउ बड़िया फर ले लदल अउ पक्षपात अउ कपट नी रहथे। 18 अउ मिलाप कराए बाला कर धार्मिकता कर फर मेल-मिलाप कर संग बुनथन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation