इबरानी 8 - सरगुजिया बाइबिल

स्वर्ग कर महायाजक

¹ अब जे गोएठ ला हमन मन कहत रहेन, ओमे ले सबेच बड़खा गोएठ एहर हे, कि हमर एकस महायाजक आहे, जेहर स्वर्ग मे महामहिमन के सिंहासन कर जेवनी कती जाए बैठिस है।

² अउ पवित्र जगहा अउ ओ सच्चा तम्बू कर सेवक होईस, जेला कोनो आदमी हर नही, बरन प्रभु हर ठड़वईस आहे।

³ काबर कि हर एक महायाजक भेंट अउ बलिदान चड़हाए बर ठहराल जाथे, ये कारन जरूरेच हे कि याजक कर लिघे भी कुछ चड़हाए बर होए ले चाही।

⁴ अउ अगर ओहर धरती मे होतीस त कभो याजक नी होतीस, एकरे बर कि ब्यवस्था कर अनुसार भेंट चड़हाए बाला त आहे।

⁵ ओमन स्वर्ग कर चीज मन कर प्रतिरूप अउ छाव कर सेवा करथे; जईसन जब मूसा हर तम्बू बनाए बर रहिस, त ओला ये चेतावनी मिलिस, “देख, जे नमूना तोला पहार मे देखाल गए रहिस, ओकर अनुसार सबेच ला बनाबे।”

⁶ पर ओ याजक मन ले बईढ़ के सेवा यीशु मसीह ला मिलिस, काबर कि ओहर अउ भी उत्तम बाचा कर मांझा मे ठहरिस, जेहर अउ उत्तम प्रतिज्ञा कर सहारा मे बान्धल गईस आहे।

नावा बाचा

⁷ काबर कि अगर ओहर आगू कर बाचा हर बिन दोष कर होतीस, त दूसर बर मौका नी खोजल जातीस।

⁸ पर ओहर ओमन मे दोष लगाए के कहथे, “प्रभु कहथे, देखा, ओ दिन मन हर आत हे, कि मैहर इस्राएल कर घराना कर संग, अउ यहूदा कर घराना कर संग, नावा बाचा बांधहू।

⁹ एहर ओ बाचा कर नियर नी होही, जेला मैहर ओमन कर दाऊ-ददा मन कर संग ओ समय बान्धे रहे, जब मैहर ओमन कर हाथ पकेड़ के ओमन ला मिस्र देश ले हिकाएल लानेन, काबर कि ओमन हर मोर बाचा मे जमे नी रहिन, एकरे बर मैहर ओमन कर सुधि नी लेहे; प्रभु हर एहिच कहथे।

¹⁰ फिर प्रभु कहथे, कि जे बाचा ला मैहर ओ दिन के पाछू इस्राएल कर घराना मन कर संग मे बांधहू, ओहर ये हवे, कि मैहर अपन ब्यवस्था ला ओमन कर मन मे डालहू, अउ ओला ओमन कर हृदय मे लिखहू, अउ मैहर ओमन कर परमेश्वर ठहरहू, अउ ओमन मन मोर मैनसे ठहरही।

¹¹ अउ हर एक झन अपन देश बाला कर अउ अपन भाई ला ये शिक्षा नी देही, कि तय प्रभु ला पहिचान, काबर कि छोटे ले बड़खा तक सबेच मोला जाएन लेही।

¹² काबर कि मैहर ओमन कर अधर्म कर बारे मे दयालु होहू, अउ ओमन कर पाप मन ला फिर याद नी करहू।”

¹³ नावा बाचा कर स्थापना ले ओकर पहिला बाचा ला जुनहा ठहराए देहिस; अउ जे चीज मन जुनहा अउ जीरन होए जाथे, ओकर मिट जाए ले जरूरेच आहे।