इबरानी 7 - सरगुजिया बाइबिलमलिकिसिदक याजक हर 1 ये मलिकिसिदक शालेम कर राजा, अउ परम प्रधान परमेश्वर कर याजक, हमेसेच बर याजक बने रहिस, जब अब्राहम राजा मन ला माएर के फिर जात रहिस, त एहिच हर ओकर ले भेंट कईर के ओला आशीष देहिस, 2 एहिच ला अब्राहम हर सबेच चीज मन कर दसवां अंश भी देहिस। एहर आगू अपन नाव के अर्थ कर अनुसार, धार्मिकता कर राजा, अउ फिर शालेम मने कि शान्ति कर राजा है। 3 जेकर न दाऊ, न दाई, न बंशावली है, जेकर दिन मन कर न आदि है, अउ न जीवन कर आखरी हे; लेकिन परमेश्वर के बेटा कर, स्वरूप ठहर के ओहर हमेसेच बर याजक बने रहथे। 4 अब एकर मे ध्यान करा, कि ओहर कईसन महान रहिस जेकर कुलपति अब्राहम हर लुटल मन ले बड़िया ले बड़िया चीज कर दसवां अंश देहिस। 5 लेवी कर संतान मन ले जेहर याजक कर पद ला पाथे, ओमन मन ला आदेस मिलिस हे, कि लोग मन, मने अपन भाई मन ले, चाहे ओमन अब्राहम ही कर देह ले काबर ही जन्मल होही, ब्यवस्था कर अनुसार दसवां अंश लेवा। 6 पर एहर, जेहर ओमन के बंशावली कर नी रहिस, अब्राहम ले दसवां अंश लेहिस, अउ जेला प्रतिज्ञा मिले रहिस ओला आशीष देहिस। 7 एमे शंका नी है, कि छोटे हर बड़खा ले आशीष पाथे। 8 अउ हिया त मरनहार आदमी मन भी दसवां अंश लेथे, पर हुवा ओहिच हर लेथे, जेकर गवाही देहल जाथे, कि ओहर जीवित है। 9 त हमन ये भी कह सकथी कि लेवी हर भी, जेहर दसवां अंश लेथे, अब्राहम कर द्वारा दसवां अंश देहिस। 10 काबर कि जे समय मलिकिसिदक हर ओकर दाऊ ले भेंट करिस, ओ समय ओहर अपन दाऊ कर देह मे रहिस। एक नावा याजक कर जरूरत 11 अगर लेवी मन याजक पद कर द्वारा सिद्ध प्राप्त होए सकतिन (जेकर सहारा लोग मन ला ब्यवस्था मिले रहिस) त फिर का जरूरत रहिस कि दूसर याजक मलिकिसिदक कर रीति मे ठड़होए, अउ हारून के रीति नी कहलाही? 12 काबर कि जब याजक कर पद ला बदलल जाथे, त ब्यवस्था कर भी बदले बर जरूरेच है। 13 काबर कि जेकर बारे मे ये गोएठ कहल जाथे कि ओहर दूसर गोत्र कर है, जेमे ले कोनो हर बेदी कर सेवा नी करिस, 14 त परगट है कि हमर प्रभु यहूदा कर गोत्र मे ले उगिस आहे, अउ ये गोत्र कर बारे मे मूसा हर याजक पद कर कुछूच चर्चा नी करिस। 15 हमर दावा अउ भी साफ ले परगट होए जाथे, जब मलिकिसिदक कर नियर एक अउ याजक पैदा होए जाथे, 16 जेहर देह के आदेस कर ब्यवस्था के अनुसार नी है, पर अबिनाशी जीवन कर सामर्थ्य कर नियर चुनल गईस है। 17 काबर कि ओकर बारे मे ये गवाही देहल गईस है, “तय हर मलिकिसिदक कर रीति मे हमेसेच बर याजक हस।” 18 ये नियर, आगू कर आदेस कमजोर अउ बिन फर कर होए के कारन लुकाए गईस। 19 (एकरे बर कि ब्यवस्था हर कोनो गोएठ ला सिद्ध नी करिस) अउ ओकर जगहा मे एक एसन उत्तम आसरा रखल आहे जेकर द्वारा हमन परमेश्वर कर लिघे मे जाए सकथी। नावा महायाजक कर महानता 20 अउ एकरे बर मसीह कर चुनाव बिन कसम कर नी होईस। 21 काबर कि ओहर त बिन कसम कर याजक ठहराल गईस, पर एहर कसम के संग ओकर कती ले नियुक्त करल गईस हे जेहर ओकर बारे मे कहिस, “प्रभु हर कसम खईस, अउ ओहर ओकर ले फिर नी पछताही, कि तय हर हमेसेच बर याजक हे।” 22 ये मंधे यीशु एक उत्तम बाचा कर जामिन ठहरिस। 23 ओमन त ढेरेच ज्यादा याजक बनत अईन, एकर कारन एहर रहिस, कि मृत्यु हर ओला रहे नी देहत रहिस। 24 पर एहर युगानुयुग रहथे; ये कारन ओकर याजक कर पद हर अटल आहे। 25 एकरे बर जेहर ओकर द्वारा परमेश्वर कर लिघे आथे, ओहर ओमन कर पूरा पूरा उद्धार कईर सकथे, काबर कि ओहर ओमन बर बिनती करे बर हमेसेच जीवित आहे। 26 काबर कि एसन ही महायाजक हमर लाएक रहिस, जेहर पवित्र, अउ निष्कपट, अउ निर्मल, अउ पापी मन ले अलगेच, अउ स्वर्ग ले भी ऊचा करल होतीस। 27 अउ ओ महायाजक मन कर नियर ओला जरूरेच नही हे, कि रोज दिन आगू अपन पाप अउ फिर मैनसे मन कर पाप बर बलिदान चड़हाही; काबर कि ओहर अपन आप ला बलिदान चड़हाए के ओला एक ही तोर मे पूरा कईर देहिस। 28 काबर कि ब्यवस्था त कमजोर आदमी अउ मन ला महायाजक बनाथे; लेकिन ओ कसम कर बचन, जेहर ब्यवस्था कर पाछू मे खाल गईस, ओ बेटा ला बनाथे जेहर युगानुयुग बर सिद्ध करल गईस आहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation