इबरानी 6 - सरगुजिया बाइबिलभटके कर फर 1 एकरे बर आवा मसीह के शिक्षा कर शुरू के गोएठ मन ला छोएड़ के, हमन सिद्धता कती आगू बड़हत जई, अउ मरल बुता मन ले मन फिराए, अउ परमेश्वर मे बिश्वास करे, 2 अउ बपतिस्मा मन अउ हाथ रखे, अउ मरल मन ले जी उठे, अउ अनन्त न्याय कर शिक्षा रूपी नेव, फिर ले नी बनाब। 3 अगर परमेश्वर हर चाही, त हमन एहिच कस करबो। 4 काबर कि जेमन एक तोर ज्योति पईन आहे, अउ जेमन स्वर्गीय बरदान कर स्वाद ला चईख दारिन हे, अउ पवित्र आत्मा कर भागी होए गईन आहे, 5 अउ परमेश्वर के उत्तम बचन अउ आए बाला युग के सामर्थ कर स्वाद चईख दारे हन। 6 अगर ओमन मन भटेक जाही; त ओमन ला मन फिराए बर फिर नावा बनई अनहोना हे; काबर कि ओमन परमेश्वर कर बेटा ला अपन बर फिर ले क्रूस मे चड़हाथे अउ परगट मे ओकर उपर दोष लगाथे। 7 काबर कि जे धरती हर बारिस कर पानी ला, जेहर ओकर उपर बार-बार पड़थे, पी-पी के जे मैनसे मन बर ओहर जोतल बुनल जाथे ओमन कर बुता ले साग पात उपजाथे, ओहर परमेश्वर ले आशीष पाथे। 8 लेकिन अगर ओहर झाड़-झंकार अउ घास-फूस उगाही, त निकम्मा अउ श्रापित होए बर आहे, अउ ओकर आखरी जलाए बर आहे। 9 पर हे प्रिय मन, जब कि हमन ये गोएठ मन ला कहथन तबो ले तुमन कर बिषय मे हमन एकर ले बड़िया अउ उद्धार बाला गोएठ मन कर भरोसा करथन। 10 काबर कि परमेश्वर अन्याय करे बाला नी है, कि तुमन कर बुता, अउ ओ प्रेम ला भूईल जाही, जेला तुमन ओकर नाव बर एहिच रीति ले देखाया, कि पवित्र मैनसे मन कर सेवा करा, अउ करत भी रहा। 11 लेकिन हमन ढेरेच चाहथन, कि तुमन मन ले हरेक झन आखरी तक ले पूरा आसरा बर एहिच नियर कोशिश करतेच रहा। 12 ताकि तय आलसी झिन होए जाए; बरन ओमन कर अनुकरन करा जेमन बिश्वास अउ धीरज ले प्रतिज्ञा मन कर वारिस होवत जाथे। बिश्वास लाएक प्रतिज्ञा 13 परमेश्वर हर अब्राहम ले प्रतिज्ञा करत समय जब कसम खाए बर अपन ले कोनो ला बड़खा नी पईस, त अपनेच हर कसम खाए के कहिस, 14 “मैहर सहिच मे तोला ढेरेच आशीष देहू, अउ तोर संतान मन ला बड़हात जाहू।” 15 अउ ये रीति ले ओहर धीरज धईर के प्रतिज्ञा करल गईस गोएठ मन ला पईस। 16 मैनसे मन त अपन ले कोनो बड़खा कर कसम खाथे, अउ ओमन कर सबेच बिवाद कर फईसला कसम ले पूरा होथे। 17 एकरे बर जब परमेश्वर हर प्रतिज्ञा कर वारिस मन पर अउ भी सफ्फा रीति ले परगट करे बर चाहिस, कि ओकर मतलब बदेल नी सकथे, त कसम ला मान्झा मे लानिस। 18 ताकि दुई बिचार बिन बदले गोएठ मन कर द्वारा जेमन कर बिषय मे परमेश्वर कर झूठा ठहरई अनहोना हे, हमर मजबूती ले ढाढ़स बांधल जाही, जेमन शरन लेहे ले एकरे बर कुदिन आहे, कि ओ आसरा ला जेहर आगू मे रखल गईस आहे पाबो। 19 ओ आसरा हर हमर प्रान बर लंगर आहे जेहर जमल अउ मजबूत है, अउ परदा कर भीतर तक पहुचथे। 20 जे ठन यीशु हर मलिकिसिदक कर रीति मे हमेसेच काल बर महायाजक बईन के, हमर बर अगुवा कर रूप मे घुसिस आहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation