इबरानी 5 - सरगुजिया बाइबिलमहायाजक बर योग्यता 1 काबर कि हर एक महायाजक मैनसे मन ले लेहल जाथे, अउ मैनसे मन बर, ओ गोएठ मन कर बिषय मे जेहर परमेश्वर ले रिश्ता रखथे, ठहराल जाथे: कि भेंट अउ पाप बलि चड़हाल जाए। 2 अउ ओहर अज्ञानी मन अउ भटकल मन कर साथ नरम ले ब्यवहार कईर सकथे, एकरे बर कि ओहर खुदेच कमजोर ले घिरल रहथे। 3 एकरे बर ओला चाही, कि जेकस मैनसे मन बर, ओहिच कस अपन बर भी पाप बलि चड़हाल करही। 4 ये आदर कर पद कोनो अपनेच आप ले नी लेथे, जब ले कि हारून कर नियर परमेश्वर कती ले ठहराए नी जाही। हमेसेच बर महायाजक 5 ओहिच नियर मसीह हर भी महायाजक बने कर बड़ाई अपन आप ले नी लेहिस, लेकिन ओला ओहिच हर देहिस, जेहर ओकर ले कहे रहिस, “तय मोर बेटा हस, आएज मैहर तोला जन्माए हो।” 6 एहिच नियर ओहर दूसर जगह मे भी कहथे, “तय मलिकिसिदक कर रीति मे हमेसेच बर याजक हस।” 7 यीशु हर अपन देह मे रहे कर दिन मन मे ऊचे शब्द ले पुकाएर-पुकाएर के अउ आसू बहाए-बहाए के ओकर ले जेहर ओला मरे ले बचाए सकत रहिस प्रार्थना अउ बिनती करिस, अउ भक्ति कर कारन ओकर सुनल गईस। 8 बेटा होए के भी ओहर दुख उठाए-उठाए के हुकूम माने बर सिखिस। 9 अउ सिद्ध बईन के, अपन सबेच हुकूम माने बाला मन बर हमेसेच बर उद्धार कर कारन हो गईस। 10 अउ ओला परमेश्वर कती ले मलिकिसिदक कर रीति मे महायाजक कर पद मिलिस। आत्मिक जीवन बिन तियारी कर 11 एकरे बिषय मे हमन ला ढेरेच गोएठ कहे बर आहे, जेमन कर समझे बर भी कठिन आहे; एकरे बर कि तुमन ऊचा सुने लागे हा। 12 समय कर बिचार ले त तुमन ला गुरू होए जाए बर रहिस, तबो ले भी ये जरूरेच होए गिस आहे कि कोनो तुमन ला परमेश्वर कर बचन मन कर शुरू कर शिक्षा फिर ले सिखाल जाही? तय त एसन होए गए हस, कि तोला अन्न कर बदले अब तक ले दूध ही चाही। 13 काबर कि दूध पिवईया लईका मन ला त धार्मिकता के बचन कर पहिचान नी रहे, काबर कि ओहर लईका है। 14 लेकिन अन्न सयाना मन बर है जेमन कर ज्ञानन्द्रिय मन अभ्यास करत-करत भला-बुरा मे भेद करे मे निपूरन होए गईस है। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation