इबरानी 4 - सरगुजिया बाइबिल

परमेश्वर के बिश्राम दिन मे जवई

¹ एकरे बर जब कि ओकर बिश्राम मे घुसे कर प्रतिज्ञा अझे तक ले हवे, त हमन ला डरे बर चाही एकस झिन होए, कि तुमन मन ले कोनोच हर ओकर ले वंचित रह जईहा।

² काबर कि हमन ला ओमन नियर ही सुसमाचार सुनाल गईस है, पर सुनल बचन ले ओमन ला कुछूच फायदा नी होईस; काबर कि सुने बाला मन कर मन मे बिश्वास कर संग मे नी बईठिस।

³ लेकिन हमन जेमन हर बिश्वास करेन, ओ बिश्राम मे घुसथे; जेकस ओहर कहिस, “मैहर अपन गुस्सा मे कसम खाए, कि ओमन मोर बिश्राम मे घुसे नी पाही।” अगर जगत कर उत्पत्ति कर समय ले ओकर बुता पूरा होए दारे रहिस।

⁴ काबर कि सातवा दिन कर बारे मे ओहर कहिस, ये कहिस, “परमेश्वर हर सातवा दिन अपन सबेच बुता मन ला निपटाए के बिश्राम करिस।”

⁵ अउ ये जगहा मे फिर ये कहथे, “ओमन मोर बिश्राम मे नी घुसे पाही।”

⁶ त जब ये गोएठ हर बाचीस है कि केतेक अउ है जेमन ओ बिश्राम मे घुसही, अउ जेमन ला ओकर सुसमाचार आगू सुनाल गईस, ओमन हर अज्ञानी माने कर कारन ओमे नी घुसही,

⁷ एकरे बर ओहर कोनोच बिशेष दिन मे ठहराए के एतेक दिन कर पाछू दाऊद कर पुस्तक मे ओला, “आएज कर दिन” कहथे। जईसन आगू कहल गए रहिस, “अगर आएज तुमन ओकर शब्द ला सुनिहा, त अपन मन ला कठोर झिन करिहा।”

⁸ काबर कि अगर यहोशू हर ओमन ला बिश्राम मे घुसे बर देतिस, त ओकर पाछू दूसर दिन कर चर्चा नी होतीस।

⁹ एकरे बर जाएन लेवा कि परमेश्वर कर मैनसे मन बर सब्त कर बिश्राम बाचीस आहे;

¹⁰ काबर कि जेमन ओकर बिश्राम मे घुसही, ओमन भी परमेश्वर कर आगू अपन बुता मन ला पूरा कईर के बिश्राम करिन आहे।

¹¹ तले हमन ओ बिश्राम मे घुसे कर प्रयास कर, एसन झिन होए कि कोनो मन ओकर नियर हुकूम नी माएन के, गिर गईन।

¹² काबर कि परमेश्वर कर बचन हर जीवित, अउ प्रबल, अउ हर एक दुई धारी तलवार ले भी ढेरेच धार दार आहे; अउ प्रान, अउ आत्मा ला, अउ गाठ-गाठ अउ गुदा-गुदा ला अलगेच कईर के आर-पार ला बेधथे, अउ मन कर भावना मन ला अउ बिचार मन ला जाचथे।

¹³ सृष्टि कर कोनोच चीज हर ओकर ले छिपल नी है। बरन जेकर ले हमन ला बुता है, ओकर आएख कर आगू सबेच चीज मन खुलल अउ परगट है।

हमर महान महायाजक

¹⁴ एकरे बर जब हमर एकस बड़खा महायाजक आहे, जेहर स्वर्ग मे ले होए के गईस, मने कि परमेश्वर कर बेटा यीशु त, आवा, हमन अपन अंगीकार ला मजबूती ले थामे रही।

¹⁵ काबर कि हमर एकस महायाजक नी है, जेहर हमर कमजोरी मन मे हमर संग दुखित नी होए सकही। बरन सबेच गोएठ मे हमर एकस परखल त गईस, तबोच ले निस्पाप हिकलिस।

¹⁶ एकरे बर आवा, हमन अनुग्रह कर सिंहासन कर पास हिम्मत बाएध के चली, कि हमन पर दया होए, अउ ओ अनुग्रह ला पावब, जेहर जरूरत कर समय मे हमर सहायता करही।