इबरानी 3 - सरगुजिया बाइबिल

मूसा बिश्वास लाएक कमिया: यीशु मसीह बिश्वास लाएक बेटा

¹ एकरे बर हे पवित्र भाई मन, तुमन जेमन स्वर्गीय बुलाहट मे भागी हा, ओ प्रेरित अउ महायाजक यीशु पर जेला हमन अंगीकार करथन; ध्यान करा।

² ओहर अपन ठहराए दार मन कर बिश्वास योग्य रहिस, जईसन मूसा हर भी परमेश्वर कर सबेच घर मे रहिस।

³ काबर कि यीशु हर मूसा ले एतेक बईड़ के महिमा कर लाएक समझल गईस है, जेतेक कि घर कर बनाए बाला घर ले बईड़ के आदर रखथे।

⁴ काबर कि हर एक घर कर कोनो न कोनोच बनाए बाला होथे। पर जेहर सबेच कुछ ला बनईस ओहर परमेश्वर है।

⁵ मूसा हर त परमेश्वर कर सबेच घर मे सेवक कर नियर बिश्वास योग्य रहिस, कि जे गोएठ मन कर बखान होए बाला रहिस, ओमन मन कर गवाही देही।

⁶ लेकिन यीशु मसीह बेटा कर नियर परमेश्वर के घर कर अधिकारी हे; अउ ओकर घर हमन ही, अगर हमन साहस मे अउ अपन आसरा कर घमण्ड पर आखरी तक ले मजबूती ले जमे रहब।

अबिश्वास के कारन चेतई

⁷ एकरे बर जईसन पवित्र आत्मा हर कहथे, “अगर आएज तुमन ओकर शब्द सुनिहा,

⁸ त अपन मन ला कठोर झिन करिहा, जईसन कि गुस्सा दिलाए कर समय अउ परीक्षा कर दिन जंगल मे करे रहा।

⁹ जहा तुमन कर दाऊ-ददा मन मोला जाएच के परखीन अउ चालीस बरस तक ले मोर बुता ला देखिन।

¹⁰ ये कारन मैहर, ओ समय कर मैनसे मन ले गुस्साए रहे, अउ कहिस, ‘एमन कर मन हमेसेच भटकल रहथे, अउ एमन हर मोर डगर मन ला नी पहिचानिन।’

¹¹ तब मैहर गुस्सा मे आए के कसम खाए, ‘ओमन मोर बिश्राम मे घुसे नी पाही।’”

¹² हे भाई मन, चवकस रईहा, कि तुमन एकस बुरा अउ अबिश्वासी मन झिन होवा, जेहर तुमन ला जीवते परमेश्वर ले दुरिहा हटाए ले जाही।

¹³ बरन जे दिन तक ले आएज कर दिन तक कहल जाथे, हर दिन एक दूसर ला समझात रहा, एसन झिन होए कि तुमन मे ले कोनोच झन पाप कर छल मे आए के कठोर होए जाही।

¹⁴ काबर कि हमन मसीह कर भागीदार होए हन, अगर हमन अपन शुरू कर भरोसा मे आखरी तक ले मजबूती ले जमे रहब।

¹⁵ जईसन कहल जाथे, “अगर आएज तुमन ओकर शब्द ला सुनिहा, त अपन मन ला कठोर झिन करिहा, जईसन कि गुस्सा दिलाए कर समय मे करे रहा।”

¹⁶ भला कोन मैनसे मन हर सुईन के भी गुस्सा दिलईस? का ओ सबेच झन मन नही, जेहर मूसा कर द्वारा मिस्र ले हिकले रहिन?

¹⁷ अउ ओहर चालीस बरस तक ले कोन मैनसे मन ले गुस्साए रहिस? का ओहिच मन ले नही, जेमन मन हर पाप करिन, अउ ओमन कर लाश हर जंगल मे पड़े रहिस?

¹⁸ अउ ओहर काकर ले कसम खईस कि तुमन मन हर मोर बिश्राम मे घुसे नी पईहा: का केबल ओमन ले ही नही जेमन मन हर हुकूम ला नी मानिन?

¹⁹ ये नियर हमन हर देखथन कि ओमन अबिश्वास के कारन घुसे नी सकिन।