इबरानी 13 - सरगुजिया बाइबिलगरहन लाएक सेवा 1 भाई चारा कर प्रेम मे बने रहा। 2 पहुनई करे बर झिन भूलईहा, काबर कि एकर द्वारा ले कुछ मैनसे मन मे स्वर्गदूत मन कर आदर सत्कार करिन हे। 3 कैदी मन कर एसन सुईध लेवा, कि ओमन कर संग तुमन मन भी कैद मे हा; अउ जेमन कर संग मे बुरा बरताव करे हा, ओमन मन कर भी ये समेझ के कि सुधी लेहल करा, कि हमन मन भी देह मे हन। 4 बियाह हर सबेच मे आदर कर गोएठ समझल जाए, अउ बियाह कर बिछावन हर बिना कलंक कर रहे, काबर कि परमेश्वर ब्यभिचारी मन, अउ परस्त्रीगामी मन कर न्याय करही। 5 तुमन कर स्वभाव मे लोभ नी होए बर चाही, अउ जे चीज तुमन जग हे, ओहिच मे संतोष करा; काबर कि ओहर अपनेच कहिस है, “मैहर तोला कभो नी छोड़हू, अउ न कभो त्यागहू।” 6 एकरे बर हमन निडर होए के कहथन, “प्रभु, मोर सहायता करे बाला है; मैहर नी डरहू; मैनसे मन मोर का कईर सकथे?” 7 जेमन मन तुमन कर अगुवा रहिन, अउ जेमन मन तोला परमेश्वर कर बचन ला सुनईन है, ओमन मन ला याद रख; अउ ध्यान ले ओमन कर चाल-चलन कर आखरी देख के ओमन मन के बिश्वास कर अनुसरन करा। 8 यीशु मसीह काएल अउ आएज अउ युगानुयुग एक जईसन हे। 9 कई नियर कर बिचित्र उपदेश मन ले झिन भरमाल जावा, काबर कि मन कर अनुग्रह ले मजबूत रहई बड़िहा हे, न कि ओ खाए कर चीज मन ले जेमन ले काम रखे बाला मन ला कुछूच लाभ नी होईस। 10 हमर एगोठ एसन बेदी हे, जेकर ले खाए कर अधिकार ओ लोग मन ला नी है, जेमन मन तम्बू कर सेवा करथे। 11 काबर कि जे पशु मन कर लहू महायाजक पाप बलि बर पवित्र जगहा मे ले जाथे, ओमन कर देह ला छावनी कर बाहरी कती जलाल जाथे। 12 एहिच कारन, यीशु हर भी मैनसे मन ला लहू ले पवित्र करे बर दूरा कर बाहर दुख उठईस। 13 एकरे बर, आवा ओकर बदनामी ला ले के अपन उपर छावनी कर बाहर ओकर जग हिकेल जई। 14 काबर कि हिया हमर जग कोनो स्थाई नगर नी है, बरन हमन एक आए बाला नगर कर खोज मे हन। 15 एकरे बर हमन ओकर द्वारा ले स्तुति रूपी बलिदान, मने कि ओ होठ मन कर फर जेला ओकर नाव कर अंगीकार करथे, परमेश्वर बर हमेसेच चड़हाब। 16 पर भलाई करे ले, अउ उदारता करे बर झिन भुलावा, काबर कि परमेश्वर हर एकस बलिदान मन ले खुश होथे। प्रार्थना कर निवेदन 17 अपन अगुवा मन कर आदेस मन ला माना, अउ ओमन मन कर अधीन रहा, काबर कि ओमन कर नियर तुमन मन कर प्रान मन बर जागत रहथन, जेमन मन ला लेखा देहे बर पड़ही; ओमन ये बुता ला आनन्द ले करे, न कि जाड़ सास ले के, काबर कि ये दशा मे तुमन ला कोनोच लाभ नी होही। 18 हमर बर प्रार्थना करतेच रहा, काबर कि हमन ला भरोसा आहे कि हमर बिवेक शुद्ध हे; अउ हमन सबेच गोएठ मन मे बड़िया चाल चले बर चाहथन। 19 प्रार्थना करे बर मय तुमन ला अउ भी समझाथो, कि मय जल्दी तुमन मन जग फिर ले आए सकहू। आशीर्वाद 20 अब शान्ति देहे बाला परमेश्वर, जेहर हमर प्रभु यीशु मसीह ला जेहर भेड़ मन कर महान रख बाला हे सनातन बाचा कर लहू बर गुन ले मरल मन ले जीयाए के ले अईस, 21 तोला सबेच भले गोएठ मे सिद्ध करही, जेकर ले तय ओकर इक्छा पूरी करबे, अउ जे कुछ ओला यीशु मसीह ले हमन मे उत्पन्न करही ओकरेच महिमा हमेसेच होतेच रही। आमीन। 22 हे, भाई मन मय तुमन ले बिनती करथो कि ये उपदेश कर गोएठ मन ला सह लेवा; काबर कि मय तुमन ला ढेर छोटे लिखे हो। 23 तुमन ला ये पता होए कि तीमुथियुस, हमर भाई होए गईस हे अउ अगर ओहर जल्दी आए गईस, त मोर ओकर साथ तुमन ले भेंट करहू। 24 अपन सबेच अगुवा मन अउ सबेच पवित्र मैनसे मन ला नमस्कार कहा, इटली बाला मन तुमन ला नमस्कार कहथे। 25 तुमन सबेच पर अनुग्रह होवत रहे। आमीन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation