गलातियों 6 - सरगुजिया बाइबिल

सबेच झन ले भलाई करा

¹ हे भाई मन, अगर कोनो मैनसे हर कोनो अपराध मे पकड़ाए जाही, त तुमन जेमन आत्मिक हा, नम्रता कर संग एसन मन ला सम्भाला, अउ अपन भी चवकसी रखा कि तुमन भी परीक्षा मे झिन पड़ा।

² तुमन एक दूसर कर बोझ ला उठावा, अउ ये नियर मसीह कर ब्यवस्था ला पूरा करा।

³ काबर कि अगर कोनो हर कुछ नी होए पर भी अपन आप ला कुछ समझथे, त अपन आप ला धोखा देथे।

⁴ पर हर एक अपन ही बुता ला जाएच लेहे, अउ तब दूसर कर बिषय मे नही लेकिन अपन ही बिषय मे ओके ला घमण्ड करे कर अवसर होही।

⁵ काबर कि हर एक आदमी हर अपन ही बोझ ला उठाही।

जीवन हर खेत मे बिहन बुने नियर

⁶ जेहर बचन कर शिक्षा ला पाथे, ओहर सबेच बड़िया चीज मन मे सिखाए बाला ला भागी करे।

⁷ धोखा झिन खावा, परमेश्वर ठठ्ठा मे नी उड़ाल जाथे, काबर कि आदमी हर जे कुछ ला बुनथे ओहिच ला काटही।

⁸ काबर कि जेहर अपन देह बर बुनथे, ओहर देह कर द्वारा बिनाश कर खेती काटही; अउ जेहर आत्मा बर बुनथे, ओहर आत्मा कर द्वारा अनन्त जीवन कर खेती काटही।

⁹ हमन भला बुता करे मे साहस नी छोड़ी, काबर कि अगर हमन ढीला नी होबो त ठीक समय पर खेती लुवब।

¹⁰ एकरे बर जहा तक ले अवसर मिलही हमन सबेच कर संग मे भलाई करी, बिशेष कईर के बिश्वासी भाई मन कर संग।

आखरी चेतई अउ नमस्कार

¹¹ देखा, मैहर कईसन बड़खा-बड़खा गोएठ तुमन ला अपन हाथ ले लिखे हो।

¹² जे लोग मन देह कर दिखावा चाहथे, ओमन ही तुमन कर खतना करे बाला मन पर दबाव डालथे, केबल एकरे बर कि मसीह के क्रूस कर कारन सताल झिन जाए।

¹³ काबर कि खतना कराए बाला खुद त ब्यवस्था पर नी रेंगे, पर तुमन कर एकरे बर कराए बर चाहथे कि तुमन के देह कर दसा पर घमण्ड करही।

¹⁴ पर एसन झिन होए कि मैहर दूसर कोनो गोएठ मे घमण्ड करो, केबल हमर प्रभु यीशु मसीह के क्रूस कर, जेकर द्वारा संसार मोर नजर मे अउ मैहर संसार कर नजर मे क्रूस पर चड़हाल गए हो।

¹⁵ काबर कि न खतना अउ न खतना रहित कुछ है, लेकिन नावा सृष्टि ढेरेच महत्वपूर्ण है।

¹⁶ जेतेक झन मन ये नियम मे रेगही ओमन पर, अउ परमेश्वर कर इस्राएल पर शान्ति अउ दया होवत रहे।

¹⁷ आगू कोनो हर मोला दुख झिन दे, काबर कि मैहर यीशु कर दाग मन ला अपन देह मे लेहत फिरथो।

¹⁸ हे भाई मन, हमर प्रभु यीशु मसीह कर अनुग्रह तुमन मन कर आत्मा कर संग मे रहे। आमीन।