गलातियों 5 - सरगुजिया बाइबिलमसीह मे स्वतंत्रता 1 मसीह हर स्वतंत्र होए बर हमन मन ला स्वतंत्र करिसे; तले एहिच मे जमे रहा, अउ गुलामी कर जूवा मे फिर ले झिन जोता। 2 देखा, मै पौलुस तुमन मन ले कहथो कि अगर खतना करईहा, त मसीह ले तुमन ला कुछ लाभ नी होही। 3 फिर भी मैहर एक खतना कराए बाला ला बताए देहथो, कि ओला सबेच ब्यवस्था ला माने बर पड़ही। 4 तय जेहर ब्यवस्था कर द्वारा धर्मी ठहरे बर चाहथस, मसीह ले अलग अउ अनुग्रह ले गिर गए हस। 5 काबर कि आत्मा कर कारन हमन मन बिश्वास ले, आशा करल धार्मिकता कर बाट जोहथी। 6 अउ मसीह यीशु मे न खतना अउ न खतना रहित कुछ बुता है, लेकिन केबल बिश्वास कर, जेहर प्रेम कर द्वारा प्रभाव डालथे। प्रेम कर द्वारा ब्यवस्था ला पूरा करई 7 तय त बड़िया कूदत रहे, अब कोन तोला रोएक देहिस, कि सत्य ला झिन मान। 8 एसन सिख तुमन कर बुलाए बाला कती ले नही। 9 तनिक अकुन खमीर सबेच सानल आटा ला खमीर कईर देथे। 10 मैहर प्रभु पर तुमन कर बिषय मे भरोसा रखथो कि तुमन कर कोनो बिश्वास दूसर बिचार नी होही; लेकिन जेहर तुमन ला घबराए देथे, ओहर कोई ही काबर न होही सजा पाही। 11 लेकिन हे भाई मन, अगर मैहर अब तक ले खतना कर प्रचार करथो त काबर सताल जाथो? फिर त क्रूस कर ठोकर जात रहिस। 12 भला होतीस कि जेहर तुमन ला डावा-डोल करथे, ओमन अपन देह ला ही काएट डालतिन। 13 हे भाई मन, तुमन स्वतंत्र होए बर बुलाए गए हवा; लेकिन एसन झिन होए कि ये स्वतंत्रता देह कर बुता मन बर अवसर बने, बरन प्रेम ले एक दूसर कर कमिया बना। 14 काबर कि सबेच ब्यवस्था ये एक ही गोएठ मे पूरा होए जाथे, “तय अपन परोसी ला अपन नियर प्रेम रख।” 15 पर अगर तुमन एक दूसर ला दांत ले काटिहा अउ फाएर खाथा, त चवकस रहा कि एक दूसर कर सत्यानाश झिन कईर दा। पवित्र आत्मा कर द्वारा अगुवाई 16 पर मैहर कहथो, आत्मा कर अनुसार रेंगिहा त तुमन देह कर लालसा मन ला कोनो रीति ले पूरा नी करे सखिहा। 17 काबर कि देह हर आत्मा कर बिरोध मे अउ आत्मा हर देह कर बिरोध मे लालसा करथे, अउ ये एक दूसर कर बिरोधी है, एकरे बर कि जेला तुमन करे बर चाहथा ओला झिन करे पावा। 18 अउ अगर तुमन आत्मा कर रेंगाए रेगथा त ब्यवस्था कर अधीन नी रहा। 19 देह कर बुता त परगट है, मने कि ब्यभिचार, गन्दा बुता, लुचपन, 20 मूरती पूजा, टोना, बैर, झगरा, ईर्ष्या, क्रोध, बिरोध, फुट, विधर्म, 21 डाह, मतबाला पन, लीलाक्रीड़ा अउ एमन जईसन अउ-अउ बुता है, ये सब कर बिषय मे मैहर तुमन ले आगू ले कह देहे हो जईसन आगू ले कह भी दारे हो, कि एसन-एसन बुता करे बाला मन परमेश्वर के राएज कर बारिस नी होही। 22 पर आत्मा कर फर प्रेम, आनन्द, शान्ति, धीरज, कृपा, भलाई, बिश्वास, 23 नम्रता, अउ संयम है; एसन-एसन बुता मन कर बिरोध मे कोनो भी ब्यवस्था नी है। 24 अउ जेहर मसीह यीशु कर है, ओमन मन देह ला अउ ओकर लालसा अभिलाषा मन सहित क्रूस पर चड़हाए देहिन है। 25 अगर हमन आत्मा कर द्वारा जीवित आहन, त आत्मा कर नियर रेंगी भी। 26 हमन घमण्डी होए के न एक दूसर ला छेड़ी, अउ न एक दूसर ले डाह करी। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation