गलातियों 4 - सरगुजिया बाइबिलमसीह मे परमेश्वर कर स्वतंत्र बेटा 1 मैहर ये कहथो कि बारिस जब ले लईका है, मने कि सबेच चीज कर स्वामी है, तबो ले ओमे अउ कमिया मे कोनो भेद नी है। 2 लेकिन दाऊ कर ठहराल समय तक रक्षक मन अउ ब्यवस्था करे बाला मन कर बश मे रहथे। 3 ओहिच कस हमन भी, जब लईका रहेन, त संसार के शुरू कर शिक्षा कर बस मे होए के कमिया बने रहेन। 4 लेकिन जब समय पूरा होईस, त परमेश्वर हर अपन बेटा ला भेजिस जेहर कुमारी ले जनमिस, अउ ब्यवस्था कर अधीन जनमिस, 5 ताकि ब्यवस्था कर अधीन मन ला खरीद के छोड़ाए लेहे, अउ हमन मन ला लेपालक होए कर पद मिले। 6 अउ तय जेहर बेटा हस, एकरे बर परमेश्वर हर अपन बेटा कर आत्मा ला, जेहर “हे अब्बा, हे दाऊ” कही के पुकारथे, हमर हृदय मन मे भेजल गईस है। 7 एकरे बर तय अब कमिया नही, लेकिन बेटा हस; अउ जब बेटा हस, त परमेश्वर कर द्वारा बारिस भी होएन। कलीसिया बर पौलुस कर चिन्ता 8 आगू त तुमन परमेश्वर ला नी जाएन के ओकर कमिया रहा जेहर स्वभाव ले परमेश्वर नही। 9 पर अब तुमन मन हर परमेश्वर ला पहिचाएन लेहे हा, बरन परमेश्वर हर तुमन मन ला पहिचानिस, त ओ कमजोर अउ निक्कमा शुरू के शिक्षा कर गोएठ कती काबर फिरथा, जेकर तुमन मन दूसर बार कमिया होए बर चाहत हा? 10 तुमन मन दिन अउ महिना अउ नियत समय मन मे अउ बरस मन ला मानथा। 11 मैहर तुमन मन कर बिषय मे डरथो, कहो एसन झिन होए कि जे मेहनत ला मैहर तुमन बर करे हो ओहर ब्यर्थ ठहरे। 12 हे भाई मन, मैहर तुमन मन ले बिनती करथो, तुमन मोर आगू मे होए जावा; काबर कि मैहर भी तुमन कर आगू मे होए गए हो; तुमन हर मोर कुछ नी बिगाड़े हा। 13 पर तुमन मन जानथा कि आगू-आगू मैहर देह के कमजोरी के कारन तुमन ला सुसमाचार सुनाए। 14 अउ तुमन मोर देह कर दसा ला तुमन कर परीक्षा कर कारन रहिस, तुच्छ नी जाने; न ओकर ले घृना करिस; अउ प्रभु कर दूत बरन खुद मसीह कर नियर मोला गरहन करिस। 15 त ओहर तुमन कर आनन्द मनाए बर कहल गईस? मैहर तुमन मन कर गवाह हो, कि अगर होए सकथे, त तुमन अपन आएख ला भी हिकाएल के मोला दे देथा। 16 त का तुमन ले सहिच गोठियाए कर कारन मैहर तुमन मन कर दुश्मन बईन गए हो? 17 ओमन तुमन मन ला संगता बनाए बर त चाहथे, पर भला उदेश्य ले नही; बरन तुमन ला अलग करे बर चाहथे कि तय ओहिच मन ला संगता बनाए ला। 18 पर ये भी बड़िया है कि भला गोएठ मे हर घरी संगता बनाए कर यत्न करा, न केबल ओहिच घरी कि जब मैहर तुमन कर संग मे रहथो। 19 हे मोर लईका मन, जब तक ले तुमन मन मे मसीह कर रूप नी बईन जाही, तब तक ले मैहर तुमन बर फिर लईका जनमे कर समय के दर्द ला सहथो। 20 इक्छा त ये होथे कि अब तुमन कर लिघे आए के अउ ही नियर गोठियाहू काबर कि तुमन कर बिषय मे मैहर उलेझ गए हो। दूई बाचा मन: सारा अउ हाजिरा 21 तुमन जे ब्यवस्था कर अधीन होए बर चाहथा, मोला बतावा, का तुमन ब्यवस्था कर नी सुना? 22 ये लिखल आहे कि अब्राहम कर दुई ठे बेटा होईस; एक झन कमनिन ले अउ एक झन महिला ले। 23 लेकिन जे कमनिन ले होईस, ओहर देह कर रीति ले जनमिस; अउ जेहर स्वतंत्र महिला ले होईस, ओहर प्रतिज्ञा कर अनुसार जनमिस। 24 ये गोएठ मे कहानी है, ये महिला मन माना दुई ठे बाचा है, एक त सीनै पहार जेकर ले कमिया मन ही जनमथे; अउ ओहर हाजिरा है। 25 अउ हाजिरा माना अरब कर सीनै पहार है, अउ अब कर यरूशलेम शहर ओकर तुलना मे है, काबर कि अपन लईका मन संग गुलाम मे है। 26 पर उपर कर यरूशलेम शहर स्वतंत्र है, अउ ओहर हमर दाई है। 27 जब कि लिखल आहे, “हे बांझ, तय जेहर नी जन्माथस आनन्द कर; तय जे दुख ला नी उठाथस, ढेटु ला खोएल के जय-जयकार कर, काबर कि त्यागल कर संतान सुहानग कर संतान ले भी ढेरेच है।” 28 हे भाई मन, हमन इसहाक कर नियर प्रतिज्ञा कर संतान हन। 29 अउ जईसन ओ समय देह के अनुसार जनमल हर आत्मा कर अनुसार जनमल मन ला सतात रहिस, ओहिच कस अब ले भी होथे। 30 लेकिन पवित्रशास्त्र का कहथे? “कमनिन अउ ओकर बेटा ला हिकाएल दे, काबर कि कमनिन कर बेटा स्वतंत्र महिला के बेटा कर संग उत्तराधिकारी नी होही।” 31 एकरे बर हे भाई मन, हमन मन कमनिन कर नही, लेकिन स्वतंत्र महिला कर संतान हन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation