गलातियों 3 - सरगुजिया बाइबिलबिश्वास कर द्वारा धार्मिकता 1 हे बिन बुईध के गलाती मन कोन हर तुमन मन ला मोह लेहिस है? तुमन त माना आएख कर आगू मे यीशु मसीह ला क्रूस पर चड़हाल गईस! 2 मैहर तुमन मन ले केबल ये जाने बर चाहथो, कि तुमन मन पवित्र आत्मा ला, का ब्यवस्था कर बुता ले या बिश्वास कर समाचार ले पाया? 3 का तुमन एसन बिन बुईध के हा, कि आत्मा कर रीति पर शुरू कईर के अब देह कर रीति पर आखरी करिहा? 4 का तुमन हर एतेक दुख ब्यर्थ ही उठाए हा? लेकिन एकदमेच ब्यर्थ नही। 5 एकरे बर तुमन मन ला पवित्र आत्मा ला दान करतिस अउ तुमन मन मे सामर्थ्य कर बुता करथे, ओहर का ब्यवस्था कर बुता मन ले या सुसमाचार पर बिश्वास करे ले एकस करथे? 6 “अब्राहम हर त परमेश्वर पर बिश्वास करिस अउ ये ओकर बर धार्मिकता गिनल गईस।” 7 तले ये जाएन ला कि बिश्वास करे बाला है, ओमन मन ही अब्राहम कर संतान है। 8 अउ पवित्रशास्त्र हर आगू ले ही ये जाएन के परमेश्वर हर दूसर जाएत मन कर बिश्वास ले धर्मी ठहराही, आगू ही ले अब्राहम ला ये सुसमाचार सुनाए देहिस, कि “तोर मे सबेच जाएत मन आशीष पाही।” 9 एकरे बर जे बिश्वास करे बाला है, ओ बिश्वासी मन अब्राहम कर संग आशीष पाथे। ब्यवस्था कर द्वारा श्राप 10 एकरे बर जेतेक लोग मन ब्यवस्था कर बुता मन पर भरोसा रखथे, ओमन मन सबेच श्राप कर अधीन है, काबर कि लिखल आहे, “जे कोनो हर ब्यवस्था कर पुस्तक मे लिखल गईस सबेच गोएठ मन कर करे मे जमे नी रहे, ओहर शापित है।” 11 पर ये गोएठ परगट है कि ब्यवस्था कर द्वारा परमेश्वर कर हिया कोनो हर धर्मी नी ठहरे, काबर कि धर्मी जन हर बिश्वास ले जीवित रही। 12 पर ब्यवस्था कर बिश्वास ले कोनो रिश्ता नी हे; काबर कि “जेहर ओमन मन ला मानही, ओहर ओकर कारन जीवित रही।” 13 मसीह हर जे हमर कारन शापित बनीस, हमन मन ला खरीद के ब्यवस्था कर शाप ले छोड़ईस, काबर कि लिखल आहे, “जे कोनो हर लकरी पर लटकाल जाथे ओहर शापित है।” 14 ये एकरे बर होईस कि अब्राहम कर आशीष यीशु मे दूसर जाएत मन तक पहुचे, अउ हमन बिश्वास कर द्वारा ओ आत्मा ला पाएन जेकर प्रतिज्ञा होईस आहे। स्थाई प्रतिज्ञा 15 हे भाई मन, मैहर मैनसे मन कर रीति पर कहथो, मैनसे मन कर बाचा हर भी जेहर पक्का होए जाथे, त न कोनो ओला टालथे अउ न ओमे कुछ बड़हाथे। 16 तले प्रतिज्ञा मन अब्राहम ला अउ ओकर बंश ला देहल गईस। ओहर ये नी कहथे, “बंश मन ला,” जईसन ढेरेच झन मन कर बिषय मे कहल आहे; पर जईसन एक झन कर बिषय मे कि “तोर बंश ला,” अउ ओहर मसीह है। 17 पर मैहर ये कहथो जे बाचा परमेश्वर हर आगू ले पक्का करे रहिस, ओके ला ब्यवस्था चाएर सव तीस बरस कर पीछू ओकर बाद नी टाएल सकथे, कि प्रतिज्ञा ब्यर्थ ठहरे। 18 काबर कि अगर मीरास ब्यवस्था ले मिलिस है, त फिर प्रतिज्ञा ले नही, लेकिन परमेश्वर हर अब्राहम ला प्रतिज्ञा कर द्वारा दे देहिस है। ब्यवस्था कर मकसद 19 तब फिर ब्यवस्था काबर देहल गईस? ओहर त अपराध मन कर कारन पीछू मे देहल गईस कि ओ बंश कर आए तक रहे, जेला प्रतिज्ञा देहल गए रहिस; अउ ओहर स्वर्गदूत मन कर द्वारा एक मांझा कर हाथ मे ठहराल गईस। 20 मांझा हर त एक झन कर नी होथे, लेकिन परमेश्वर एकेच झन है। 21 त का ब्यवस्था परमेश्वर कर प्रतिज्ञा मन कर बिरोध मे है? एकदमेच नही! काबर कि एसन ब्यवस्था देहल जातीस जेहर जीवन देहे सकतिस, त सहिच मे धार्मिकता ब्यवस्था ले रतिस। 22 लेकिन पवित्रशास्त्र मे सबेच झन मन ला पाप कर अधीन कईर देहिस, ताकि ओ प्रतिज्ञा जेकर अधार यीशु मसीह पर बिश्वास करे ले है, बिश्वास करे बाला मन बर पूरा होए जाही। 23 पर बिश्वास कर आए ले आगू ब्यवस्था कर अधीन मे हमन मन कैद रहेन, अउ ओ बिश्वास कर आए तक जेहर परगट होए बाला रहिस, हमन मन ओकर बंधन मे रहब। 24 एकरे बर ब्यवस्था मसीह तक पहुचे बर हमर गुरू होईस आहे कि हमन बिश्वास ले धर्मी ठहरब। 25 लेकिन जब बिश्वास आए गिस, त हमन मन अब गुरू कर अधीन नी रहब। बेटा अउ बारिस 26 काबर कि तुमन सबेच झन मन ओ बिश्वास कर द्वारा जेहर मसीह यीशु पर है, परमेश्वर कर संतान हा। 27 अउ तुमन मन ले जेतेक झन मसीह मे बपतिस्मा लेहिन है ओमन मन मसीह ला पहिन लेहिन है। 28 अब न कोनो हर यहूदी रहिस अउ न यूनानी, न कोनो कमिया न स्वतंत्र, न कोनो हर नर न नारी, काबर कि तुमन सबेच झन मसीह यीशु मे एक हा। 29 अउ अगर तुमन मन मसीह मे हा त अब्राहम कर बंश अउ प्रतिज्ञा कर अनुसार बारिस भी हा। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation