गलातियों 2 - सरगुजिया बाइबिलपौलुस के सलाह ला दूसर प्रेरित मन भी मानिन 1 चउदह बरस कर पीछू मैहर बरनबास कर संग फिर यरूशलेम शहर गए, अउ तीतुस ला भी संग ले गए। 2 मोर जाए बर ईश्वरीय प्रकाशन कर संग मे होईस; अउ जे सुसमाचार ला मैहर दूसर जाएत मन मे प्रचार करथो, ओला मैहर ओमन मन ला बताए देहे, पर ओमन मन ला जेमन मन बड़खा समझल जात रहिन, ताकि एसन झिन होए, कि मोर ये समय कर या पीछू भगई-कुदई हर ब्यर्थ ठहरे। 3 लेकिन तीतुस ला भी जेहर मोर संग मे रहिस अउ जेमन यूनानी है, खतना कराए बर बिवश नी करे। 4 ये ओ झूठा भाई मन कर कारन होईस, जेमन चोरी ले घुईस आए रहिन, कि ओ स्वतंत्रता ला जेहर मसीह यीशु मे हमन मन ला मिलिस है, भेद ला ले के हमन मन ला कमिया बनाए। 5 एक घरी भी ओमन मन कर अधीन होए बर हमन हर नी मानेन, एकरे बर कि सुसमाचार कर सच्चाई मे बने रहेन। 6 फिर जेमन मन कुछ समझल जात रहिन ओमन मन चाहे कईसे भी रहिन मोला एकर ले कोनो बुता नी है; परमेश्वर हर कोनो कर पछपात नी करे ओमन मन ले मोला कुछ भी नी मिलिस। 7 लेकिन एकर उलटा जब ओमन मन देखिन कि जईसन खतना करल मैनसे मन बर सुसमाचार कर बुता ला पतरस ला सौपल गईस, ओहिच कस खतना रहित मन बर मोला सुसमाचार सुनाए बर सौपल गईस। 8 काबर कि जेहर पतरस ले खतना करल मन ले प्रेरित कर बुता ला ढेरेच प्रभाव सहित करवईस, ओहिच हर मोर ले भी दूसर जाएत मन मे प्रभावशाली बुता मन ला करवईस। 9 अउ जब ओमन मन ओ अनुग्रह ला जेहर मोला मिले रहिस जाएन लेहिन, त याकूब, अउ कैफा, अउ यूहन्ना हर जेहर कलीसिया कर अगुवा समझल जात रहिन, मोला अउ बरनबास ला संगति कर जेवनी हाथ देहिस कि हमन मन दूसर जाएत मन कर लिघे जई अउ ओमन मन कर खतना करल मन कर लिघे। 10 केबल ये कहिन, कि हमन मन कंगाल मन कर सुधि लेहब, अउ एहिच बुता ला करे कर मैहर भी अपन मे यत्न करत रहेन। पौलुस द्वारा अन्ताकिया नगर मे पतरस कर बिरोध 11 पर जब कैफा हर अन्ताकिया नगर मे अईस, त मैहर ओकर मुह पर ओकर सामना करे, काबर कि ओहर दोषी ठहरे रहिस। 12 एकरे बर कि याकूब कती ले कुछ मैनसे मन कर आए ले आगू ओहर दूसर जाएत मन कर संग मे खात रहिस, लेकिन जब ओमन मन अईन त खतना करल लोग मन कर डर के मारे ओहर पीछू हईट गईस अउ धरी मे करे लागिस। 13 ओकर संग बाचल यहूदी मन भी कपट करिन, हिया तक कि बरनबास हर भी ओमन मन कर कपट मे पड़ गईस। 14 पर जब मैहर देखे कि ओमन मन सुसमाचार कर सच्चाई पर सीधा चाल नी चले, त मैहर सबेच कर आगू कैफा ले कहे, “जब तय हर यहूदी होए के दूसर जाएत कर नियर रेंगथस अउ यहूदी मन कर जईसन नही त तय दूसर जाएत मन ला यहूदी मन कर नियर रेंगे बर काबर नी कहथस?” बिश्वास कर द्वारा धर्मी ठहरई 15 हमन मन त जनम ले यहूदी हन, अउ पापी दूसर जाएत मन ले नी हन। 16 तबो ले ये जाएन के कि मैनसे हर ब्यवस्था कर बुता ले धर्मी नी ठहरे, पर केबल यीशु मसीह पर बिश्वास करे कर द्वारा धर्मी ठहरथे, हमन अपन भी मसीह यीशु पर बिश्वास करेन, कि हमन मन ब्यवस्था कर बुता ले नही, पर मसीह पर बिश्वास करे ले धर्मी ठहरेन; एकरे बर कि ब्यवस्था कर बुता ले कोनो प्रानी हर धर्मी नी ठहरही। 17 हमन मन ले जेहर मसीह मे धर्मी ठहरे बर चाहथी, अगर अपन ही पापी हिकलब त का मसीह पाप कर सेवक है? कभो नही! 18 काबर कि जे कुछ मैहर गिराए देहे अगर ओहिच ला फिर बनाथो, त अपन आप ला अपराधी ठहराथो। 19 मैहर त ब्यवस्था कर द्वारा परमेश्वर कर ब्यवस्था बर मईर गए, कि परमेश्वर बर जीओ। 20 मैहर क्रूस पर चड़हाल गए हो, अउ अब मैहर जीवित नी रहे, पर मसीह हर मोर मे जीवित है; अउ मैहर देह मे अब जो जीवित हो त केबल ओ बिश्वास ले जीवित हो, जेहर परमेश्वर कर बेटा पर है, जेहर मोर ले प्रेम करिस, अउ मोर बर अपन आप ला दे देहिस। 21 मैहर परमेश्वर कर अनुग्रह ला ब्यर्थ नी ठहराथो, काबर कि अगर ब्यवस्था कर द्वारा धार्मिकता होतीस, त मसीह कर मरना ब्यर्थ होतीस। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation