इफिसियों 6 - सरगुजिया बाइबिलदाऊ-दाई अउ लईका मन 1 हे लईका मन, प्रभु मे अपन दाऊ-दाई कर हुकूम ला माना, काबर कि एहर उचित है। 2 “अपन दाऊ अउ दाई कर आदर कर (एहर पहिला आदेस है जेकर संग प्रतिज्ञा भी है) 3 कि तोर भला होए, अउ तय धरती पर ढेरेच दिन तक ले जीवित रहे।” 4 हे लईका बाला मन, अपन लईका मन ला रिस झिन दिलावा, लेकिन प्रभु कर शिक्षा अउ चितावनी देहत ओमन कर पालन-पोसन करा। मालिक अउ कमिया 5 हे कमिया मन जे मैनसे मन ये संसार मे तुमन कर मालिक है, अपन मन कर सिधाई ले डरत अउ कापत, जईसन मसीह कर ओहिच कस ओमन कर भी आदेस ला माना। 6 आदमी मन ला खुश करे बाला मन कर नियर दिखाए बर सेवा झिन करा, पर मसीह कर कमिया मन कर नियर मन ले परमेश्वर कर इक्छा पर चला, 7 अउ ओ सेवा ला आदमी मन कर नही लेकिन प्रभु कर जाएन के सच्चा ह्रदय ले करा। 8 काबर कि तुमन हर जानथा कि जे कोनो हर जईसन बड़िया बुता करही, चाहे कमिया होए या स्वतंत्र, प्रभु ले ओहिच कस पाही। 9 हे मालिक मन, तुमन भी धमकी देहे बर छोएड़ के ओमन कर संग ओहिच कस ब्यवहार करा; काबर कि तुमन जानथा कि ओमन कर अउ तुमन कर दोनोच मन कर मालिक हर स्वर्ग मे है, अउ ओहर काकरो पक्ष नी करे। आत्मिक लड़ाई कर हथियार 10 एकरे बर प्रभु मे अउ ओकर शक्ति कर प्रभाव मे बलवन्त बना। 11 परमेश्वर कर सबेच हथियार मन ला बाएध लेवा कि तुमन शैतान कर युक्ति मन कर आगू मे ठड़होए रह सका। 12 काबर कि हमर ये मलयुध्द लहू अउ मांस ले नी है लेकिन प्रधान मन ले, अउ अधिकारी मन ले, अउ ये संसार कर अन्धार कर हाकिम मन ले, अउ ओ दुष्टता कर आत्मिक सेना मन ले है जेहर अकाश मे है। 13 एकरे बर परमेश्वर कर सबेच हथियार बाएध ला कि तुमन बुरा दिन मे सामना कईर सका, अउ सबेच कुछ ला पूरा कईर के स्थिर रह सका। 14 एकरे बर सत्य ले अपन कनिहा ला कईस के, अउ धार्मिकता कर झिलम पहिन के, 15 अउ गोड़ मे मेल के सुसमाचार कर तियारी कर पनही पहिन के; 16 अउ ये सबेच कर संग मे बिश्वास कर ढाल ले के जमे रहा जेकर ले तुमन मन ओ दुष्ट कर सबेच जलत तीर मन ला बुझाए सकिहा। 17 अउ उद्धार कर टोपी, अउ आत्मा कर तलवार, जेहर परमेश्वर कर बचन है, ले ला। 18 हर समय हर नियर ले आत्मा मे प्रार्थना, अउ बिनती करत रहा, अउ एकरे बर जागत रहा कि सबेच पवित्र लोग मन बर बिनती करत रहा, 19 अउ मोर बर भी कि मोला गोठियाए कर समय एकस प्रबल बचन देहल जाए कि मैहर साहस कर संग सुसमाचार कर भेद ला बताए सकहू, 20 जेकर बर मैहर जंजीर ले बांधल राजदूत हो; अउ ये भी कि मैहर ओकर बिषय मे जईसन मोला चाही साहस ले गोठियाहू। आखरी नमस्कार 21 तुखिकुस जेहर प्रिय भाई अउ प्रभु मे बिश्वास योग्य सेवक है, तुमन ला सबेच गोएठ मन ला बताही कि तुमन भी मोर दसा ला जाना कि मैहर कईसन रथो। 22 ओला मैहर तुमन कर लिघे एकरे बर भेजे हो कि तुमन हमर दसा ला जाना, अउ ओहर तुमन मन कर मन ला शान्ति देहे। 23 परमेश्वर दाऊ अउ प्रभु यीशु मसीह कती ले भाई मन ला शान्ति अउ बिश्वास सहित प्रेम मिले। 24 जेहर हमर प्रभु यीशु मसीह ले सच्चा प्रेम रखथे, ओ सबेच झन मन पर अनुग्रह होवत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation