इफिसियों 3 - सरगुजिया बाइबिल

दूसर जाएत मन बर पौलुस कर सेवा

¹ एहिच कारन मै पौलुस जेहर दूसर जाएत मन बर मसीह यीशु कर बंधुवा हो

² अगर तुमन हर परमेश्वर कर ओ अनुग्रह के प्रबन्ध कर समाचार सुने होईहा, जेला तुमन बर मोला देहल गईस।

³ मने कि ये ओ भेद मोर पर प्रकाश कर द्वारा परगट होईस, जईसन मैहर आगू ही तुमन मन ला लिख दारे हो,

⁴ जेला पईढ़ के तुमन मन जाएन सकथा कि मैहर मसीह कर ओ भेद ला कहा तक ले समझाए सकथो।

⁵ जे दूसर समय मन मे आदमी मन कर संतान मन ला एकस नी बताल गए रहिस, जईसन कि आत्मा कर द्वारा अब ओकर पवित्र प्रेरित अउ अगमजानी मन पर परगट करल गईस है।

⁶ मने कि ये मसीह यीशु मे सुसमाचार कर द्वारा दूसर जाएत कर लोग मन मीरास मे साझी, अउ एक ही देह के अउ प्रतिज्ञा कर भागीदार है।

⁷ अउ मैहर परमेश्वर के अनुग्रह कर ओ दान के अनुसार, जेहर ओकर सामर्थ्य के प्रभाव कर अनुसार मोला देहल गईस, ओ सुसमाचार कर सेवक बने।

भेद कर उदेश्य

⁸ मैहर अब जो सबेच पवित्र लोग मन ले छोटा ले भी छोटे हो, ये अनुग्रह होईस कि मैहर दूसर जाएत मन ला मसीह के अगम धन कर सुसमाचार ला सुनाहू,

⁹ अउ सबेच पर ये गोएठ प्रकाशित करा कि ओ भेद के जुगाड़ बर है, जेहर सबेच कर सृजनहार परमेश्वर मे शुरू ले लुकाल रहिस।

¹⁰ ताकि अब कलीसिया कर द्वारा, परमेश्वर के कई नियर कर ज्ञान ओ प्रधान अउ अधिकारी मन पर जेहर स्वर्गीय जगहा मन मे है, परगट करल जाए।

¹¹ ओ सनातन मनसा कर अनुसार ओहर हमर प्रभु मसीह यीशु मे करे रहिस।

¹² जेमे हमन मन ला ओकर पर बिश्वास करे ले साहस अउ भरोसा कर संग परमेश्वर कर लिघे आए कर अधिकार है।

¹³ एकरे बर मैहर तुमन ले बिनती करथो कि जे क्लेश हर तुमन बर मोला होवत आहे, ओकर कारन साहस झिन छोड़ा, काबर कि ओमन मे तुमन कर महिमा है।

इफिसी मन बर प्रार्थना

¹⁴ मैहर एहिच कारन ओ दाऊ कर आगू मे घुटना टेकथो,

¹⁵ जेकर ले स्वर्ग अउ पृथ्वी पर, हर एक घराना कर नाव ला रखल जाथे,

¹⁶ कि ओहर अपन महिमा के धन कर अनुसार तुमन ला ये दान देहे कि तुमन ओकर आत्मा ले अपन भीतर देह मे सामर्थ्य पाए के बलन्वत होवत जावा;

¹⁷ अउ बिश्वास कर द्वारा मसीह तुमन कर हृदय मे बसे कि तुमन प्रेम मे जईर पकेड़ के अउ नींव डाएल के,

¹⁸ सबेच पवित्र लोग मन कर संग भली-भाति समझे कर शक्ति पावा; कि ओकर चवड़ाई, अउ लम्बाई, अउ ऊचाई, अउ गहिल केतेक है।

¹⁹ अउ मसीह कर ओ प्रेम ला जाएन सका जेहर ज्ञान ले परे है कि तुमन परमेश्वर कर सबेच भरपूरी तक ले परिपूरन होए जावा।

²⁰ अब जेहर एसन सामर्थी है, कि हमर बिनती अउ समझ ले कही ज्यादा बुता कईर सकथे, ओ सामर्थ्य कर अनुसार जेहर हमन मे बुता करथे,

²¹ कलीसिया मे अउ मसीह यीशु मे ओकर महिमा पीड़ही तक ले हमेसेच होवत रहे। आमीन।