कुलुस्सी 4 - सरगुजिया बाइबिलमसीह मन कर अनुग्रह 1 हे मालिक मन, अपन-अपन कमिया मन कर संग न्याय अउ ठीक-ठीक ब्यवहार करा, ये समेझ के कि स्वर्ग मे तुमन कर भी एक मालिक है। 2 प्रार्थना मे लगे रहा, अउ धन्यवाद कर संग ओमे जागे रहा; 3 अउ एकर संग ही संग हमर बर भी प्रार्थना करत रहा, कि परमेश्वर हमर बर बचन सुनाए कर एसन दूरा खोएल दे, कि हमन मसीह कर ओ भेद ला बखान कईर सकब जेकर कारन मैहर कैद हो, 4 अउ ओला एसन परगट करो, जईसन मोला करे बर उचित है। 5 अवसर ला बहुमूल्य समेझ के बाहर बाला मन कर संग मे बुईधमानी ले ब्यवहार करा। 6 तुमन कर बचन हमेसेच अनुग्रह सहित अउ सलोना होए, कि तुमन ला हर लोग मन ला उचित रीति ले उत्तर देहे बर आ जाए। आखरी नमस्कार 7 प्रिय भाई अउ बिश्वास योग्य सेवक, तुखिकुस, जेहर प्रभु मे मोर सहकर्मी है, मोर सबेच गोएठ मन ला तुमन ला बताए देही। 8 ओला मैहर तुमन जग एकरे बर भेजे हो कि तुमन मन ला हमर दसा मालूम हो जाए अउ ओहर तुमन मन कर हृदय मन ला शान्ति देहे। 9 ओकर संग मैहर उनेसिमुस ला भी भेजे हो; जेहर बिश्वास योग्य अउ प्रिय भाई अउ तुमन मन ले ही है; ये तुमन मन ला हिया कर सबेच गोएठ मन ला बताए देही। 10 अरिस्तर्खुस, जेहर मोर संग मे कैदी है, अउ मरकुस जेहर बरनबास कर भाई लगथे। (जेकर बिषय मे तुमन बर आदेस पाए रहा कि अगर ओहर तुमन जग आही, त ओकर ले बड़िया ब्यवहार करिहा)। 11 अउ यीशु जेहर यूस्तुस भी कहलाथे, तुमन ला नमस्कार करथे। खतना करल लोग मन ले केबल एहिच ही परमेश्वर कर राएज बर मोर सहकर्मी अउ मोर शान्ति कर कारन रहे है। 12 इपफ्रास, जेहर तुमन मे ले है अउ मसीह यीशु कर कमिया है, तुमन मन ला कहथे अउ हमेसेच तुमन मन बर प्रार्थना मन मे प्रयत्न करथे, ताकि तुमन मन सिद्ध होए के पूरा बिश्वास कर संग परमेश्वर कर इक्छा पर जमे रहा। 13 मैहर ओकर गवाह हो कि ओहर तुमन बर अउ लौदीकिया नगर अउ हियारापुलिस शहर बाला मन बर ढेरेच मेहनत करत रहथे। 14 प्रिय बैध लूका अउ देमास कर तुमन ला नमस्कार। 15 लौदीकिया नगर कर भाई मन ला, अउ नुमफास अउ ओकर घर कर कलीसिया ला नमस्कार कहबे। 16 जब ये पत्री तुमन मन कर हिया पईढ़ लेहल जाही त एकस करिहा, कि लौदीकिया नगर कर कलीसिया मे भी पढ़ल जाए, अउ ओ पत्री ला जेहर लौदीकिया कलीसिया ले आए है ओला तुमन भी पड़िहा। 17 अउ अरखिप्पुस ले कईहा कि जे सेवा प्रभु मे तोला सौपल गईस है, ओला सावधानी कर संग पूरा करबे। 18 मुझ पौलुस कर अपन हाथ ले लिखल नमस्कार। मोर संखड़ी ला स्मरन रखिहा; तुमन मन पर अनुग्रह होवत रहे। आमीन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation