कुलुस्सी 2 - सरगुजिया बाइबिल1 मैहर चाहथो कि तुमन मन जाएन ला, कि तुमन बर अउ ओमन बर जेमन मन लौदीकिया नगर मे है, अउ ओ सबेच झन बर जेमन मन मोर शाररिक मुह नी देखिन आहे, मैहर कईसन मेहनत करथो। 2 ताकि ओमन कर मन मे उत्साह मिलही अउ ओमन मन प्रेम मे अपनेच गठे रही, अउ ओ पूरा समझ कर सबेच धन हासिल करही, अउ परमेश्वर कर भेद ला मने कि मसीह ला पहिचाए ले। 3 जेमे बुईध अउ ज्ञान कर सबेच भण्डार लुकाल आहे। 4 ये मैहर एकरे बर कहथो कि कोनोच लोग मन तोला लोभाए बाला गोएठ ले धोखा नी देही। 5 मने कि मैहर देह कर भाव ले तुमन मन ले दुरिहा हो, तबो ले आत्मिक भाव ले तुमन कर लिघे हो, अउ तुमन मन कर बिधी अनुसार चरित्र अउ तोर बिश्वास कर, जेहर मसीह मे है, मजबूती ला देख के खुश होथो। यीशु मसीह मे बने रहा 6 एकरे बर, जईसन तय हर मसीह यीशु ला प्रभु कईर के गरहन कईर लेहे हा, ओहिच कस ओमे रेंगत रहा। 7 अउ ओहिच मे जईर पकड़त अउ बड़हत जावा; अउ जईसन तय हर सिखाल गए हा, ओहिच कस बिश्वास मे मजबूत होवत जावा, अउ ढेरेच बगरा धन्यवाद करत रहा। 8 चवकस रहा कि कोनो हर तोला ओ तत्व ज्ञान अउ ब्यर्थ धोखा कर द्वारा खाए झिन लेहे, जेहर लोग मन कर परमपरा अउ संसार के शुरू कर शिक्षा अनुसार त है, पर मसीह के अनुसार नी है। 9 काबर कि ओमे ईश्वरत्व कर सबेच परिपुनर्ता सदेह बास करथे, 10 अउ तय मसीह मे भरपूर होए गए हस जेहर सबेच प्रधानता अउ अधिकार कर शिरोमनी है। 11 ओहिच मे तुमन कर खतना होईस आहे जेहर हाथ ले नी होए, मने कि मसीह कर खतना, जेकर ले देह ला उताएर देहल जाथे। 12 अउ ओकरे संग बपतिस्मा मे गाड़ल गएन, अउ ओहिच मे परमेश्वर कर सामर्थ्य पर बिश्वास कईर के, जेहर ओके ला मरल मन ले जीलईस, ओकर संग मे जी भी उठिस। 13 अउ ओहर तुमन ला भी, जेमन मन अपन अपराध अउ अपन देह कर खतना रहित दसा मे मुरदा रहिस, ओकर संग मे जीलईस, अउ हमर सबेच अपराध मन ला छमा करिस। 14 अउ बिधी मन कर ओ लेख अउ सहायक नियम जे हमर नाव पर अउ हमर बिरोध मे रहिस मिटाए डालिस; अउ ओला क्रूस पर कांटी मन ले बेध के आगू ले हटाए देहिस। 15 अउ ओहर प्रधानता अउ अधिकारी मन ला उपर ले उताएर के ओमन मन कर खुलम खुला तमाशा बनईस अउ क्रूस कर द्वारा ओमन पर जय-जयकार कर अवाज सुनईस। 16 एकरे बर खाए पीए या तिवहार या नावा चांद, या सब्त कर बिषय कर बिषय मे तुमन मन कर कोनोच फईसला झिन करे। 17 काबर कि ये सबेच हर आए बाला गोएठ मन कर छाव है, पर मूल चीज मन मसीह कर है। 18 कोनोच लोग मन आत्माहिनता अउ स्वर्गदूत मन कर पूजा कईर के तुमन मन ला कूदे कर प्रतिफर ले बन्चित झिन करे। एसन लोग मन देखल गोएठ मन मे लगे रहथे अउ अपन देह कर समझ पर ब्यर्थ फूलथे। 19 अउ ओ शिरोमनी ला धरे नी रहे जेकर ले सबेच देह जोड़ अउ पट्ठा मन कर द्वारा पालन-पोसन पाए के अउ एक संग मे बनधाए के, परमेश्वर कती बड़हत जाथा। यीशु मसीह कर संग जीएई अउ मरई 20 जब कि तुमन मसीह कर संग संसार कर आदि शिक्षा कती ले मईर गए हा, त फिर काबर ओमन कर नियर जेहर संसार कर है जीवन बिताथा? तुमन एसन बिधी कर बस मे काबर रहथा? 21 कि “एला झिन छुईहा,” “ओला झिन चखिहा,” अउ “ओला हाथ झिन लगईहा?” 22 ये सबेच चीज मन बुता मे लानत-लानत नाएस होए जाही काबर कि ये लोग मन के हुकूम अउ शिक्षा मन कर नियर है। 23 ये बिधी मन मे अपन इक्छा कर अनुसार गड़ल गईस भक्ति कर रीति, अउ आत्माहिनता, अउ देह कर योगाभ्यास कर भाव ले ज्ञान कर नाव त है, लेकिन देह कर लालसा मन ला रोके मे एमन ले कोनोच लाभ नी होथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation